Hulda paniguca shuj tabletgutami randi ushan
HUAQUIN huatacuna huashaman Indonesia llactapi isla de Sangir Besar nishca pushtuman viajashca cashpaca quimsa panigucunahuanmi chai playapica tuparinguiman carca. Paicunataca Bibliamanda yachachishpa ayudajcuna cashcatami rijsin. Shinapash paicunaca chai playapica predicaitaca na predicanajurcachu. Shinaca paicunaca ¿imatata chai playapica ruranajurca?
Isla de Sangir Besar Indonesia llactamanda norte ladopi
Primeroca, paicunaca mar yacuman yaicushpami pelota valij rumicunatami mascan carian. Chai rumicunataca playaman llujchishpami shuj uchilla sillapi tiarishpa, uchilla rumigucuna tucungacaman martillohuan tacan carian. Chaimandaca plástico baldegucunapi jundachishpa, gradascunata vitsashpa paicunapa huasiman apan carian. Huasipica chai rumicunataca costalcunapimi jundachin carian. Chai jipaca camiongunami chai costal rumicunataca randishpa apangapaj shamun carian. Y chai rumicunataca ñangunata rurangapami utilizan carian.
Hulda panigu playapi rumicunata tandachijun
Chai quimsa panigucunamandaca shujca Hulda shutimi can. Paica quimsandimandaca playapica ashtahuanmi trabajai usharca. Shinaca panigu Huldaca chai rumicunata jatushpami paipa familiapi gastocunahuan ayudan carca. Shinapash paica JW Library® aplicacionda utilizangapaj munaimandami pai ganashca culquiguhuanga shuj tabletta randingapaj munarca. Hulda paniguca aplicacionbi videocuna, informacionguna, ashtahuan ali predicangapaj y Bibliata ashtahuan intindingapaj paita ayudanataca alimi yacharca.
Panigu Huldaca shuj quilla y chaupitami cada tutamandata ishcai horasta trabajarca. Pai tacashpa trabajashca rumicunaca shuj uchilla camión jundami tucurca. Shinami paniguca, al fin tabletguta randingapaca culquita tandachita usharca.
Hulda panigu paipa tablethuan
Hulda paniguca nircami: “Rumicunata tacashpaca shaijushca nanaihuanmi quidarcani. Shinapash tabletguta ña charishpaca predicangapaj, reuniongunata ashtahuan uchalla preparangapaj utilizaita ushashcata ricushpaca nanaicunatapashmi cungarcani”. Shinallata paniguca nircami: “Pandemia tiashca horas chai tabletta charimandami reuniongunamanbash conectari usharcani”. Panigu Hulda tabletguta chari ushashcamandaca ninandami cushijupanchi.