39 ESTER
“Huañuna cashpapash huañushallami”
SHUJ joven huarmiguca shuj reypa palacioman rishpami rey tiajuj tronoman quimirirca. Reyca chai huarmiguta cayachunga na mandashcarcachu. Chai huarmiguca rey na cayajpipash reypaman rishcamanda talvez paita huañuchichun mandanataca alimi yacharca. Chai joven huarmiguca manllaihuan cashpapash reyhuan parlangapami decidida carca. Chai huarmiguca ¿pita carca? ¿Imamandata reypaman rirca?
Chai huarmiguca Ester shutimi carca. Esterpa taitacunaca pai uchilla huahuagu cajpillatami huañurca. Chaimandami paipa primo Mardoqueoca paipa ushigutashna cuidashpa viñachirca. Mardoqueoca Estermanda ashtaca huatacunahuanmi mayor carca. Ishcandimi Susa llactapi causanajurca. Persa gentecunapa reypashmi chai llactapillata causarca. Y Mardoqueoca chai reypa sirvijmi carca. Esterca viñashpaca ‘juyaillagupacha’ huarmigumi tucurca.
Persia llactamanda rey Asueroca cutinmi shuj huarmihuan cazarangapaj munarca. Chaimandami paipa sirvijcunataca shuj joven soltera, juyailla huarmiguta mascachun cacharca. Paicunaca Ester huarmigu juyaillagupacha cajta ricushpami reypa palacioman aparca. Shinapash reypa sirvijcuna Esterta nara apajpillatami Mardoqueoca Estermanga: “Can judía cashcataca ‘pimanbash na parlanachu cangui’” nishpa mandarca.
Reypa palaciopica “tucuicunami Estertaca ninanda juyan carca”. Estertaca reypa ñaupaman pushangapami 12 quillacunata masajecunahuan, aceitecunahuan, jambicunahuan preparanajurca. Chai jipami Estertaca reypa ñaupaman aparca. Esterca tucuicunata yalimi “reypa ñaupapica ali ricurirca”. Chaimandami reyca ashtaca poderta charij Persia llactapa reina tucuchunga Esterta agllarca. Esterca reina tucushpapash Mardoqueota cazushpami judía cashcataca pimanbash na villarca.
Chai punllacunapica rey Asueroca Hamán shuti runatami paipa cati mandaj cachun agllarca. Hamanga Jehová tucuchisha nishca paipa contra llactacunapuramandami cashcanga. Y Mardoqueoca Jehovata ali sirvij cashcamandami Hamanba ñaupapica na cumurin carca. Chaimandami Hamanga Mardoqueotaca nimamanda na ricunayachin carca. Hamanga Mardoqueohuan ninan culira caimandami rey Asuero mandashca tucui llactacunapi causaj judiocunata huañuchingapaj munarca. Mardoqueoca Hamán chaita rurangapaj munashcata yachaj chayashpaca ninandami llaquirirca. Chaimandami Mardoqueoca Esterpaman shuj mensajerota cachashpa: “Judiocunata salvangapaj rey Asuerohuan parlagripai” nishpa nichun mandarca. Shinapash chaita rurangapaca Esterca na manllashcatami ricuchina carca.
Esterca Mardoqueomanga: “Persacunapa leypi nishcashnaca rey na cayajpillata reypaman rijpica paica ñucata huañuchichunmi mandangapashchari” nircami. Ashtahuangarin rey Asueroca ñapash culiranllami carca. Shinapash Mardoqueoca Estertaca reyhuan na manllashpa parlagrichunmi animarca. Shinallata Estermanga: “Cai llaquimanda Diospa llactata salvangapallatami talvez reina tucurcangui” nircami. Chaimi Esterca na manllashpa: “Huañuna cashpapash huañushallami” nirca. Shinapash Esterca judiocuna quimsa punllacunata paimanda ayunachunllami mañarca. Chai quimsa punllacunaca Esterpash, judiocunapash Ester ama imapash tucuchunga seguromi Jehovataca ninanda mañanajushcanga. Chai jipami Esterca reypaman rirca.
Rey Asueroca Ester palacio patiopi cajta ricushpaca culiranapa randica, paita ama huañuchichunmi mandarca. Jipaca: “¿Imatata munapangui?” nishpami tapurca. Esterca shuj jatun micuita rurashpami reytapash, Hamán runatapash invitangapaj munashcata villarca. Esterca ali yuyaita charij huarmigu cashcamandami Hamán judiocunata huañuchingapaj munajujtaca reymanga na ñapash villarca. Chaipa randica, cayandi punllapash shuj jatun micuita rurashpa reyta y Hamandapash cutin invitangapaj munashcatallami villarca. Shinapash cayandi punllapa jatun micuiman nara rishpallatami Hamanga Mardoqueota huarcuchunga shuj jatun caspita shayachichun mandarca. Pero Hamanga chai jatun caspita shayachichun mandashpa jipaman paillata jatun llaquita charinataca na yacharcachu.
