Huahuaguta charishpaca ¿imatata rurana canguichi?

Cusahuarmicuna punda huahuaguta charishpa cushijushca cashpapash, ashtaca ruranacunata charishpami preocuparin. Chaipimi chaira cuenta japin, huahuaguta cuidangapaca tiempo minishtishcata, asha shinlli cashcatapash. Shinallata shaijushca cashcamandami huaquinbica ali, cutin huaquinbica nali cashpa cusahuarmi ashata culirari callarin. Shinaca ishcandimi huahuata cuidangapaj, cusahuarmi ali cangapajpash imata ruranata ricuna capanguichi. Imapash pasajujpica ¿imashinata Bibliapa consejocunaca ayudaita ushan?

1 CUSAHUARMIPA CAUSAICA CAMBIANMI

BIBLIAPICA NINMI: “Juyaita charishpaca, llaquita apanllami, shujcunatapash llaquinmi. Na paipajlla alita mascanllu, na ñapash fiñarinllachu” nishpa (1 Corintios 13:4, 5). Punda huahuaguta charishpa, huahuagupa mama paitalla cuidangapaj munanaca alimi can. Shinapash, cusaca ladoman saquijushcata sintingapashchari, ama shina sintirichunmi yaipi cana capangui. Cusata minishtishcata ricuchingapaca, na ñapash culirashpa, ali shunguhuanmi huahuaguta cuidashpa ayudajpica pagui nina capangui.

“Shinallata cusacunapash, aliguta yarishpami cangunapaj huarmicunahuanga causana canguichi.” (1 Pedro 3:7.) Cusaca, huahuaguta quiquinba huarmi ali cuidangapaj ninanda juerzarijushcamanda, imapash shuj ruranacunata charishcamanda yapata shaijushpa, llaquilla sintirishcataca intindinami capangui. Huaquinbicarin quiquinhuan culirangapashchari, pero quiquinga na culiranachu capangui. Bibliapica ninmi: “Ninan shinlli runapaj randica, na ñapash fiñarij runami ashtahuan ali” can nishpa (Proverbios 16:32). Quiquinba huarmi imashina sintirishcata ali ricushpa, imagupipash ayudachun minishtijujpica ayudanami capangui (Proverbios 14:29).

CAITA RURAPANGUI:

• Cusapa: Tutapash huahuaguta cuidashpa quiquinba huarmiguta ayudapangui. Shuj cosascunata ruranamanda tiempota llujchishpami quiquinba huarmihuan, huahuahuan ashtahuan tiempota yalina capangui

• Huarmigupa: Quiquinba cusa huahuata cuidashpa ayudashachu nijpica, ari nipangui. Shina ayudajujpica cashna o chashnami rurana nishpaca ama nipanguichu. Chaipa randica imashina ruran aliguman ricuchipangui.

2 CUSAHUARMI CAUSAITA CUIDAPANGUICHI

BIBLIAPICA NINMI: “Shujlla aicha tucushpa causanajunga” nishpa (Génesis 2:24). Cusahuarmi huahuaguta charishpa familia mirajpipash “shujlla aicha tucushpa” causajushcataca na cunganachu capanguichi. Cusahuarmi ali causashpa catingapaca ishcandimi juerzarina capanguichi.

Cusa ayudajpica huarmiguca agradicishpa pagui ninami can. Chai shimicunaca “Jambigushnami” canga (Proverbios 12:18). Huarmigu familiata ali cuidajujpimi, cusaca tucui shunguhuan juyashcata, valishca cashcata, alicachishcatapash nina can (Proverbios 31:10, 28).

“Pipash na quiquimbajlla ali cachun, imatapash ruranachu. Ashtahuangarin shujpajpash ali cachunmi, imatapash rurana.” (1 Corintios 10:24.) Imata rurajushpapash cusa o huarmi ali cachun rurapangui. Ishcandi imata rurashcata valichipanguichi. Shinallata ishcandi parlaringapaj, tiempoguta llujchinami capanguichi. Ashtahuangarin cusahuarmi juyarishpa igual cangapaj munajushpaca na mitsarijunachu capanguichi. Bibliapica ninmi: “Ishcandimanda na munanichu nishpaca, na ninachu canguichi” nishpa (1 Corintios 7:3-5). Ishcandi juyarishpa igual canamandaca imatapash na pacashpami parlarina capanguichi. Quiquin na culirashpa aliguman intindirishpaca cusahuarmi causaica ashtahuanmi shinlliyashpa catinga.

CAITA RURAPANGUI:

• Ishcandilla yalingapaj tiempota llujchipanguichi

• Imagutapash randishpa carashpa, juyarishcata ricuchirina capanguichi

3 HUAHUAGUMAN YACHACHIPAI

BIBLIAPICA NINMI: “Dios escribichishca jucha illaj Shimicunataca, huahuamandapachami yachajushcangui”, chaimi quishpiringapajpash ayudan nishpa (2 Timoteo 3:15). Huahuata imashina yachachinata pensaripanguichi. Nara nacirishpallatami huahuaguca ashtacata yachajui ushan. Mamapa vijsa ucupi cashpallatami taitamamapa parlota rijsin, imashina sintirijtapash huahuaca sintinllami. Taitamamacunaca huahua nacirishca punllamandapachami imagutapash huahuaman liina can. Shinapash paica huahuarami na intindingachu nishpaca na yuyanachu canguichi, chaimi huahua ña jatunyashpaca liinata gushtanga.

Taita Diosmanda parlajpica, huahua na intindingachu nishpaca na pensanachu capanguichi. Chaipa randica huahuagu uyajtami Jehová Diostaca mañana capanguichi (Deuteronomio 11:19). Huahuahuan pujllajushpaca, imacunatalla Dios rurashcata parlapanguichi (Salmo 78:3, 4). Huahua viñarishpaca, taitamamacuna Jehová Diosta tucui shunguhuan juyajta cuenta japishpami, paipash Jehová Diosta juyai callaringa.

CAITA RURAPANGUI:

• Huahuata ali yachachingapaj ali yuyaita carahuai nishpami Taita Diosta mañana capangui

• Huahua imagutapash yachajuchun munashpaca cutin cutinmi yachachina capangui