LECCIÓN 16
Job runaguca ¿pita carca?
Uz shuti llactapimi Jehová Diosta adoraj Job runaguca causarca. Paica charij, ali alimi carca. Tauca huahuacunatapashmi charirca. Pobre gentecunata, viuda huarmigucunata, taitamamacuna illa huahuacunatapashmi ayudan carca. Shina ali ali cashcamandalla ¿nunca imapash llaquicunata na charina cashcata nita ushapanchichu?
Job na yachajtami Diabloca paita ricujurca. Jehová Diosca Diablotaca: ‘Ñucata sirvij Jobtaca ima pandatapash na ruraj, Taita Diostapash manllaj, nalita ruranamanda anchurishca cajtaca ¿nachu ali ricurcangui?’ nircami. Chaimi Diabloca: Tucui pai charishcacunata cuidajushcamandalla y ashtaca cosascunata carajushcamandalla Jobca canda sirvijun. Pero pai imatalla charishcata quichujpica candaca ñana adorangapaj munangachu nircami. Jehová Diosca: ‘Ricui, pai imatalla charishcacunaca canba maquipimi. Shinapash paitaca ama huañuchinguichu’ nircami. Shinami Jehová Diosca Diablo Jobta llaquichichun saquirca. ¿Imamanda shina llaquichichun saquishcata yachanguichu? Job tucuipi cazunata ali yachaimandami Jehová Diosca shina llaquichichun saquirca.
Diabloca shuj shuj llaquicunahuanmi Jobtaca ninanda llaquichirca. Por ejemplo, Diabloca sabeo nishca runacunata utilizashpami Jobpa huagracunata, burrocunatapash shuachirca. Ninata japichishpapashmi tucuilla llamacunata tucuchirca. Jipaca caldeo nishca runacunahuanmi camellocunatapash shuachirca. Shinallata animalcunata cuidashpa sirvijcunapash huañurca. Jipaca huasi urmashpami Jobpa churicunata y ushicunatapash huañuchirca. Shina pasashcamanda llaquilla cashpapash Jobca Jehová Diosta adoranataca nimamanda na saquircachu.
Diabloca Jobtaca ashtahuanmi llaquichingapaj munarca. Chaimi Jobtaca “chaqui pundamanda, uma coronacaman jatun nali carachahuan chugrichirca”. Chai unguihuanga Jobca ninandami sufrirca. Chai tucui llaquicunata imamanda charishcata na yachashpapash, Jehovata adoranataca na saquircachu. Job shina rurashcamandaca Jehová Diosca ninandami cushijurca.
Jipamanga Diabloca quimsa runacunatami Jobta llaquichichun cacharca. Paicunaca: imapash juchata pacalla rurashcamandami, candaca Taita Dios castigajun ninajurca. Chaimi Jobca: ñucaca ima nalitapash na rurashcanichu nirca. Shinapash Jobca Jehová Diosmi llaquicunamandaca culpata charin, paica ñucahuanga na alichu cashca nishpami pensai callarirca.
Elihú jovenmi paicuna parlajujta upalla uyajushcarca. Jipamanga paica: Cangunaca pandatami ninajunguichi, Jehová Diosca ali alimi can. Jehová shinaca pipash na tianllu, ima horapash nalitaca na ruranllu. Jehová Diosca tucuitami ricujun, gentecuna llaquicunata charijpica paica ayudan nircami.
Jehová Diosca Jobhuan parlashpaca: “Cai pachata ñuca rurajujpica, canga ¿maipita carcangui?”. ¿Imamandata canga ñuca nali cashcata yuyangui? Imamanda llaquicuna japijta na ali yachashpatami shina nijungui nirca. Shina nijpimi Jobca: Pandarishcanimi ima nali nishcatapash perdonahuai. “Ñucaca, parlajtallami canmandaca uyan carcani. Ashtahuangarin cunanga candaca, ñuca ñavihuambachami ricujuni”, canga tucuitami rurai ushangui nirca.
Llaquicuna tucurishca jipaca Jehová Diosca Jobta jambishpami, punda imacunatalla charishcatapash yalita cararca. Shinami Jobca unaita cushilla causarca. Na fácil cajpipash Job tucuipi cazushcamandami Jehová Diosca paitaca bendiciarca. Quiquinga ¿ima pasajpipash Job shina Jehovata sirvishpa catinguicha?
“Quiquingunaca Job imashina aguantashcataca uyashcanguichimi. Job shina aguantashcamanda Jehová Dios paita bendiciashcatapash alimi yachapanguichi” (Santiago 5:11).