¿Tandanajui Huasipi tiaj bibliotecata utilizajupanguichu?

¿Bibliamanda ashtahuan yachajungapaj munapanguichu? ¿Shuj textomanda, Bibliapi parlashca llactacunamanda, gentecunamanda o shuj cosascunamanda yachajungapaj munapanguichu? Imapash problemata ñuca charijpica ¿Bibliaca ayudangacha nishpa tapuripashcanguichu? Shinaca Tandanajui Huasipi tiaj bibliotecapi informacionda mascachunmi animapanchi.

Bibliotecapica informacionda mascangapami ayudacuna tian. Testigo de Jehovacunapa publicaciongunataca quiquinba idiomapica napashchari tucuita charipangui. Cutin Tandanajui Huasipi tiaj bibliotecapica chairalla llujshishca publicaciongunataca casi tucuitami charin. Chaipica shuj shuj Bibliacuna, shuj ali diccionario o shuj ayudacunapashmi tian. Chaicunataca tandanajui nara callarijpillata o tucurishca jipapash utilizanallami capangui. Chaipi shuj computadora tiashpaca Watchtower Library nishca programatapash charingami. Chaipi casi tucui publicaciongunata charishcamandami, shuj temamanda o shuj textomanda informacionda mascangapaj facil capan.

Jesuspa Chaquita Catishpa Causashunchi Yachachishunchi tandanajuipi yachajujcunatami ayudan. Quiquinman cushca asignaciongunata prepararingapaca Tandanajui Huasipi bibliotecata utilizanallami capangui. Cai tandanajuipa superintendente huauquimi chairalla llujshishca publicacionguna bibliotecapi tiachun, ali arreglashca cachunbash ricuriana can. Chai huauqui o quiquinda Bibliamanda yachachijmi informacionda imashina mascanata ricuchipanga. Bibliotecamanda publicaciongunataca na mapayachina, na rayanachu capangui. Quiquinba huasimanbash na apanachu capangui.

Bibliapica ninmi, ‘Diospa ali yachaita’ taringapaca ‘ninan valishcacunata mascajunshnami’ esforzarina capanguichi nishpa (Proverbios 2:1-5). Diospa ali yachaita taringapaca Tandanajui Huasipi tiaj bibliotecami ali ayudapanga.

• Informacionda mascangapaca ¿ima ayudacunata bibliotecapica tian?

• Bibliotecapi informacionda mascachunga ¿picunata ayudai ushan?