¿Imamandata huarmigucunaca cusaman sujetarina can?

‘Cusapash paipa huarmitaca umashnami mandajun’ (1 COR. 11:3).

1, 2. a) Jehová Dios churashca autoridadmanda parlashpaca ¿imatata apóstol Pabloca nirca? b) ¿Maijan tapuicunatata cai temapica yachajupashun?

APÓSTOL Pabloca Jehová Dios churashca autoridadmanda parlashpami cashna nirca: ‘Cristoca, tucui jaricunatami umashna mandajun. Cusapash, paipa huarmitaca, umashnami mandajun’ (1 Cor. 11:3). Ñaupa temapica yachajuparcanchimi que Jesusca, Jehová Dios paita umashna mandajushcata intindishcata. Y chaimanda cushijushpa, respetohuan Jehová Diosman sujetarishcata. Shinallata yachajuparcanchimi que jaricunaca, Jesusman sujetarina cashcata. Y imashinami Jesusca gentecunata aliguman, juyaihuan, llaquishpa, paicunata en primer lugar churarca, shinallata jaricunapash shuj gentecunata tratana cashcatami yachajuparcanchi. Shuj gentecunata shina tratana cashpapash, ashtahuanbachaca paicunapa huarmigucunata shina tratana cashcatami yachajuparcanchi.

² Cutin huarmigucunaca ¿pimanda sujetarina can? Apóstol Pabloca nircapashmi: ‘Cusapash paipa huarmitaca umashnami mandajun’. Chai shimicunataca Taita Dios yuyachishpami escribichishca. Shinaca ¿imatata huarmigucunaca chai shimicunamandaca pensana can? ¿Paicunapa cusa na testigo cajpipashchu chai shimicunataca pactachina can? ¿Cusacuna imatapash decidijujpi huarmicuna ni shuj palabrata na nina cashcatachu nijun? Paicunamanda alicunata nichunga ¿imatata huarmigucunaca rurana can?

‘Shuj cumbagutami ruragrini’

3, 4. Familia ucupi Jehová Dios churashca autoridadta respetangapaj esforzarishpaca ¿imashinata cusahuarmicunaca causanga?

³ Jehová Diosmi familia ucupi pi autoridadta charishcata nirca. Adanda rurashca jipaca, Jehová Diosca nircami: ‘Jaripaca pailla causanaca nalichu. Paita ayudashpa causachunmi shuj cumbata ruragrini’. Shina nishca jipami Evata rurarca. Adanbash paita ayudagrijuj cumbaguta ricushpaca ninanda cushijushpami nirca: ‘Cunangarinbash paica ñuca tullumanda rurashca ñuca tullullatami. Ñuca aichamanda rurashca ñuca aichallatami’ can (Gén. 2:18-24). Adán y Evaca ishcandillatami, perfecto huahuacunata charina oportunidadta charirca. Chai huahuacunaca shuj juyailla paraíso alpagupi para siempre cushilla causaita ushana carca.

⁴ Shinapash Adán y Evaca Taita Diostaca na cazurcachu. Chaimi jardín de Edenbi cushilla alipacha causaica chingarirca (Romanos 5:12​ta liipangui). Pero Jehová Diosca, cunangamanmi familia ucupica cusaman autoridadta cushca. Y cunan tiempopi cusahuarmicunapash Jehová Dios churashca autoridadta respetashpaca tranquilo ali, cushillami causaita ushan. Paicunaca imashina Jesús jahua cielopi cashpa Jehová Diosman sujetarishpa tucui tiempo ‘cushijushca causarca’ shinallatami cushilla sintirita ushan (Pro. 8:30). Pero pecadorcuna nacirishca caimandami ni jaripash na paipa huarmitaca perfectamente aliguta ñaupaman pushaita ushan, ni huarmipash na paipa cusamanga perfectamente sujetarita ushan. Shinapash ishcandillata esforzarishpaca, cunan tiempocunapipashmi paicunapa matrimoniopi aliguta causaita ushan.

5. ¿Imamandata cusahuarmicunaca Romanos 12:10​pi shimicunataca aliguta catina can?

