28 ASÁ
Paipa ‘tucui causaipimi Jehová Diostaca’ tucui shunguhuan sirvirca
ETIOPÍA llactamanda ashtaca ashtaca soldadocuna rey Asahuan macanajungapaj Judá llactaman chayajta ricushpaca rey Asaca manllarishcami quidashcanga. Jehová Diosca ashtaca viajecunatami paipa llactataca shuj llactacunahuan macanajuchun cachashcarca. Shinapash cashnapacha ashtaca soldadocunahuanga na macanajushcarcachu. Cai viajeca Etiopía llactamanda soldadocunaca Asapa soldadocunahuan ricujpica cazi el doblemi carca. 1 millón soldadocunami carca. Shinaca rey Asaca chai tucui soldadocunahuan na manllashpa macanajungapaca ¿imatata ruragrijurca?
Asá runaguca ashtaca viajecunatami na manllashcata ricuchishcarca. Judá llactata mandai callarishcamandaca ñami 10 huatacuna yalishcarca. Rey Salomón Jehová Diosta ali adoranata saquishca punllacunamandapachami gentecunaca nali, mapa cosascunata rurashpa causanajushcarca. Shinapash Asá runaguca mandai callarishca punllamandapachami paipa abuelopa taita Davidshnallata Jehová Diospa ñaupapi alita rurangapaj munashcata ricuchirca. Asá runaguca humilde caimandami Odedpa consejota y Odedpa churi Azariaspa consejota uyarca. Paicunaca Jehová Diospa profetacunami carca. Asaca joven cashpapash na manllashpami tucui nali ruraicunata tucuchingapaj esforzarirca. Por ejemplo, yanga dioscunata y chai yanga dioscunata adorangapaj jaripurallata huainayajcunatapashmi tucuillata tucuchirca.
Asá runaguca paipa familiatapashmi nali cosascunata ama rurachun na manllashpa jarcarca. Por ejemplo, paipa abuela Maacá shuti huarmica gentecuna huainayashpa adorachunmi shuj yanga diosta rurashcarca. Chaimandami Asá runaguca paipa familiapa lado tucunapa randica, Jehová Diospa lado tucushpa paipa abuelataca paipa mandana puestomanda anchuchirca. Shinallata paipa rurashca yanga diostapashmi rupachirca. Chaita rurashcamandami Jehová Diosca contento sintirirca. Chaimandami Judá llactapica 10 huatacunata tranquilo, ali causaigu tiarca. Shinapash Etiopía llactamanda ashtaca ashtaca soldadocunami Judá llactahuan macanajungapaj shamunajurca. Chashna pasajujpi Jehová Diosca Asá runaguta ayudangapaca ¿imatata ruragrijurca?
Rey Asaca ashtaca ashtaca contra soldadocunahuanmi macanajuna tucurca. Bibliapica pipash chashna ashtaca soldadocunahuan macanajushcataca cai viajellami parlan
Asá runaguca Judá llactapa altolla pushtupi cashcamandami Etiopía llactamanda ashtaca ashtaca soldadocunataca ricui usharca. Soldadocunata ricushpaca ¿imatata Asaca rurarca? Paica Jehová Diostami tucui shunguhuan cashna nishpa mañarca: “Mandaj Dioslla, ninan ushaita charijta, ushaita na charijta ayudangapajpash, cambaca chashnallatami. Ñucanchita Mandaj Taita Dioslla, ñucanchitapash ayudahuayari. Canda mañashpami, shinlli tucunajupanchi. Cai soldadocunahuan macanajungapaca, cambaj shutipimi shamuparcanchi. Mandaj Dioslla, canmi ñucanchi Taita Dios capangui. Runaca, canda mishaitaca na ushangachu” nishpami mañarca. Asá runagu cashna nishpa mañajujta uyashpaca Jehová Diosca ¿imashinata sintirishcanga? Jehová Diosca ninandami cushijushcanga. Asá runaguca rey Saulpa churi Jonatanshnallatami na manllaj carca. Jonatanbash, Asá runagupash ashalla soldadocunahuan cashpapash Jehová Dios paicunata ayudajpica contracunata mishai ushashcatami ali ali intindirca (1 Sam. 14:6). Shinaca Jehová ñucanchita ayudajpica ñucanchipa contracuna ashtaca ashtaca cashpapash ñucanchitaca nunca na mishai ushangachu.
Asá runaguca paipa soldadocunahuanmi macanajugrirca. Chai macanajuipica Etiopía llactamanda soldadocunahuanga ¿imata tucurca? Bibliapica ninmi: Taita Diospash, paipa soldadocunapashmi “Etiopía llactamanda soldadocunataca misharca” nishpa. Shujllapash na causa quidarcachu.
Chai jipaca Asá runaguca tucuicuna Jehová Diosta adorachunmi animarca. Shinallata shuj llactacunapi causagrishca 10 jatun familiacunamanda ashtaca israelitacunapashmi Jerusalenba templopi Jehová Diosta ali adorai ushangapaj Judá llactaman causangapaj rirca. Asá runaguca tucui Judá llactapi causajcuna Jehová Diostalla sirvishpa causachunmi shuj promesata rurachirca.
