Jesús 12 huatata charishpaca¿imatata rurarca?

Josepash, Mariapash, Jesushuan paipa caishuj churicunandi, ushicunandimi Nazaret pueblopi causan carca. Joseca paipa familiata mantiningapaj carpintero shina trabajashpapash, Jehovapa Leymandapashmi familiamanga yachachin carca. Joseca paipa familiandimi Diosta adorangapaj templo huasiman rina costumbreta charirca. Shinallata Pascua fiesta punllacuna chayajpipash cada huatami Jerusalenman rin carca.

Jesús ña 12 huatacunata charijpimi, Jerusalenman rinajurca. Jerusalenbica Pascua fiestaman rishca gentecunami junda carca. Chai fiesta tucurijpimi Josepash, Mariapash paicunapa huasiman tigranajurca. Familiacunahuanmi Jesusca rijun yashpami paicunaca cungashca rinajurca. Shinapash Jesusta mascajpica na ricurircachu.

Chaimi Josepash, Mariapash Jerusalenman tigrashpa Jesusta mascanajurca. “Quimsa punllacuna jipaca, Taita Diospa templo huasipimi Jesustaca tarirca. Paica yachachijcunapa chaupipimi paicunata uyashpa, tapuicunata rurashpa tiajushcarca. Jesusta uyanajuj gentecunaca pai alipacha intindijta y alipacha imatapash tigrachijta ricushpami manllarishca uyanajurca”. Shinami paicunaca Jesús Jehovapa Leyta alipacha intindishcata cuenta japirca.

Josepash, Mariapash ninandami preocuparishca carca. Chaimi Mariaca Jesustaca: “Ñuca huahualla, ¿imashpata chashna llaquichinguiyari? Canba taitapash, ñucapash ninanda pinarishpami candaca mascanajushcanchi” nirca. Shinapash Jesusca nircami: “¿Imashpata ñucataca mascanajurcanguichiyari? Ñuca Taitapa huasipi cana cashcataca ¿nachu yacharcanguichi?” nircami.

Jesusca paipa taitamamahuanmi Nazaret puebloman tigrarca. Chaipimi Joseca carpintero shina trabajanata Jesusmanga yachachirca. ¿Imatata yuyangui? Jesús joven cashpaca ¿imashinashi carca? ‘Jesusca viñashpandi, aliguta yachajushpandimi catijurca’. Chaimi Taita Diospash, gentecunapash Jesustaca ashtahuan juyan carca.