Jesús nacirishcatami angelcunaca villarca

Roma llactata mandaj César Augustomi tucuilla judiocuna paicuna nacirishca llactaman rishpa, paicunapa shuticunata anotachichun mandarca. Chaimi Joseca Mariata pushashpa Belén llactaman rirca. Josepa familiaca Belén llactamandami carca. Mariaca huahuaguta ungunallami carca.

Ña Belén llactaman chayashpa mingarina huasiguta na tarishpami animalcuna shayaj ucupi quedarca. Chaipimi Jesusca nacirirca. Animalcuna micuchun churana jahuapimi Mariaca chai huahuagutaca telaguhuan pillushpa sirichirca.

Belén llacta ladopimi ‘michij runacunaca paicunapa llamacunata cuidashpa pacarinajurca’. “Shinapash na yashcapimi Jehová Diospa shuj angelca ricurirca. Shinallata Jehová Diospa michagumi paicunapa muyundipica ninanda brillajurca. Chaimi ninanda manllarinajurca”. Shinapash chai angelca: ‘Ama manllaichichu, ali villaicunatami cangunamanga villagrini. Porque cunanmi Belén llactapica shuj huahuagu nacirishca. Paica Cristo ñucanchi Señormi can’ nirca. Shina nijujpimi jahua cielomanda ashtaca angelcuna ñapash ricurishpa: “Taita Diosca jahua cielopi alabai tucushca cachun. Y cai alpapi Taita Diospa ñaupapi ali ricurishca gentecunapash tranquilo ali causaiguta charichun” ninajurca. Chai jipaca angelcunaca chingarcallami. Chaita uyashpaca ¿imatata michijcunaca rurarca?

Chai michijcunaca: “Belén pueblopi ima tucushcata ricungapaj ucha jacuchi” ninajurcami. “Chaiman chayashpaca animalcunaman micunata carana pushtupi shuj huahuagu sirijujtami ricurca. Chaipica José y Mariatapashmi ricurca”.

Llamacunata michijcunaman chai ángel imata nishcata villajpica tucuicunami manllarishpa uyanajurca. María huarmiguca chai ángel ima nishcapi pensarishpami nunca na cungarca. Imata ricushcata, imata uyashcatapash Jehová Diosta ninanda agradicishpami llamata michijcunaca pambacunaman tigrarca.