Shinapash Asaca jipamanga pandarishpami nali decisiongunata japirca. Por ejemplo, Israel llactamanda rey Judá llactahuan macanajungapaj rijujpica Asá runaguca Jehová Diospa ayudata mascanapa randica, Siria llactamanda reypa ayudatami mascarca. Israel llactamanda reyhuan macanajuchunmi Siria llactamanda reymanga culquita pagarca. Chaita rurashcamandami Asá runagu nalita rurashcata cuenta japichunga Jehová Diosca Hananí shuti profetata cacharca. Shinapash rey Asaca na cazushpa, ninanda culirashpami profeta Hananitaca carcelpi churarca. Shinallata mayoriashca, ungushca cashpapash Jehovapa ayudata mascanapa randica, doctorcunapa ayudatallami mascarca. Asá runaguca asha ashami Jehová Diospi confianata saquishcarca.
Shinapash Jehová Diosca ninanda juyaj, perdonaj Dios cashcatami ricuchirca. Chaimi Bibliapica Asá runagu 41 huatacunata mandashcamanda parlashpaca cashna nin: “Asá shuti runapaj shunguca tucui causaipimi, Mandaj Dioshuan ali carca” nishpa. Asá runagupa ejemploca Jehová Dios paita juyajcunata paipash ninanda juyaj cashcatami yachachin. Shinallata Jehová ñucanchimanda imata rurashcataca nunca na cungana cashcatapashmi yachachin. Cada punllami Jehová Dios ñucanchicunata imashina ayudashpa catijujta ricupanchi. Chaita ricunami na manllashpa ñaupaman catichun ayudan.
Bibliapi ima nijta liipai
1 Reyes 15:8-24
2 Crónicas 14:1–16:14
¿Imatata nipanguiman?
Asaca ¿imashinata na manllashcataca ricuchirca?
Ashtahuan informacionda mascapai
1. “Santocunata adorana poste caspica” ¿maijan huarmi diostata ricuchijurca? Arqueologocunapa tarishcacunaca ¿imashinata Jehová Diosta saquishca israelitacuna chai huarmi diosta adoran cashcata ricuchin? (1 Rey. 15:12, 13; w08 1/6 10 párrs. 1-5). A
Dibujo A: Asá runaguca paipa abuelataca paipa mandana puestomandami anchuchirca. Shinallata yanga diosta adorangapaj paipa abuela rurashca poste caspitapashmi rupachirca.
Dibujo A: Asá runaguca paipa abuelataca paipa mandana puestotami quichurca. Shinallata yanga diosta adorangapaj paipa abuela rurashca poste caspitapashmi rupachirca.
2. Dios ricuchishcata villaj Hananipa churica ¿pita carca? Paica ¿imashinata paipa taitapa ejemplota catishpa na manllaj cashcata ricuchirca? (it “Hananí” núm. 2).
3. Asá shuti runagu pandarishcajpipash Bibliapica ¿imamandata ‘paipa tucui causaipimi Jehová Diostaca tucui shunguhuan sirvirca’ nin? (1 Rey. 15:14; w17.03 19 párrs. 5, 6).
4. Israelitacunaca huañushcacunata rupachina costumbretaca na charircachu. Shinapash Bibliapica ¿imamandata Asá runagu huañujpica “paita alicachishpami ninanda rupachinajurca” nin? (2 Crón. 16:14; w05 1/12 20 párr. 5).
Imata yachajushcapi pensaripai
Asá runaguca Judá llactapi gentecunata Jehová Diosta ali adorachunmi ayudarca. Azariaspa nishca shimicunami chaita rurachun animarca. Ñucanchicunapash ¿imashinata ñucanchi shimicunahuan shujcunata animaita ushapanchi? B
Foto B
Asá runaguca ashtaca ashtaca contra soldadocunahuan macanajushpa mishai ushangapami Jehovapa ayudata mañarca. Cutin ashalla soldadocunahuan macanajuna tucushpaca gentecunapa ayudatami mascarca. Imata rurana cashpapash Jehovapi confianamandaca ¿imatata Asapa ejemplomandaca yachajuita ushapanchi? (Prov. 3:5, 6).
¿Imashinata Asapa ejemplota catishpa na manllashcata ricuchita ushapangui?
Ima pasashcapi pensaripai
Cai historiaca Jehová Diosmandaca ¿imatata yachachihuan?
Cai historiaca Jehovapa voluntadhuan y Bibliapa temahuanga ¿imatata ricunata charin?
Asá causarijpica ¿imatata paita tapungapaj munaiman?
Ashtahuan yachajupai
Jehová Diosta sirvichun na jarcaj pushtupi causashpaca ¿imashinata Asá runagupa ejemplota catishpa tiempota aliguta aprovechai ushapangui?
“Casilla, tranquilo causaita aprovechapashunchi” (w20.09 14-19)
Shinlli jarcaicuna ricurijpipash Jehová Diosta sirvishpa catingapaj Asapa ejemplo imashina ayudajta yachajupai.
‘Canguna imagutapash rurashcamandaca’ shuj bendición tianmi (w12 15/8 8-10)