Minishtirishca cosascunahuan cushilla causangapaj consejocuna

Ali trabajadormi cana capanchi

EFESIOS 4:28​pica ninmi: “Cangunapaj maquihuambacha trabajashpami, aliguta causana canguichi. Shina causashpami, imagupash illajcunaman carangapaca charinguichi”.

Taita Diosca gentecuna ali trabajadorcuna cachunmi munan. Porque ali trabajadorcunaca, paicunallata imagutapash ganashpami familiatapash mantenita ushan. Ashtahuangarin imagutapash na charij gentecunatapashmi imaguhuanbash ayudaita ushan. Shinami paicunaca cushilla causan. Ali trabajador cashpaca jefecunapa ñaupajpica ali ricurishpami trabajotapash charishpa catin. Shinallata Bibliapica shinllita trabajanaca Taita Diospa bendicionmi can ninmi (Eclesiastés 3:13).

Honradomi cana capanchi

HEBREOS 13:18​pica ninmi: “Ñucanchipash ali yuyaihuan, tucuita aliguta rurangapaj munashpami, chaita ruranata yariajlla causanajunchi”.

Honradocuna cashpaca ñucanchillatami ali sintirishun, shinallata tutacunapash ali puñuita ushashun. Shinallata gentecunaca ñucanchitaca respetashpa, ñucanchipipash confianzatami charinga. Pero si na honrado cashpaca ñucanchillatami nali sintirishpa shinallata imahorapash japi tucushun yashpa manllaihuan causashun.

Ashtaca culquita charina munaica, nalimi can

HEBREOS 13:5​pica ninmi: “Imata cashpapash charijyanata munashcamandalla na rurana canguichi. Cunan imaguta charishpapash, chaihuanlla cushijushpa causanguichi”.

Culquica micunaguta randingapaj o imapash shuj cosasgucunata randingapaca minishtirishcami can. Shinapash culquita juyana o ashtaca culquita charina munaica, peligrosomi can. Porque si pipash ashtaca culquita charina munaihuan causashpaca, trabajopilla yalishpami paipa saludtapash descuidanga. Shinallata huahuacunahuan tiempoguta yalinatapash saquishpami trabajashpalla yalinga. Ashtahuangarin cusahuarmi causaitapashmi llaquiman apanga (1 Timoteo 6:9, 10). Shinallata ashtaca culquita charingapaj munaj gentecunaca, culquimandallami imapash nalita ruraita ushan. Ali yuyaita charij shuj jariguca, cashnami nirca: “Na llullaj runaguca, ninandami bendiciai tucunga. Ashtahuangarin ucha charijyangapaj munaj runaca, llaquichi tucungapachami” (Proverbios 28:20).

Alipacha educaciondami agllana capangui

PROVERBIOS 3:21​pica ninmi: “Mandashcatapash, ali yuyaita cushcatapashmi alichina cangui”.

Gentecuna ali educacionda chasquishpami, ali personacuna y shinallata ali taitamamacuna caita ushan. Shinapash chai educacionga gentecuna cushilla causachun, seguro causachunga na ayudanllu. Ashtahuangarin ciertopacha cushilla, ali causangapaj munashpaca, Taita Diosmandami yachajuna capanchi. Bibliapica, Taita Diosta cazujcunaca siempremi ali causanga ninmi (Salmo 1:1-3).