Ángel Gabrielca Mariahuanmi parlarca

María huarmiguca Galilea llactapa Nazaret pueblopimi causarca. Mariaca Elisabetpa familiami carca. Paica José shuti carpinterohuanmi cazaragrijurca. Elisabetca ñami sucta quillacunata vijsayu cashca carca. Chai punllami ángel Gabrielca Mariapa ñaupapi ricurishpa: “Jehová Diosca ninandami quiquindaca alicachishpa o cushijushpa bendiciajun” nirca. Imata ningapaj munashcataca Mariaca na intindircachu. Chaimi chai angelca: “Quiquinga vijsayu tucushpami, shuj jari huahuaguta ungungui. Paitaca Jesús shutitami churana cangui. Paica importantemi canga. Paitaca jahua cielopi Taita Diospa Churi nishpami rijsinga”. “Paipa Gobiernoca nunca na tucuringachu” nirca.

Shina nijpimi Mariaca: ‘¿Imashinata shuj huahuagutaca charishayari? Ñucaca maijan jarihuanbash nara casarashcanichu’ nirca. Chaimi ángel Gabrielca: ‘Taita Diosca paipa espíritu santotami cachamunga. Paipa poderhuanmi shuj huahuaguta charingui. Canba familia Elizabetpashmi, mayorllagu cashpapash ña vijsayu quidashca. Taita Dios villashca shimicunaca pactaringapachami’ nirca. Chaita uyashpaca Mariaca: “Ñucaca, Jehová Diospa esclavami capani. Quiquin nishcashna ñucapica pactaripachunlla” nirca.

Mariaca Judá llacta urcupi tiaj pueblomanmi Elisabet huarmiguta visitangapaj rirca. María saludajta uyashcandimi Elizabetpa vijsa ucupi huahuaguca cuyurirca. Elizabetca Taita Diospa espíritu santota cachamujpimi: “María tucui huarmicunamandaca canmi ashtahuan yali bendiciai tucushcangui. Canba vijsa ucupi huahuagutapash Taita Dios bendiciapachun. Quiquinga ñuca Señorpa mamami capangui. ¿Imashpata ñucatara visitangapaj shamupashcanguiyari?” nirca. Shina nijpimi Mariaca: Ñucaca tucui shunguhuanmi Diostaca ninanda jatunyachijuni nirca. ‘Mariaca quimsa quillacunata Elisabetpa huasipi causajushpami paipa huasiman tigrarca’.

Maria vijsayu cashcata yachaj chayashpaca Joseca ñana paihuan cazarangapaj munarcachu. Chaimi muscuipi shuj ángel ricurishpa Josetaca: Mariahuan cazaranataca ama manllaichu. Paica ima nalitapash na rurashcachu nirca. Shina nijpimi Joseca Mariahuan cazarashpa paipa huasiman pusharca.