LECCIÓN 18
Moisesca casha yura rupajujtami ricurca
Moisés runaguca Madián llactapica 40 huatacunatami causarca. Chai huatacunapica cazarashpa, huahuacunatapashmi charirca. Shuj punllaca Sinaí urcupi llamagucunata michijushpami shuj casha yura rupajujta ricurca. Chai yura ali ricushpaca rupajushpapash na rupashpa tucurijtami Moisesca manllarishpa ricujurca. Moisesca ima pasajujta ricungapaj chai rupajuj yuraman quimirirca. Chaiman quimirijpimi yura ucumanda cashna nijta uyarca: “Moisés, Moisés ama caimanga ashtahuan quimirimuichu. Can churajushca sandaliatapash llujchi. Porque canga sagrado alpapimi shayajungui” nircami. Jehová Diosmi shuj angelta parlachishpa Moisesman shina nijurca.
Moisesca ninanda manllarishpami ñavita taparirca. Cutin cashna nijtami uyarca: “Egiptopi ñuca llacta ninanda sufrijujtaca ricujunimi. Paicunataca egipciocunapa maquimandami salvagrini. Chai llactamandami jatun, ali alpaman apamugrini. Canmi ñucapa llacta israelitacunataca Egiptomanda llujchimugringui” nirca. Chaita uyashpaca Moisesca ¿imashinashi sintirirca?
Moisesca Jehová Diosmanga nircami: ‘Isrealitacuna pita cachamurca nishpa tapujpica ¿imatata nipasha?’. Chaimi Jehová Diosca: ‘Cangunapa punda taitacunapa, Abrahanba, Isaacpa, Jacobpa Taita Dios Jehovami cangunapaman cachamuhuarca nishpa israelitacunamanga villapangui’. Shina nijpimi Moisesca: “Ñuca imata nishcata na cringapaj munajpica ¿imatata rurapasha?” Jehová Diosca Moisesta ayudangapami cashna nirca: ‘Canba maquipi charijushca vara caspita alpaman shitai’. Alpaman shitajpica chai vara caspica culebraman tigrarca, Moisés chai culebrapa chupamanda japijpica cutinmi shuj vara caspiman tigrarca. Chaimi Jehová Diosca, chai milagrota ricushpami ñuca cachamushcata crinajunga nirca.
Shinapash Moisesca: ‘Disculpahuai Jehová Dioslla, pero canda sirvij ñucaca fácil parlaitaca nunca na ushapashcanichu’ nircami. Chaimi Jehová Diosca: ‘Ayudashallami, can imata nina cashcataca ñucami canmanga nisha. Shinallata canda ayudachunbash canba huauqui Aarondami cachasha’ nircami. Moisesca Jehová Dios ayudanata ali yachashpami paipa huarmiguta, paipa huahuacunatapash apashpa Egiptoman rirca.
“Shinapash cangunata paicunapa ñaupaman apajpica, imatata nisha o imashinata nisha nishpaca, na pinarijunachu canguichi. Chai ratopi imata ninata yachachunga Taita Diosllatami ayudanga” (Mateo 10:19).