Diospa Reinoca casilla ali causaigutami apamunga

Diospa Reinomi tucuicuna shuyashca ali gobierno cagripan. Diospa Reino mandajushpaca tranquilo, shujlla shina ali causachunmi ayudanga. Salmo 72:7​pica ‘[alitalla] ruranami’ cai Alpapica tianga ninmi. Shinapash ¿imahorata Diospa Reinoca cai Alpata mandai callaringa? ¿Imashinata mandanga? Chaipi cangapaca ¿imatata rurana capangui?

DIOSPA REINOCA ¿IMA HORATA CHAYAMUNGA?

Bibliapica, Diospa Reino ñalla chayamuna punllacunapica mundo enteropimi guerracuna, millai ungüicuna, nali gentecuna, terremotocuna, ninan yarjaipashmi tianga ninmi (Mateo 24:3, 7, 12; Lucas 21:11; Apocalipsis 6:2-8).

Bibliapica ‘tucurimui punllacunapica, paicunalla ali cangapaj munajcuna, charijyangapaj munajcuna, taitamamatapash na cazujcuna, na pashi nijcuna, Diostapash na manllajcunami tianga. Pitapash na juyajcuna, ali tucungapaj na munajcuna, yangata juchachijcuna, ima munashcata rurajcuna, na llaquijcuna, ima alitapash na ricunayachijcunami tianga. Ninanda jariyajcuna, Taita Diostapash na juyashpa, yanga cushijushpa causanatalla juyajcunami tianga’ ninmi (2 Timoteo 3:1-4). Cashna gentecunaca cunanbimi ashtahuan miranajun.

Cai shimicunaca huata 1914​pimi pactari callarirca. Huaquin estudiashcacunaca chai huatapimi cai Alpapica ashtaca cosascuna pasai callarirca nishcami. Dinamarca llactamanda estudiashca Peter Munch shuti jarica nircami, 1914​pi tiashca guerramandapachami, gentecunapa causaica cambiashca, ali causanajushcapimi ashtaca llaquicuna miramushca, caishuj chaishuj contrarijcunapash tiai callarishca nishpa.

Cai Alpapi tiashca llaquicunaca Diospa Reino ñalla cai Alpapi mandai callarinatami ricuchin. Ali villaigucunapashmi tian. Jesusca tucurimui punllacunapica “Taita Dios mandajujmanda cai ali villaitaca, cai pachapi tiaj tucui llactacunapi causajcuna yachachunmi villanajunga. Chai jipami, tucurimuica chayamunga” nircami (Mateo 24:14).

Cai ali villaigucunamandami testigo de Jehovacunaca villachishpa puripanchi. Chaimandami ñucanchi saquishpa purij revistaca Jehová Diospa Reinomandami Villajun nishca shutita charipan. Cai revistacapica, Diospa Reino tucui gentecunamanda cai Alpapi imatalla ruragrijushcatami villajun.

¿IMAHORATA DIOSPA REINOCA MANDAI CALLARINGA?

Chaipaca cai chuscu yuyaicunatara intindipashun:

1. Diospa Reinopica, juchayuj mandajcunaca na mandanajungachu.

2. Mundo enteromanda mandajcunaca mandashpa catingapami munanga. Chaimi Diospa contracuna tucunga (Salmo 2:2-9).

3. Mundo enteromanda mandajcuna mandashpa catingapaj munashcamandami, Taita Diosca paicunata shuj guerrapi tucuchinga (Daniel 2:44; Apocalipisis19:17-21). Cai guerratami Bibliapica Armagedón nin (Apocalipsis 16:14, 16).

4. Diospa gobiernota apoyajcunaca Armagedón guerrapica salvaringami. Chaimi cai Alpa juyailla, tranquilo pushtugu tucujpica, chaipi causanajunga. Bibliapica cai guerramanda salvarishca tauca gentecunataca “na cuentai ushanalla ashtaca gentecuna” nishpami escribishca (Apocalipsis 7:9, 10, 13, 14).

DIOSPA REINOPI CANGAPACA ¿IMATATA RURANA CAPANCHI?

Chaipaca Bibliapimi Taita Diosmanda yachajuna capanchi. Taita Diosta mañajushpaca Jesusca nircami: “Na llullaj shujlla Taita Dios cashpami, cambaj Churi Jesucristotaca cachamuhuarcangui. Shina cajta rijsishpallami, pipash causaita causagringa” nishpa (Juan 17:3).

Jehovamanda yachajunaca ashtaca cosascunapimi ayudan. Chai cosascunamandaca ishcaitalla ricupashun. Primero Taita Diospi crichun, paipi shinlli feta charichunmi ayudan. Ashtaca rurashcacunata ricuimandami Taita Diospica cripanchi. Chaimi Diospa Reino ñalla shamunataca seguro capanchi (Hebreos 11:1). Segundo Jehovamanda yachajunaca, Jehová Diostapash, gentecunatapash ashtahuan juyachunmi ayudan. Taita Diosta juyaimandami paitaca shungumanda cazunchi. Gentecunata juyaimandami Jesuspa shimicunata pactachipanchi. Jesusca “imashnami shuj gentecuna cangunaman imatapash aliguta rurachun munanguichi. Chashnallatami cangunapash paicunaman alita rurana canguichi” nircami (Lucas 6:31).

Taita Diosca, shuj taita cuendami ñucanchicuna cushijushpa causachunmi munan. Chai causaigutami Bibliapica “causaita causanatami japinga” nin (1 Timoteo 6:19). Cunanbica, ashtaca llaquicunahuanmi causanchi. Shinapash Taita Dios munashcashna causaiguca ¿imashinata cagrin? Chaipaca, Diospa Reino imacunatalla ruragrijushcata ricupashun.