Esterca Taita Diospa llacta ama tucuchi tucuchunga shuj reypa ayudatami mañarca
Caya punllapaca Esterca cutinmi shuj jatun micuita rurarca.Chaipimi rey Asueroca cutin: “¿Imatata mañangapaj munapangui?” nishpa tapurca. Cai viajeca Esterca rey Asuero imata rurachun munashcatami villarca. Respetohuan parlashpami shuj jari paita y tucuilla judiocunatapash tucuchingapaj munashcata villarca. Shinallata Esterca: ‘Na shina llaquipi cashpaca na imatapash nipaimanllu carcani. Shinapash ñucanchita huañuchijpica can jatun reypallatami jatun llaqui capanga’ nircami. Chaita uyashpaca Asueroca manllarishpami: “Cangunata llaquichingapaj munaj runaca ¿pita canyari?” nishpa tapurca. Esterca: ‘Chai millanai nalipacha contra runaca cai Hamán runami can’ nishpami tigrachirca. Reyca ninanda culirashpami Hamanda huañuchichun mandarca. Shina mandajpica Mardoqueota huarcungapaj Hamanllata rurashca jatun caspipillatami Hamandaca huarcurca.
Hamanga persacunapa llactacunapi causaj tucuilla judiocunatami tucuchingapaj munarca. Shinapash paillata y Jehová Diospa y judiocunapa shuj contracunapashmi huañuchi tucurca. Shuj joven huarmigu shinlli feta charishcamanda, na manllaj cashcamandami Jehová Diosca paipa llactataca contracunamanda salvarca.
Bibliapi ima nijta liipai
¿Imatata nipanguiman?
Esterca ¿imashinata na manllashcataca ricuchirca?
Ashtahuan informacionda mascapai
1. Estermanda parlashca historia cierto cashcataca ¿imashinata yachapanchi? (ia 138, recuadro). A
Ungnad, Arthur. “Neubabylonische Privaturkunden aus der Sammlung Amherst.” Archiv für Orientforschung, vol. 19, 1959, pp. 74–82
Foto A: Persia llactamanda cai tablilla nishcapica Marduka o Mardoqueo shutimi escribishca tiajun.
2. Mardoqueoca ¿imamandata Hamanba ñaupapi cumuringapaca na munarca? (ia 131 párr. 18).
3. Diablo y paipa demoniocunapash tucuilla judiocunata tucuchingapami munarca. Chaitaca ¿imashinata yachapanchi? (g02 8/9 7, 8). B
Cube. Lot of Yahali, puru. Neo-Assyrian Clay. (YPM BC 021122). Courtesy of the Peabody Museum, Division of Anthropology, Babylonian Collection, Yale University; peabody.yale.edu
Foto B: Suerteta rurangapami cai dadota utilizan carca.
4. Ester y Mardoqueoca ¿Jehovapa maijan profecía pactarichunda ayudarca? (ia 142, recuadro).
Imata yachajushcapi pensaripai
Esterca Jehovata shuj sirvijcunamanda carupi causashpapash aliguta yuyashpa cazuj joven huarmigu cashcatami ricuchirca. Jovengunaca ¿imatata paimandaca yachajuita ushan?
Rey Asueroca Ester pacienciata charishcamanda, respetota ricuchishcamanda, shinallata honrada cashcamandami paitaca uyarca. Cazarashca cristiana huarmigucunaca ¿imashinata Esterpa ejemplota catita ushan? C
Foto C
¿Imashinata Esterpa ejemplota catishpa na manllashcata ricuchita ushapangui?
Ima pasashcapi pensaripai
Cai historiaca Jehová Diosmandaca ¿imatata yachachihuan?
Cai historiaca Jehovapa voluntadhuan y Bibliapa temahuanga ¿imatata ricunata charin?
Ester causarijpica ¿imatata paita tapungapaj munaiman?
Ashtahuan yachajupai
Esterpa ejemplomanda huahuacuna imatalla yachajui ushashcata cai videopi ricupai.
Huaquin huauquipanigucunaca shuj huauquipanicuna peligropi cajpica ¿imashinata Esterpa ejemplota catishca?
Pacienciata ricuchishcacunapa ejemplomanda yachajupashunchi. Mardoqueo y Esterpa ejemplomanda (3:05)