Demoniocunaca ‘huañushcacuna causashpami catin’ nishpami llullan

Bibliapica Satanás ‘tucui cai pachapi causajcunatami umachijun’ ninmi (Apocalipsis 12:9). Satanaspash, demoniocunapash Bibliapi yachachishcacunataca na crichun munanllu. Chaimi huañushcacunapa espíritu shuj ladocunapi causangapami rin nishpa gentecunataca umachin. Cunanga Satanaspash, demoniocunapash imashina umachijta ricupashunchi.

Panda religionguna

Ashtaca religiongunapica, alma tiajtami yachachin. Shinallata pipash huañujpica paipa cuerpomanda alma llujshishpa shuj ladocunapi causangapaj rijta, shinallata cuerpo huañujpipash almaca nunca na huañunllu nishpapashmi yachachin.

Pero Bibliapica chaitaca na yachachinllu. Bibliapica causaj gentecunatami alma nin. Gentecunapi imapash aparte tiajtaca na yachachinllu. Por ejemplo, Adanda rurashcamanda parlashpaca Bibliapica cashnami nin: “Shinamandami Mandaj Taita Diosca, runataca ñutu alpamanda rurarca. Chai runapaj singapi fucushpami, causaita cuj samaita curca. Chaimandapachami runaca, causai callarirca” (Génesis 2:7). Cai textopica Adanman shuj almata cushcataca na nijunllu. Adán shuj alma cashcatami intindichijun.

Animalcunapashmi alma can (Génesis 1:20, 21, 24, 30).

Bibliapi “alma” nishpaca gentecunamandami parlajun. Gentecunami alma capanchi. Chaimandami Bibliapica alma huañun cashcata yachachin. Cunanga Bibliapi imata nijta ricupashun.

• “Maijanmi juchata ruran, chaipaj almami huañunga” (Ezequiel 18:4).

• “Maijanmi juchata ruran, chaipaj almami huañunga. Churica, paipaj taitapaj juchamandaca, na llaquita apangachu. Shinallata taitapash, paipaj churipaj juchamandaca, na llaquita apangachu” (Ezequiel 18:20).

Bibliapa shuj textocunapipashmi almata huañuchi ushashcata (Génesis 17:14), espadahuan huañuchi ushashcata (Josué 10:37), cungapi sipishpa huañuchi ushashcata (Job 7:15) y yacupi ahogarishpa huañui ushanatami ricuchin (Jonás 2:5). Cai textocunapi ricuchishcashnaca, almaca huañunmi.

Bibliata callarimandapacha tucuringacaman liishpa ricujpica, na huañuna almatami charinchi nishpaca ni maijan partepi na yachachijunllu. Almaca na shuj espíritu canllu. Na huañuna almata charinchi nishca llullacunaca Satanasmanda, demoniocunamandami shamun. Jehová Diosca shina llullacunataca ninandami millanayachin (Proverbios 6:16-19; 1 Timoteo 4:1, 2).

Huañushcacunahuan parlaj brujocuna

Satanasca brujocunata utilizashpapashmi gentecunataca pandachin. Brujocunaca huañushcacunahuan directamentemi parlan. Ashtaca gentecuna, brujocunapash, huañushcacunapa espiritucunahuanmi parlanajunchi nishpami crin. Pero Bibliapi yachachishcashnaca chaicunaca na ciertochu can (Eclesiastés 9:5, 6, 10).

Shinaca brujocunaca ¿picunahuanda parlanajun? Paicunaca demoniocunahuanmi parlanajun. Demoniocunaca, shuj persona causajujpillatami pai imashina cajta, imata rurajta, imacunatalla nijta, imacunatalla yachajta ricurianajun. Chaimi pipash huañujpica, chai personami canchi nishpa umachin (1 Samuel 28:3-19).

Llulla parlocuna

Satanasca llullacunahuanmi huañushcacuna causashpa catijta gentecunamanga crichin. Shina llulla cuentocunahuanmi gentecunataca Bibliapa cabal yachachishcacunamanda caruyachin (2 Timoteo 4:4).

África llactapica, ashtaca gentecunami huañushcacunata cutin ricurcanchi nishpa parlan. Cutin huaquingunaca, huañushcacunataca caru llactacunapimi ricurcanchi ninmi. Pero caipi pensaripai: pipash cutin causarishpaca ¿nachu paicunapa familiapamanllata o amigocunapamanllata tigranman?

