13 JOSUÉ
Nalishnalla ricurijpipash Jehová Dios mandashcatami cazurca
JOSUECA Jericó llactatami ricujurca. Taita Diosca chai llactata macanajushpa tucuchichunmi mandashcarca. Josueca Moisés ña huañugrijujpi Jehová Dios “shinlli tucushpa, ali yuyaita japingui” nishcatami yarirca (Deut. 31:23). Shinallata chairallami Jehová Diosca cutin Josuemanga: “Shinlli tucungui y ama manllanguichu” nishcarca (Jos. 1:7). Y Josueca na manllaj cashcatami ricuchina tucugrijurca. ¿Imamanda?
Jericó llacta na ashta jatun cashpapash jatun jatun pircacunahuan muyushca, importante llactami carca. Jehová Dios carasha nishca alpacunata japingapaca israelitacunaca chai llactatami primero atacana carca. Shinapash chai jatun jatun pircacuna ucupica ¿imata tiarca? Chaipica jatun nalicunata ruraj gentecunami tiarca. Jehová Diosca Canaán llactapi causaj gentecunamanda Abrahanman parlashpaca: “Amorreocunaca ninan nalicunata rurajcunami can” nishcarcami. Shinallata Jehová Diosca amorreocuna jatun nalicunata rurashcamanda shuj punlla paicunata castigashpa tucuchina cashcatami nirca (Gén. 15:16). Amorreocunaca yanga dioscunata adorajcuna, homosexualcuna, familiapura puñujcuna, animalcunahuan puñujcunami carca. Shinallata templo ucucunapi paicunapa nali, millanai dioscunata adorangapami huainayan carca. Paicunapa huahuacunatapashmi sacrificiotashna carangapaj rupachin carca. Chaimandami amorreocunata castigana punlla chayarca. Amorreocuna chashna jatun nalicunata ruranajushcamandami Jehová Diosca: ‘Chai llactaca chaipi causajcunataca shungu tigrachinshnami shitanga’ nirca (Lev. 18:3, 6, 21-27). Jehová Diospa nishcacunaca ¿imashinata pactarigrijurca?
Jehová Diosca jatun pircacunahuan muyushca Jericó llactata Josué atacachun cushca instrucciongunaca nalishnallami ricurirca
Jehová Diosca Josueta y paipa soldadocunatapashmi utilizagrijurca. Jehová Diosca Canaán llactacunamanda nali gentecunata llujchingapaca Jericó llactamandami callarirca. Chai soldadocunaca Jehová mandashcata cazungapaca listomi carca. Shinapash Jehová Dios Josueman mandashcacunaca nalishnallami uyarirca. Chai llactata jaicata atacachun o pipash ama yaicuchun, ama llujshichun chai llacta canllapi yapa tiempota quidachunga na mandarcachu. Chaipa randica, 6 punllacunata punllapi shuj viajeta chai llactata marchashpa muyuchunmi mandarca. Cutin sacerdotecunaca arca del pactota apashpa, cachucunata huacachishpami marchashpa muyuna carca. 7 punllapica gulpimi cai llactataca 7 viajecaman marchashpa muyuna carca. Chai jipami soldadocunaca shinllita caparina carca.
Josueca ñami guerracunapi macanajushcarca. Chaimandami Jehová Diospa mandashcaca talvez nalishnalla ricurijushcanga. Israelitacuna cai guerrata perdijpica chaishuj cananeocunaca, “israelitacunamanda yali ashtahuan shinllimi canchi” yashpa ¿paicunahuan macanajungapaj munanmanlla carca?
Jehová Diosca paipi confiaita ushashcataca Josuemanga ñami ricuchishcarca. Por ejemplo, Jericó llactata pacalla ricugrichun Josué ishcai jaricunata cachajpica paicunaca chai llactapi causajcuna israelitacunata ninanda manllashcatami yachaj chayarca. Chai jipaca Jehová Diosca río Jordanba yacucunata jarcashpami israelitacuna chaita yalichun ayudarca.
