LECCIÓN 19
Aliguta cazushpa aliguta yarishpa sirvij esclavoca ¿pita can?
Diosmanda yachachishcacunaca tucuicunatami ayudan
Pai huañuna punlla ña chayamujujpimi Jesusca apóstol Pedrohuan, Santiagohuan, Juanhuan, Andreshuanbash parlajurca. Tucuri punllacunapi ima tucunamanda parlashpami Jesusca nirca, ‘shuj amomi “ñuca huasiguta cuidapangui, micuna horas chayajpica sirvijcunaman micunaguta carapangui” nishpa mingarca. Chaita aliguta cazushpa aliguta yarishpa sirvij [esclavoca] ¿maijanda canga?’ nishpa (Mateo 24:3, 45; Marcos 13:3, 4). Cai textopi micunagu nishpaca Diosmanda yachachishcacunatami nijun. Amoca Jesusmi can. Paimi shuj esclavota agllana carca. Chai esclavomi tucuri punllacunapi Jesusta catijcunaman Diosmanda yachachishcacunata minishtirishca horaspi cuna carca. Chai esclavoca ¿picunata can?
Diospa espíritu santohuan agllashca Jesusta catijcunami can. Aliguta cazushpa aliguta yarishpa sirvij esclavoca huaquin ungido huaquicunami can. Paicunami testigo de Jehovacunapa Cuerpo Gobernante can. Aliguta cazushpa aliguta yarishpa sirvij esclavo tiashcamandami, Jehová Diosta adorajcunaca minishtirishca horaspi Diosmanda yachachishcacunata charinchi (Lucas 12:42).
Cai Alpapi Diospa organizaciondami ricurian (1 Timoteo 3:15). Jesusca esclavomanmi mingarca cai Alpapi Diospa organizacionbi ima tiashcacunata cuidachun, villachinata ñaupajman pushachun, tandanajuicunapi imata yachachinatapash ricuriachun. Aliguta cazushpa aliguta yarishpa sirvij esclavoca minishtirishca horaspi Diosmanda yachachingapami, villachinapi utilizana publicaciongunata llujchin, congregacionbi, jatun tandanajuicunapipash yachachin.
Esclavoca aliguta cazuj cashpami Bibliapa yachachishcacunata ali catin, ali villaicunata villachun mingashcatapash pactachin. Cutin aliguta yarij cashpami cai alpapi Jesuspa tucui mingashcacunata ali cuidan (Hechos 10:42). Diosta sirvijcunata mirachishpa, Diosmanda yachajungapaj ashtaca publicaciongunata llujchishpami Jehová Diosca esclavota ninanda bendiciajun (Isaías 60:22; 65:13).
Paipa catijcunata Diosmanda yachachichunga ¿pimanda Jesusca mingarca?
Esclavoca ¿imamandata aliguta cazuj, aliguta yarij can?