Apostolcunaca jarcaicunata charishpapash villachishpami catirca

Shuj suchu runagumi templo huasiman yaicunapi caridadta mañashpa tiajun carca. Shuj chishica Pedrota, Juandapash templo huasiman chayamujta ricushpami cashna nirca: “Imagutallapash carahuaichi” nishpa. Chaimi Pedroca: ‘Ñucaca culquitaca na charipanichu. Pero ñuca ima charishcagutami canmanga caragrini. Jesuspa shutipimi jatarishpa puri nishpa mandani’ nirca. ‘Pedro chai runaguta maquimanda japishpa jatarichijhuanmi puri callarirca’. Chaita ricushpami ashtacacuna Diospi crinajurca.

Chaita ricushpami sacerdotecuna, saduceocunaca ninanda culiranajurca. Chaimi Jatun Juzgadoman apashpa apostolcunataca: ‘¿Cangunaca, pipa poderhuanda chai suchu runataca jambircanguichi?’ nishpa tapunajurca. Shina nijpimi Pedroca: ‘Jesuspa shutipimi cai runagutaca jambircanchi. Chai Jesustami canguna huañuchircanguichi’ nirca. Chaimi sacerdotecunata mandajcunaca cashna caparirca: ‘Pactarallapash, Jesuspa shutipi villachishpa purinajunguichiman’ nirca. Chaimi apostolcunaca: “Ñucanchicunaca imata uyashcata, imata ricushcata parlanataca nimamanda na saquishunllu” nirca.

Ña cacharijpica Pedropash, Juanbash Jesusta caishuj catijcunamanmi ima pasashcata parlangapaj rirca. Ña tucuicuna tandanajushca cashpami: ‘Jehová Dioslla na manllashpa canba Shimita villachingapaj ushaita carahuayari’ nishpa mañanajurca. Chaimi Jehová Diosca gentecunata jambichun y na manllashpa villachichun paipa espíritu santota curca. Chaimandami ashtacacuna Diospi crinajurca. Saduceocunaca apostolcunata ninanda envidiaimandami paicunataca carcelpi churarca. Chai tutaca Jehová Diosca paipa angelta cachashpami cárcel punguta pascashpa, apostolcunataca: ‘Diospa templo huasiman rishpa gentecunaman villachishpa catipaichilla’ nirca.

Cayandi punlla guardiacuna carcelman chayashpaca, apostolcunataca na tarircachu. Chaimi guardiacunaca sacerdotecunamanga: ‘Cárcel punguca vichashca llavishcami cashcarca. Pero punguta pascashpa ricujpica, nipipash na chaipica carcachu. Canguna carcelpi churashca runacunaca, Taita Diospa templo huasipimi gentecunaman yachachinajun’ nirca. Chai jipaca cutinmi apostolcunataca prezu japishpa Sanedrinba ñaupamanmi apashpa rinajurca. Chaipimi sacerdote principalca cashna nishpa tapurca: “¿Nachu cangunataca chai runapa shutipica na yachachijunachu canguichi nishpa mandarcanchi?”. Chaimi Pedroca: “Gentecunata cazunapa randica Taita Diostami pundapica cazuna canchi” nirca.

Sacerdotecunaca ninanda culirashpami apostolcunata huañuchingapaj munarca. Chaimi Gamaliel shuti fariseoca: ‘Taita Dios paicunata ayudajujpica cangunaca na jarcaita ushanguichichu, pactarallapash Taita Diosta fiñachinguichiman’. ¿Ciertopachachu Taita Dioshuan macanajungapaj munanguichi? nirca. Paicunaca chai runa ima nishcatami cazurca. Shinapash apostolcunata nara llujchishpallatami caspicunahuan macashpa cutin ama villachinguichichu nishpa mandarca. Shina llaquichijpipash apostolcunaca na manllashpami templo huasipi yachachishpa, huasin huasin villachishpa catirca.