Profetacunapa ejemplota catishunchi: Nahúm
1. Nahúm escribishca profeciacunamandaca ¿imatata yachajupanchi?
1 Nínive llacta tucuchi tucushcata ricushpaca, Nahúm nishca shinami Jehová Diosca paipa contracunata llaquichij cashcata ricuchin. Contracuna ninan millai millai cashpapash macanajungapaj shayaritaca na ushangachu (Nah. 1:2, 6). Profeta Nahúm escribishca profeciacunata yachajunaca, chai profeciacunapi imata yachajushcata villachinajushpa utilizachunmi ayudan.
2. ¿Imamandata ñucanchi villachishcacunaca ali can?
2 Cushilla, tranquilo sintirichun villachishunchi. Nahúm escribishca profeciacunata jahualla ricujpica, Asiria llactamanda Nínive millai jatun tucushca llactata tucuchingapaj villashcashnallami ricurin (Nah. 1:1; 3:7). Shinapash chai profeciacunaca, Jehová Diosta sirvishpa causajcunapaca ali villaicunami carca. Nahúm shutica “Cushichij” nisha ninmi. Paica judiocunamanga cashnami nirca, tucui contracunami ñalla tucuchi tucunga nishpa. Ashtahuanbash nircami, Taita Diosca “ninan llaqui punllapipash shinlli torreshnami” can nishpa (Nah. 1:7). Ñucanchicunapash ali villaicunatami villachishpa purinchi, gentecuna Jehová Diosman quimirichunmi animanchi (Nah. 1:15).
3. ¿Imashinata Nahúm cuenda ejemplocunahuan, chimbapuraicunahuan villachishun?
3 Ejemplocunahuan, chimbapuraicunahuan villachishunchi. Nínive llactahuan ima tucunata yachachunga, asiriocuna imashina Tebas llactata tucuchishcata escribichunmi Jehová Diosca Nahumta uyachirca (Nah. 3:8-10). Tucuri punllacunamanda gentecunaman parlanajushpaca, Jehová Diosca tucuita pactachij Dios cashcata yachachunmi, Bibliapi profeciacunamanda villachina canchi. Shuj ejemplota ricupashun, Babiloniamanda, medos nishca puramanda soldadocunaca ishcai tucushpami huata 632pi Jesús nara shamujpillata Nínive llactata llaquichirca. Manllanaita tamiajpimi Tigris shuti huaicupi yacu mirashpa Nínive llactata muyuriaj yaya yaya pircacunapash ashata urmachirca. Shinami Jehová Dios nishcacunaca tucuilla pactarirca Nínive llactapash contracunapa maquipi quedarca (Nah. 1:8; 2:6).
4. Villachijushpaca ¿imashinata fácil intindirinalla shimicunahuan parlana canchi?
4 Fácil, intindirinalla shimicunahuan villachishunchi. Profeta Nahumga Dios ima nishcacunata escribishpaca fácil, intindirinalla shimicunatami escribirca (Nah. 1:14; 3:1). Shinallata ñucanchicunapash fácil, intindirinalla shimicunahuan villachipashunchi (1 Cor. 14:9). Pimanbash chaira villachi callarijushpaca, imamanda visitajushcata ninallami capanchi. Bibliata yachajujcunamanbash Bibliapi, Jehová Diospi feta charichun ayudapashunchi. Shinallata Bibliapi yachajushcacuna imashina paicunata ayudajta ricuchishunchi (Rom. 10:14).
5. Nahúm escribishca profeciacunata liishpaca ¿imashinata sintirina canchi?
5 Nahumga Jehová Dios nishcacunaca tucui pactarinatami crirca, Bibliapi Nahúm nishca librota liishpami chaita yachai ushapanchi. Diablo mandajushca punlla tucurina chayamungacamanga, ñucanchicunataca Jehová Dios pactachisha nishcacunami ninanda cushichin. Bibliapica ninmi: Fiñajcunaca, na ishcai viajeta llaquichingachu nishpa (Nah. 1:9, NM).