Tucui laya gentecunahuan llevaripashunchi
Imamandata shinlli can
Ñucanchi alicachishca gentecunahuanlla llevarishpaca chaishuj gentecunataca nalicachishpami ricui callarishun. Ñucanchi alicachishca gentecunahuanlla llevarishpaca ñucanchi pensashcacuna, sintishcacunallami ali cana nishpa pensai callarinchiman.
Bibliapica ninmi
“Cangunapa shungutaca punguta pascanshnami alipacha pascana capanguichi” (2 CORINTIOS 6:13, NM ).
¿Imatata ningapaj munan? Bibliapi shungu nishpaca ñucanchi yuyaicunamanda, sintishcacunamandami parlan. Ñucanchishnalla caj gentecunahuanlla llevarishpaca ñucanchi shungutaca punguta pascanshnaca na pascanajunchimanllu. Ama shina cangapaca tucui laya gentecunahuan llevaringapami esforzarina capanchi.
Tucui laya gentecunahuan amigo tucunaca ¿imashinata ñucanchitaca ayudan?
Amigo tucushpami gentecuna imamanda na ñucanchishnallata imatapash rurajta intindishun. Paicunahuan llevarishpaca paicunapash ñucanchishnallata cajtami cuenta japishun. Shinami paicunataca ashtahuan juyashpa paicuna llaquilla cajpi, cushilla cajpipash ñucanchipash shinallata sintirishun.
Nazaré shuti huarmigumanda ricupashunchi. Paica shuj llactamanda shamushca gentecunata juyaihuan ricunatami yachajuna tucurca. Paica “shuj llactamanda shamushcacunahuan tiempota yalishpa, paicunahuan trabajashpami chai gentegucunaca shujcuna nishcashna na cashcata cuenta japircani ninmi. Shuj costumbrecunata charij gentecunahuan amigo tucushpami paicunata juyashpa ali tratai callarinchi” ninmi.
¿Imatata rurai ushapangui?
Shuj llactamanda shamushca gentecunahuan, mishugu cajpi, yanagu cajpi, shuj shuj shimita parlaj cajpipash paicunahuan parlangapaj esforzaripashunchi. Caitapash rurapangui:
Quiquingunapa causaimanda ashaguta parlahuaichi ninallami capangui.
Imagutapash micungapaj invitapangui.
Paicunapa parlocunata aliguta uyashpa, paicunapa ima importante cajta ricupangui.
Paicunapa causai imashina cashcata intindingapaj esforzarishpaca paicunataca ashtahuan alimi trataita ushapangui.