18 GEDEÓN
Na manllashpapash aliguta pensarishpami imatapash rurarca
PIPASH na manllaj cashpaca aliguta pensarishpami imatapash rurana can. Shinami paipillata na yapata confianga o paipa causaitapash na yangamanda peligropi churanga. Y Gedeonga shinami carca. Gedeón causashca tiempopica israelitacunaca cutinmi yanga dioscunata adorai callarishcarca. Chaimandami Jehová Diosca madianitacuna israelitacunapa llactaman yaicushpa llaquichichun saquirca. Israelitacunaca paicunata ninanda manllaimandami alpacunaman trabajangapaca na llujshi ushanajurca. Pero Gedeonga na manllashpami shujcunaman micunaguta carangapaj granota trillashpa catirca. Shinapash aliguta pensarishpami jatun rumipi allashca uvasta saruna pushtupi pacallaguta chaita rurajurca.
Israelitacunaca arripintirishpami Taita Diosta ayudahuai nishpa rogarca. Chaimi callaripica Jehová Diosca imamanda paicunata na cuidashpa catishcata yarichingapaj shuj profetata cacharca. Chai jipaca israelitacunata salvana cashcata villachunmi Gedeonbaman shuj angelta cacharca. Gedeonga chai angelta ciertopacha Jehová cachamushcata yachangapami shuj señalta mañarca. Chaimi chai angelca Taita Diosman cungapaj Gedeón segurashca sacrificiotaca tucuita ninahuan rupachirca. Chai jipaca angelca chingarcallami. Chai tutami Jehová Diosca Gedeondaca Baal yanga diosta adorangapaj paipa taitapa altartapash, shinallata altarpa ladopi tiajuj santocunata adorangapaj poste caspitapash urmachichun mandarca. Chai jipaca Jehovaman shuj altarta rurashpami rupachina ofrendata o sacrificiota cuna carca. Gedeonga tucuitami cazurca. Shinapash paipa taitata, chai llactapi jaricunata manllaimandami pipash ama ricuchun tutapi rurarca. Chaita pacalla rurashpapash Gedeonga na manllashcatami ricuchirca.
Asha tiempo jipaca madianitacunaca amalequitacunahuan, indi llujshimuj ladomanda gentecunahuanbash tandanajushpami israelitacunahuan macanajungapaj ashtaca ashtaca soldadocunata tandachirca. Paicunaca Jezreel pambapica saltamonte jurucunashnami fuyushna jundariarca. Jehovapa espíritu santo Gedeonbaman shamujpica Gedeonga soldadocunata tandachichunmi israelitacunapa huaquin jatun familiacunapaman mensajerocunata cacharca. Gedeonga imatapash aliguta pensarishpa ruraj caimandami Jehová paita ayudanata seguro cangapaca ishcai milagrocunata rurachun mañarca. Jehová Diosca pacientepacha caimandami Gedeón mañashcata rurarca. Chaimi Gedeonga chai tutaca llama cara milmata alpapi saquirca. Jehová Dios chai llama cara milmata serenohuan mutiyachijpipash alpaca chaquishcami quidarca. Cayandi tutapaca Jehová Diosca alpata serenohuan mutiyachijpipash llama cara milmaca chaquishcami quidarca.
Contra soldadocunahuan ricujpica Gedeonba soldadocunaca ashallami carca. Shinapash Jehová Diosca “canba soldadocunaca yaparami can” nircami
Chai ishcai milagrocuna Gedeón ama manllachun ayudashcamandami 32 mil soldadocunahuanlla cashpapash 135 mil contra soldadocunahuan macanajungapaj rirca. Gedeón y paipa soldadocunapash Harod shuti pugyu ladopimi carpacunata shayachirca. Chaipimi Jehová Diosca Gedeondaca: “Yapa soldadocunatami charingui” nirca. Chaimi manllanajuj soldadocunata huasiman cachachun mandarca. Gedeonga 10 mil soldadocunahuanllami quidarca. Shinapash Jehová Diosca: “Yaparami canguichi” nircami. Jipamanga soldadocuna imashina yacuta ufiajta ricuchunmi Jehová Diosca Gedeondaca mandarca. Cungurishpa yacuta ufiaj soldadocunatapash huasiman tigrachunmi mandarca. Cutin ima pasajushcata chapariashpa, maquihuan yacuta japishpa ufiaj soldadocunallami macanajungapaj quidaita usharca. Shinami Gedeonga 300 soldadocunahuanlla quidarca.
