Lección 14
Diospa Reinomi Cai Alpataca Mandanga
¿Cai Alpata ñalla pi mandanata yachangapaj munanguimanllu?... Diospa Reinomi mandanga. Diospa Reino mandajpimi cai Alpaca juyailla causanayai canga. ¿Diospa Reinomanda ashtahuan yachajungapaj munanguimanllu?...
Cada llactapimi shuj mandaj tian. Chai mandajca chai llactapi causajcunatami mandan. Diospa Reinopipash shuj mandajmi tian. ¿Pi cajta yachanguichu?... Jesusmi can. Paica jahua cielopimi causan. Ñallami cai Alpapi tucui causajcunata mandai callaringa. Pai mandajujpica ¿imashinashi causashun?...
Paraisopica ¿imatata ricungapaj munangui?
Cushillami causashun. Cai Alpa paraíso tucujpica guerracuna, ungüicuna, huañuipash ñana tiangachu. Imamandapash gentecunaca na macanajungachu. Na ricujcunapash ricungami. Sordocunapash uyangami. Suchucunapash puringa, calpanga, brincangami. Tucuicunami ashtaca micunata charinga. Animalcunapash paicunapura na macanajungachu. Gentecunaca millai animalcunahuanbash pugllai ushashunmi. Huañushcacunapash causaringami. Shinaca Rebeca, Rahab, David, Elías shujcunapashmi causaringa. ¿Paicunata rijsingapaj munanguimanllu?...
Jehová Diosca canda ninanda juyaimandami cushilla causachun munan. Na llullaj shujlla Taita Diosmanda yachajushpa, paita cazushpaca cai Alpa paraíso tucujpica cushijushpami para siempre causangui. ¿Paraisopi causangapaj munanguimanllu?...
BIBLIAPI LIISHUN:
Isaías 2:4; 11:6-9; 25:8; 33:24; 35:5, 6