Jehovami Jeremiastaca villachichun mandarca

Jehová Diosca Judá llactapa profeta cachunga Jeremiastami agllarca. Judá llactapi causaj gentecunaman, nalicunata ruranata saquichun nishpa villachichunmi Jeremiastaca mandarca. Shinapash Jeremiasca Jehová Diostaca: Ñucaca chairalla huambrami capani, shujcunahuan aliguta parlanatapash na yachanichu nircami. Chaimi Jehová Diosca cashna nirca: ‘Canga ama chairalla huambrami cani nijuichu’. ‘Ñucami imata villanatapash mandasha’ nishpa.

Jehová Diosca Jeremiastaca nircami, cai llactamanda ancianocunata tandachishpa paicuna ricujta alpa mangata faquishpa cashna ningui: Jerusalén llactatapash ‘chashnallatami ñutugrin’ nishpa. Jeremías shina rurajta ricushpaca chai llactamanda ancianocunaca ninandami culirarca. Pasjur shuti sacerdotecarin Jeremiasta macashpami, shuj tablón caspipi chaquita y maquitapash canichishpa saquirca. Shina churajpimi Jeremiasca tuta entero na cuyurita ushashpa pacarirca. Cayandi punllami Pasjurca Jeremiastaca cacharirca. Chai jipaca Jeremiasca: Ñana ashtahuan ushanichu, ‘na ashtahuan villashachu’ nircami. Shinapash ¿ciertopachachu ñana villachirca? Na. Jeremiasca aliguta pensarishpami cashna nirca: ‘Ucu tullucamanmi canba shimica, nina rupajunshna ñucapica tiajurca. Ñuca shungupilla charisha yajushpapash, napacha usharcanichu’ nishpa. Shinami Jeremiasca gentecunaman villachishpa catirca.

Tauca huatacuna yalishca jipaca shuj reymi Judá llactataca mandai callarirca. Sacerdotecuna, yanga profetacunapash Jeremías villachishcataca nimamanda na uyanayachinllu carca. Chaimandami reypa jipa mandajcunataca: “Cai runaca, huañuchi tucunapachami” can nirca. Chaimi Jeremiasca: ‘Ima nalitapash na ruraj ñucata huañuchijpica, ñuca yahuarca cangunapa jahuapimi canga. Ñucataca, Mandaj Diosmi chai shimicunata na llullashpa canguna uyajta villachun cachamuhuarca’ nirca. Reypa cati mandajcuna chaita uyashpaca: Cai runaca ‘imamanda huañuchi tucunatapash na charinllu’ nirca.

Jeremiasca villachishpami catirca. Shinapash cai viajeca reypa cati mandajcunaca ninanda culirashpami reytaca cashna nirca, Jeremiasta huañuchinami cangui nishpa. Reyca nircami: imata rurangapaj munashpapash canguna ruraichilla nishpa. Shina nijpimi Jeremiasta japishpa turu junda jatun utujupi huañuchun shitarca. Asha ashami Jeremiasca chaipi pambarijurca.

Chaimi jatun mandajta sirvij Ébed-Mélec shuti runaca reytaca cashna nirca: Canba cati mandajcunaca ‘Jeremiasta, yacuta tandachina jatun utujupi shitachun mandashpaca nalitami rurashca. Chai utujupica huañungami’ nishpa. Chaimi reyca, ‘Ébed-Mélec runatallata cashna nirca. Shina cashpaca, 30 runacunata caimanda pushashpa rilla. Paicunata pushashpa Jeremiasta chai jatun utujumanda llujchigri’ nishpa. Chai jipaca Jeremiasca villachinataca nimamanda na saquircachu. ¿Nachu quiquinbash Jeremías shina cangapaj munapangui?