Ashalla soldadocunahuan quidashpapash Gedeonga na manllashpami contracunata atacangapaj listo carca. Jehová Diosca paita ayudajushcataca cutinmi ricuchirca. Chaipaca contra soldadocunapaman tuta pacalla richunmi mandarca. Chaiman rishpaca Gedeonga shuj soldado shuj soldadoman shuj muscuita charishcata villajujtami uyarca. Chai muscuica israelitacuna macanajuita mishanatami ricuchijurca. Chaita uyashpaca Gedeonga Taita Diospica ashtahuanmi confiarca. Chaimandami paipa soldadocunapaman tigrashpaca macanajushpa mishangapaca imata rurana cashcata villarca. Paicunamanga: “Ñuca imata rurajta ricushpaca chaitapachami rurana canguichi” nircami. Tutapica Gedeonga paipa soldadocunandimi contracunapa muyundipi shayarirca. Paicunaca funducunata, puntapi ninahuan japichishca caspicunata o michungunata y cachucunatami apanajurca. Gedeón ricuchishca horaspimi cachucunata huacachishpa, funducunata faquishpa: “Jehová Diospa y Gedeonba macanajuimi can” nishpa caparirca. Chashna ninanda bullayajta uyashpa, michunguna ninanda punchayachijta ricushpaca contra soldadocunaca ashtaca ashtaca soldadocuna paicunata atacanajushcatami pensarca. Imata ruranata na atinashpami ninanda manllarirca. Jehová contra soldadocunata paicunapura macanajuchijpimi paicunapurallata huañuchirirca. Más o menos 15 mil soldadocunallami na huañushpa pacajushpa rirca.
Gedeonga chai contra soldadocunataca catishpami rirca. Paicunata mishashpami paicunata ñaupaman pushajcunatapash huañuchirca. Shinallata Jehovapa contracunahuan macanajunajujpi paiman y paipa soldadocunaman micunaguta na carangapaj munashca israelitacunatapashmi castigarca. Jipamanga gentecunaca Gedeón rey tucuchunmi munarca. Pero paica na munarcachu. Chaipa randica, humilde cashcata ricuchishpami: “Jehová Diosmi cangunataca mandanga” nircami. Gedeonga na manllaj, imatapash aliguta pensarishpa ruraj cashcamandami bendiciai tucurca. Chaimandami Gedeón Israel llactapi juez cashca punllacunapica israelitacunaca tranquilo, ali causarca. Shinallata Gedeonga ashtaca huatacunatami causarca. Ashtahuangarin apóstol Pablo shinlli feta charij jaricunamanda, huarmicunamanda parlashpaca Gedeonmandapashmi parlarca (Heb. 11:32).
Bibliapi ima nijta liipai
¿Imatata nipanguiman?
Gedeonga ¿imashinata na manllashcataca ricuchirca?
Ashtahuan informacionda mascapai
1. Soldadoca paipa muscuipica ‘cebadahuan rurashca redondo tandatami’ ricurca. Chai tandaca Gedeonba soldadocunahuan comparangapaca ¿imamandata ali carca? (Juec. 7:13; it “Cebada” párr. 7).
2. 300 cachocunata huacachinajujta uyashpaca ¿imamandata madianitacunaca imata ruranata na atinashpa ninanda manllarirca? (it “Cuerno” párr. 3). A
Foto A: Llama cachocunata huacachishpa shuj shuj tunucunata uyachishpami imata rurana cashcata ricuchin carca.
3. Gedeón y paipa soldadocunapash madianitacunata mishangapaca ¿imatata rurana tucurca? (w04 15/10 16 párrs. 9-10). B
Dibujo B: Gedeonga más o menos 80 kilometrocunatami madianitacunata catishpa rirca. Maitapacha rishcataca na yachapanchichu.
4. Cai historia cierto cashcataca ¿imashinata yachapanchi? (w05 15/4 32).
Imata yachajushcapi pensaripai
Taita Diospa llactapa contracunata mishachun Gedeón ayudashpapash paica humildemi carca. Shinallata shujcunahuan aliguman parlangapami esforzarirca (Juec. 8:1-3). Familiapi taitacunahuan o ancianocunahuan pipash culirajpica ¿imashinata paicunaca Gedeonba ejemplota catita ushan?
¿Ima situaciongunapita na manllaj cashpapash aliguta pensarishpa imatapash rurana tucunman? C
Foto C
¿Imashinata Gedeonba ejemplota catishpa na manllashcata ricuchita ushapangui?
Ima pasashcapi pensaripai
Cai historiaca Jehová Diosmandaca ¿imatata yachachihuan?
Cai historiaca Jehovapa voluntadhuan y Bibliapa temahuanga ¿imatata ricunata charin?
Gedeón causarijpica ¿imatata paita tapungapaj munaiman?
Ashtahuan yachajupai
Shuj mushuj responsabilidadta pactachichun mingajpica ¿imashinata Gedeonba ejemplota catita ushapangui?
“Ali yachaica, na jariyashcacunahuanmi” (w00 1/8 16-18 párrs. 11-15)
Quiquinba huahuacuna Taita Diospi ashtahuan confiachunga cai historiata utilizapai.
“Jehová Diosca Gedeonman fuerzata cushpami ayudan” (ijwis tema 13)