Jehová Diosmi Jesusta cuidarca

Israel llactapi indi llujshijuj ladocunapi causaj gentecunaca estrellacunami ayudaita ushan yanmi carca. Shuj tutaca indi llujshijuj lado llactacunamanda jaricunaca, cielopi shuj estrella ninanda brillashpa cuyurijta ricushpami chai estrellata catirca. Chai estrellaca Jerusalenman chayachunmi ayudarca. Chai jaricunaca cashna tapushpami rinajurca: “Judiocunapa rey tucuna nacirishcatami uyapashcanchi. Paica ¿maipita capan? Paipa ñaupapi cumuringapami shamunajupanchi” nirca.

Jerusalén llactapa rey Herodesca, shuj mushuj rey nacirishcatami uyarca. Chaimandami ninanda preocuparishpa, importante sacerdocunataca: Cristoca ¿maipipachata nacirina carca? nishpa tapurca. Chaimi paicunaca: “Judea llactapi tiaj Belén shuti pueblopimi nacirina can” ninajurca. Chaimi rey Herodesca estrellacunata ricushpa adivinaj runacunataca: Belenman richi, “chai huahuata tarishpaca, ñucaman villangapaj shamunguichi. Ñucapash chaiman rishpa, paipa ñaupapi cumuringapami munapani” nircami.

Chai estrella cutin cuyurijpimi, chai jaricunaca Belén llactacaman catishpa rinajurca. Chai estrellaca huahuagu causajuj pushtupipachami shayarishpa quidarca. Chaipica paipa mama Mariata y Jesustapashmi ricurca. Chaimi chai jaricunaca Jesuspa ñaupapi cumurishpa alicachinajurca. ‘Paicunaca orota, inciensota, mirra nishcatami caranajurca’. Shinapash ¿Jehová Dioschu chai jaricunataca Jesuspaman cacharca? Na. Jehová Diosca na cacharcachu.

Chai tutallatami Jehová Diosca shuj muscuipi Josetaca: “Jatari, huahuagutaca paipa mamandi apashpa Egipto llactapi pacajugri. Ñuca ningacamanmi chaipi quidana cangui. Herodesca chai huahuaguta huañuchingapami ña mascagrijun” nirca. Shina nijpimi, Joseca ‘huahuata mamandi apashpa, chai tutallata Egiptoman rirca’.

Shinallata Jehová Diosca indi llujshimuj lado llactamanda jaricunataca Herodespaman ama tigranguichichu nircami. Chai jaricuna ñana tigramujpimi Herodesca ninanda fiñarirca. Jesusta na tarishpami “Belén pueblopi, chai muyundi tucuilla llactacunapipash, ishcai huatata nara charij, tucuilla jari huahuacunata huañuchigrichun mandarca”. Shinapash Jesusca Egipto llactapi causajuimandaca nima na pasarcachu.

Tiempo yalijpica Herodesca huañurcami. Chaimandami Jehová Diosca cashna Josetaca: “Israel llactaman tigrailla. Huahuata huañuchingapaj munajcunaca, ñami huañushca” nirca. Chaimi Josepash, Mariapash, Jesuspash tigrashpa Nazaret pueblopi causarca.