¿Nali angelcunaca tianllu?

Ari, tianmi. ¿Imashinata tiai callarirca? Yaripashun. Taita Diosmi angelcunataca, paicunallata imata ruranata agllai ushachun rurarca. Adán y Evata Taita Dios rurashca jipaca, shuj angelmi nalita ruranata agllashpa, paicunamanbash nalita ruranata yachachirca. Shinami Adán y Evapash Taita Diosta na cazurca (Génesis 3:1-7; Apocalipsis [Revelación] 12:9). Bibliapica Adán y Evata pandachishca ángel ima shuti cashcata, ima autoridadta charishcataca na villanllu. Shinapash, Adán y Evata pandachishca jipami, chai angeltaca Satanás Diablo nirca. Satanás nishpaca, “contra” nijunmi. Cutin Diablo nishpaca, “Llullaj” nijunmi (Mateo 4:8-11).

Jipamangarin, shuj angelcunapashmi Taita Diospa contra tucurca. Shinami Noepa punllacunapica, ashtaca ashtaca angelcunaca jahua pachapi ‘causajushca pushtutapash saquishpa’, gentecunashna aichayu, tulluyu tucushpa cai Alpaman shamurca. Chai nali angelcunaca shuj shuj huarmicunahuan pinganaita puñushpa, mapa nali cosascunata ruranatami alicachin carca. Shinami chai angelcunaca, Taita Diospa munaita na respetashcata ricuchirca (Judas 6; Génesis 6:1-4).

Chai angelcunaca, Taita Dios nali gentecunata tucuchingapaj ushashcata tamiachijpimi paicunapa aichayu, tulluyu cuerpota saquishpa jahua cieloman tigrarca. Shinapash Taita Diosca, paicuna cashca pushtumanllata cutin tigrachunga na saquircachu. Ashtahuangarin, ‘yana yana ucupishna’ cachunmi saquirca (Judas 6; 2 Pedro 2:4, NM). Ashtaca demonio ayacunami, Diablopa maquipi can. Diablomi “ayacunata mandaj” can. Diabloca “punchapamba angelshna tucunllami” (Mateo 12:24; 2 Corintios 11:14).

Bibliapica yachachinmi, 1914 huatapimi Taita Diosca jahua cielopi mandachun Jesusta churarca nishpa.a Mandai callarishpami Jesusca, Diablotapash paipa ayacunatapash jahua cielomanda cai Alpaman shitamurca. Paicunaca ñana ashtaca ushaita charircachu. Diablopash, paipa ayacunapash cai Alpaman shitamui tucushcamandami, cai Alpapica ashtaca ashtaca jatun llaquicuna tian (Apocalipsis 12:9-12).

Cai Alpapi ashtaca llaquicuna miranajujta ricushpami, Diablopash, ayacunapash paicuna munashcata ñana rurai ushanata ali yachanchi. Ñallami Taita Diospa Reinoca, paicuna ima munashcata ña ama rurachun jarcanga. Cai Alpatapash shuj juyailla paraíso Alpagutami ruranga. Huaranga huatacunatami mandanga. Chai jipaca, cutinmi ayacunaca gentecunata asha tiempota pandachingapaj munanga. Shinapash chai punllacunapimi Diablopash, paipa ayacunapash tucuchitapacha tucuchi tucunga (Mateo 25:41; Apocalipsis 20:1-3, 7-10).