14 RAHAB
Paipa llactamanda gentecunapa lado tucunapa randica, Jehovapa ladomi tucurca
JERICÓ llactamanda pircacunapica shuj huasigumi tiarca. Chaipica Rahab huarmimi causarca. Paica huainayashpa trabajaj huarmi o prostitutami carca. Paica paipa ventanamandami “palmera quirucuna tiaj Jericó” juyailla llactata indi cada punlla imashina punchayachijta ricuita usharca (Deut. 34:3). Shinapash Jericó llactata purishpaca gentecuna llaquilla, manllarishca cashcatallami ricuita usharca. Cai llactapi causajcunaca paicunapa llactata mishashpa japichun Jehová Dios israelitacunata ayudanata, shinallata israelitacuna chaita rurajpi paicuna ñalla huañuna cashcatami yacharca.
Israelitacunaca Jericó ladollapimi quidanajurca. 40 huatacuna huashamanga Jehová Diosca faraonda, paipa soldadocunatapash mar Rojopi huañuchishpami israelitacunataca salvashcarca. Shinallata ashalla tiempo huashamanga israelitacuna desiertota purij gentecunalla cashpapash Jehovapa ayudahuanmi ashtaca poderta charij Sehón y Og shuti reycunata mishaita ushashcarca. Cunanga jatun nalicunata rurashcamandami Jehová Diosca Jericó llactapi causajcunataca castigangapaj munarca. Chaimandami israelitacunaca Jericoman shamunajurca.
Rahabca paipa llactapi causajcuna jatun nalicunata ruranajushcataca alimi yacharca. Paipash huainayashpa trabajashcamandami na ali causajurca. Chaimi ashtahuan ali causaiguta charingapaj munashcanga. Shinaca Jehová imata rurashcata uyashpaca manllarinapa randica, shuj esperanzatami chari callarirca. Rahabca Jehová Dios paita sirvijcunata cuidashcata, respetashcatami intindirca. Canaán llactamanda yanga dioscunahuanga nimapi na igualchu carca. Santo, ali Dios cashcata yachashpaca Rahabca Jehová Diospi shinlli fetami chari callarirca.
Shuj tutaca na rijsishca ishcai jaricunami maipi quidanata mascashpa Rahabpa huasiman chayarca. Rahabca paicuna israelitacuna cashcata, Jericó llactata chapangapaj shamushcataca ñapashmi cuenta japirca. Shinapash chai jaricuna picuna cashcataca na Rahabllachu cuenta japirca. Jericomanda reypashmi paicunamandaca ña uyashcarca. Chaimandami paipa sirvijcunata Rahabpaman cachashpa llactata chapangapaj shamushca chai ishcai jaricunata japingapaj paipa huasimanda llujchichun mandarca. Rahab imata decidishpapash paipa causaica ashtacatami cambiaita usharca. Shinaca ¿paipa llactamanda nali gentecunapa lado o Jehovapa ladochu tucugrijurca?
Rahabca na manllashpami Jehovapa lado tucunata decidirca. Llactata chapangapaj shamushca ishcai israelitacunata paipa terrazapi pacashpami reypa sirvijcunataca shuj ñanda cacharca. Reyta sirvijcuna ña rijpica Rahabca paipa huasipa terrazaman rishpami: ‘Cai alpata Jehová Dios quiquingunaman cunataca [...] alimi yachani’ nishpa israelitacunamanga imamanda paicunata pacashcatami villarca. Rahabca israelitacunapa Diospimi ña cri callarishcarca. Shinallata Jericomanda gentecuna israelitacunata ninanda manllashcata villashpami chai ishcai israelitacunataca ashtacata animarca. Ashtahuangarin israelitacuna Jericó llactata tucuchinajujpi paita cuidachunmi rogarca.
Jehovapa lado tucushpa nali causaita saquichunga Rahabtaca ¿imata ayudarca?
Rahabca llactata chapangapaj shamushca ishcai israelitacunatami salvarca. Cutin paicunaca Rahab Jehovapa lado tucushcatami ricurca. Chaimandami Rahabmanga: “Can mañashcataca rurashunmi” nirca. Shinaca Rahabpash, paipa familiapash na huañugrinajurcachu. Llactata chapangapaj shamushca ishcai israelitacunaca Rahabmanga paicuna chaipi cashcata pimanbash ama villachun, paipa ventanamanda shuj puca cabiata huarcuchun, shinallata israelitacuna Jericó llactata atacanajujpi paipa huasimanda pipash ama llujshichunmi mandarca. Shina rurashpami Rahabpash, paipa familiapash na huañuchi tucugrinajurca.