Josueca Jehová Dios imashina paicunata ayudashcata yarishpami Jehová Diospi confiaita ushashcata cuenta japirca. Chaimi na manllashpa Jehová Diosta cazurca. Josueca paipa soldadocunataca Jericó llactata marchashpa muyuchunmi pusharca. Sacerdotecuna cachuta huacachijpipash Jericó llactata difindingapaca pipash na llujshircachu. ‘Chai llactaca tucuilla pungucunatami alipacha vichashca carca’. Cayandi punllapash Jehová Dios mandashcashnami Josueca cutin paipa soldadocunata chai llactata marchashpa muyuchun pusharca. 6 punllacamanmi chaitallata rurarca. Chashnami 7 punlla chayarca.
Chai punllaca Josuepa soldadocunaca 7 viajetami Jericó llactata muyurca. 7 viajeta marchashpa muyushca jipaca Josueca: “Caparichi, porque Jehová Diosmi cangunamanga cai llactata cushca” nircami. Israelitacunaca chai llacta ima pasajta ricungapaca na yapata shuyarcachu. Bibliapica: “[Israelitacuna] shinllita caparijhuanmi, Jericó llactapa muyundi pircacunaca gulpi urmashpa tucurirca” ninmi.
Josué y paipa soldadocunapash Jericó llactaman yaicushpaca Jehová Dios mandashcashnallatami tucui gentecunata, tucui animalcunata huañuchirca. Jehová Diospa ayudahuanga Josuepash, paipa soldadocunapash ashtaca llactacunata, pueblocunatami mishashpa catirca. Shinami Jehová Dios nishcashnaca amorreo gentecuna ninan nalicunata rurashcamandaca ‘castigai tucuna tiempo’ chayarca.
Shinapash Jericó llactapa jatun pircacunamanda shuj asha parteguca na urmarcachu. ¿Imamandata na urmarca? Shinlli feta charij, na manllaj huarmigu chaipi causashcamandami na urmarca. Chaitaca cati capitulopimi ricugripanchi.
Bibliapi ima nijta liipai
¿Imatata nipanguiman?
Josueca ¿imashinata na manllashcataca ricuchirca?
Ashtahuan informacionda mascapai
1. Josueca ¿Bibliamanda ima partegutallashi charishcanga? (w09 1/12 17 párr. 4, nota). A
Dibujo A
2. Israelitacuna Jericó llactata nara marchashpa muyujpillata Jehová Diosca ¿Josué imata rurachunda mandarca? Chai mandashcaca ¿imamandata nalishnalla ricurishcanga? (Jos. 5:2-8; w18.10 17 párrs. 5-7).
3. Israelitacuna Jericó llactata nara mishashpallata pipash ama yaicuchun, ama llujshichunga chai llacta canllapi ricuriashpa yapa tiempotaca na quidarcachu. Chaitaca ¿imashinata yachai ushapanchi? (w15 15/11 13). B
Kennedy, Titus (2023). The Bronze Age Destruction of Jericho, Archaeology, and the Book of Joshua. Accessed via researchgate.net. Licensed under CC BY 4.0
Foto B: Punda tiempopi Jericó llacta tiashca pushtupimi funducunapi grano rupashcata tarirca.
4. Josué 6:26pi Jericó llactamanda parlaj profeciaca ¿imashinata pactarirca? (w98 15/9 21 párr. 8).
Imata yachajushcapi pensaripai
Josueca ¿imamandata Jehovapa promesacunapica confiarca? (Jos. 23:14). Ñucanchicunapash ¿imashinata Josueshnallata Jehovapa promesacunapica confiaita ushapanchi?
Jehovapa organización cushca instrucciongunata cazuchunga ¿imashinata Josuepa ejemploca ayudan? C
Foto C
¿Imashinata Josuepa ejemplota catishpa na manllashcata ricuchita ushapangui?
Ima pasashcapi pensaripai
Cai historiaca Jehová Diosmandaca ¿imatata yachachihuan?
Cai historiaca Jehovapa voluntadhuan y Bibliapa temahuanga ¿imatata ricunata charin?
Josué causarijpica ¿imatata paita tapungapaj munaiman?
Ashtahuan yachajupai
Mayorlla huauquipanicunamanda yachajungapaj, Taita Diospa promesacunapi confiangapaj, shuj huauqui o pani ñucanchita llaquichijpipash Jehová Diosta tucui shunguhuan sirvishpa catingapaca ¿imashinata Josuepa ejemploca ayudan?
Quiquinba huahuacunaman Josuepa causaimanda yachachipai.
“Josué” (ficha de personaje bíblico nishcata jw.org paginapi ricupangui)