Huaquingunaca, pitapash shuj huañushca personahuan parecidota ricuimandami ‘ñuca huañushca familiatami ricurcani’ nita ushan. Por ejemplo, shuj punllaca ishcai huauquigucunami shuj pueblogupi predicanajushcarca. Shinapimi shuj mayorlla mishugu huasha huasha catijushcata cuenta japirca. Chaimi chai mishugutaca ¿imashpata ñucanchicunata catijungui? nishpa tapuchijpica, chai mishuguca ‘ñuca huañushca huauquimi yashpa catijuni’ nircami. ‘Na quiquinba huauquichu capani’ nijpipash chai mishuguca na cringapaj munarcachu. Shina pasashcataca chai mishuguca paipa amigocunaman, paipa vecinocunamanbash llullacunahuanmi villangapaj rishcanga.

Muscuicunapi ricushcacuna, parlocunapash

Tal vez quiquinga pipash manllanai muscuicunata charishcata, manllanai cosascunata ricushcata parlajta uyapashcangui. Shina experienciacunata parlaj gentecunaca shujcunatapashmi manllachin. África occidental llactamanda Marein shuti huarmiguca, tutacuna paipa abuelita rimamujtami uyan cashca. Chaimi Mareinga, ninanda caparishpa paipa familiata rijchachin cashca. Tiempohuanga paica locagumi tigrarca.

Huañushcacuna ciertopacha causajushpaca ¿gentecunata manllachingapachu causanajun? Na, na shina canllu. Demoniocunami gentecunataca manllanai muscuicunata muscuchishpa manllachin.

Shinapash, demoniocuna muscuicunapi alicunatashnalla mandajpica ¿catinachu capanchi? Por ejemplo, Sierra Leona llactamanda, Gbassay huarmiguca shuj unguihuanmi ninanda sufrijurca. Shinapimi, paipa taita shuj muscuipi ricurishpa, paitaca shuj yuramanda fangacunata japishpa, yacuhuan chapushpa ufiangui nishpami mandashcarca. Shinapash chai mandashcataca nipiman nara villanachu carca. Chai mandashcacunata catishpami paica aliyarca.

Cutin shuj mishaguca, shuj tuta paipa cusa ricurishcatami nirca. Paica jari jari, ali mudarishcami carca ninmi.

Muscuicunapi mandashcacuna alishnalla ricurijpipash chaicunaca ¿Taita Diosmandachu shamun? Na, na Taita Diosmandaca shamunllu. Jehová Diosca ‘na llullaj Mandaj Taita Diosmi’ can. (Salmo 31:5). Paica na llullanllu. Demoniocunallami chaitaca ruran.

Shinaca ¿ali demoniocunapashchu tian? Na, na tianllu. Demoniocunaca gentecunata ayudangapaj munashcata pensachunmi munan. Pero tucui demoniocunallatami nalicuna can. Satanás Evahuan parlangapaca ali alishnalla tucushpami parlarca (Génesis 3:1). Pero Satanaspa nishcacunata cazushcamandaca ¿imata pasarca? Evaca huañurcami.

Nali gentecunaca, pitapash umachingapaj munaimandaca ali alishnalla tucushpami imagutapash parlaj tucun. Chashna gentecunataca África llactapica cashnami nin: “Yura yura quiruta charishpapash, yana shungu gentecunami can” nishpa. Shinallata Bibliapipash cashnami nin: “Satanaspash, paillata punchapamba angelshna tucunllami” ninmi (2 Corintios 11:14).

Taita Diosca pihuanbash ñana muscuicunapi o jahua cielomanda parlachimushpaca comunicarinllu. Cunanbica gentecunata yachachingapaj, paicunahuan parlangapaca, Bibliatami utilizan. Chaimi gentecunaca “tucui ali ruraicunata rurangapapash alipacha preparadocuna” caita ushapanchi (2 ­Timoteo 3:17, TNM).

Jehová Diosca ñucanchita juyaimandami Diablopa trampacunamanda cuidarichun advertin. Jehová Diosca demoniocuna peligrosocunapacha cashcataca alimi yachan.