Rahabca paipa ventanapi shuj cabiata huatashpami ishcai israelitacuna pacalla llujshichun ayudarca. Chai jipaca paicuna nishcashnami paipa ventanamanda shuj puca cabiata huatashpa huarcurca. Shinallata llactata chapangapaj shamushca israelitacuna chaipi cashcata, imata ruragrijushcataca pimanbash na villarcachu. Jericó llactamanda gentecuna Rahab imata rurashcata yachaj chayashpaca seguromi manllanaita huañuchinman carca. Chaimi Rahabca na manllaj cashcata ricuchina carca. Chai jipaca ishcai israelitacuna mandashcashnami Rahabca paipa familiatapash paipa huasiman yaicuchirca. Jehová Dios río Jordán yacucunata jarcashpa israelitacuna yalichun ayudajpica Rahabca Jehovapi crishpa shuj ali decisionda japishcataca ashtahuan segurami cashcanga. Israelitacuna Jericó llactata 7 punllacunata marchashpa muyujpica chaipi causaj gentecunaca ninandami manllarishcanga. 7 punlla chayajpica sacerdotecunaca cachucunatami huacachirca. Chaishuj israelitacunapash shinllitami caparirca. Shina rurajpimi Jericó llactapa pircacunaca urmarca. Shinapash Rahabca paipa familiandi paipa huasipi caimandami salvarirca.
Chai guerra tucurishca jipaca llactata chapangapaj shamushca ishcai israelitacunaca Rahabta y paipa familiatapashmi Jericó llactamanda llujchirca. Jericó llactapa pircacunamandaca Rahabpa huasi tiashca pushtullami na urmashcarca. Jipamanga Rahabca israelita tucushpami shuj israelita jarihuan cazarashpa huahuacunata charirca. Ashtaca huatacuna jipamanga paipa miraicunamandaca Jesucristomi llujshirca. Paica tucuicunamanda yalimi na manllaj cashcataca ashtahuan ricuchirca (Mat. 1:5, 16). Shinlli feta charishcamanda, na manllashcamandami Jehová Diosca Rahabtaca ninanda bendiciarca.
Bibliapi ima nijta liipai
¿Imatata nipanguiman?
Rahabca ¿imashinata na manllashcataca ricuchirca?
Ashtahuan informacionda mascapai
1. Jericó llactapica ¿imashinata Rahabpa causaica cashcanga? (w13 1/11 12, 13).
2. Jericó llactata pacalla chapangapaj rishca israelitacuna Rahabhuan puñungapaj na rishcataca ¿imashinata yachapanchi? (it “Prostituta” párr. 16).
3. Rahabca ¿imamandata paipa huasi terrazapi lino nishcacunata asha asha huatashpa alichishca charirca? Lino nishca plantataca ¿imapata utilizan carca? (it “Lino, I” párrs. 2-4). A
Thanks for your interest in my photos/Moment Open via Getty Images
Foto A: Lino nishca plantata tarpushca pamba.
4. Rahab reypa sirvijcunata umachishpaca ¿imamandata imapash nalitaca na rurarca? (w04 1/12 9 párr. 1). B
Dibujo B
Imata yachajushcapi pensaripai
Rahabca paipa nali causaita saquingapaj, israelitacunahuan Jehová Diosta adorangapaca ¿imamandata na manllanata minishtirca? Bibliata estudianajujcunaca ¿imatata paipa ejemplomandaca yachajuita ushan?
Bibliapica “na llullanachu canguichi” nishpami mandan. Shinapash Jehová Diosta sirvijcunapa contracunaca ñucanchi huauquipanicunamanda imatapash villachunmi talvez obligangapaj munanga. Shina pasajpica ¿imatata Rahabpa ejemplomandaca yachajuita ushapanchi? (Prov. 11:13; Ecl. 3:7; Efes. 4:25). C
Foto C
Foto C
¿Imashinata Rahabpa ejemplota catishpa na manllashcata ricuchita ushapangui?
Ima pasashcapi pensaripai
Cai historiaca Jehová Diosmandaca ¿imatata yachachihuan?
Cai historiaca Jehovapa voluntadhuan y Bibliapa temahuanga ¿imatata ricunata charin?
Rahab causarijpica ¿imatata paita tapungapaj munaiman?
Ashtahuan yachajupai
Jehovapa punllapi salvarita ushangapaca Rahabpa historiamandaca ¿imatata yachajupanchi?
“Jehová Dios cai mundota tucuchina punlla chayajpica ¿maipita cana capanchi?” (w09 15/5 6-8)
Quiquinba huahuacunahuan cai historiata ricupai.
“Rahabca paiman cushca instrucciongunatami catin” (ijwis tema 11)