⁵ Cusahuarmicuna cushilla, ali causangapaca ‘huauquipurashnami, aliguta juyarina canguichi. Paimi, ñucatapash yali ali yashpami, caishuj chaishuj alicachirina canguichi’ nishca shimicunatami catina can (Rom. 12:10). Shinallata ‘tucuicunahuan aliguta causashpa, caishuj chaishuj llaquirishpami causana canguichi’. ‘Caishujmanda chaishujmanda perdonarinami canguichi’ nishca shimicunatami catina can (Efes. 4:32).

Cusa na Testigo cajpica ¿imatata huarmicunaca rurana can?

6, 7. Cusacuna na Testigo cajpipash huarmicuna cusapa autoridadta respetajpica ¿imata pasanga?

⁶ Huaquin familiacunapica cusa o huarmi pero ashtahuanbachaca cusacunami na Testigo can. Shina cajpica ¿imatata huarmicunaca ruraita ushan? Bibliapica ninmi: ‘Huarmicunapash cangunapa cusataca cazunami canguichi. Shina cazujujta ricushpami, Diospa Shimita na crij cusapash, canguna na villajpillata crij tucunga. Canguna aliguta causashpa cazujujta ricushpami, cusapash cringa’ (1 Ped. 3:1, 2).

⁷ Imashinami Bibliapi ricupanchi, Taita Diosca cusacuna paita na sirvinajujpipash, huarmicuna cusapa autoridadta respetachunmi munan. Shina rurajpica ¿imata pasanga? Huarmicuna aliguta portarijta ricushpaca, talvez cusacunaca pensaringami, imamandashi paica shina portarin nishpa. Shinami paipa huarmigu imata crishcata paipash yachangapaj munanga. Hasta paipashmi huarmigu imata crishcata cri callaringa.

8, 9. Ali portarijpipash cusa nimamanda na intindingapaj munajpica ¿imatata huarmigucunaca ruraita ushan?

⁸ Cutin cusacuna nimamanda na intindingapaj munajpica ¿imatata rurana can? Bibliapica huarmigucunataca ninmi, más que difícil y shinlli shinlli cajpipash juyashpami catina canguichi nishpa.  1 Corintios 13:4​pica “juyaita charishpaca, llaquita apanllami” ninmi. Shina nishpaca shujcuna imapi pandarishcata aguantanatami shina nijun. Chaimi huarmigucunaca juyaihuan ‘na ñapash fiñarishpa’ pacienciahuan, shinallata ‘na jariyashpa, ali shunguhuan’ aguantana can (Efes. 4:2). Jehová Diospa espíritu santo ayudajpimi, cusa na intindingapaj munajpipash, Jehová Dios munashcashna aliguta portari ushanga.

⁹ Apóstol Pabloca “Taita Dios poderta cujpimi, ñucaca tucui cosascunata mishangapaj fuerzata charipani” nirca (Filip. 4:13, Traducción del Nuevo Mundo [TNM]). Huarmigupash apóstol Pabloshnallatami na rurai ushanalla cosascunataca Taita Diospa espíritu santopa ayudahuan ruraita ushanga. Por ejemplo. Si paipa cusa groserota tratajpica, randi desquitaringapami munanga. Pero Bibliapica na chaitaca ninllu. Sino tucuicunatami nin: “Cangunata nalita rurajpipash, na chashnallata tigrachinachu canguichi”. Porque escribishca shimicunapica Jehová Diosca nijunmi: “Ñucami llaquichisha. Ñucami, paicunaman imatapash tigrachisha” nishpa (Rom. 12:17-19). Ashtahuangarin ninmi: ‘Cangunata nalita rurashcamanda, maijanbash ama chashnallata tigrachijuchunmi ricuriana canguichi. Ashtahuangarin caishuj chaishuj, tucuicunaman alitalla rurashpami catina canguichi’ (1 Tes. 5:15). Taita Diospa espíritu santoca ñucanchicuna imata na rurai ushashcata rurachunmi ayudanga. Chaimandami Jehová Diostaca espíritu santota carahuai nishpa mañariana can.

10. Shujcuna nali tratajpi y nalicunata nijpipash ¿imatata Jesusca rurarca?

¹⁰ Jesusca shuj alipacha ejemplotami ñucanchimanga saquirca. Shujcuna nali tratajpi y nalicunata nijpipash ¿imatata Jesusca rurarca? 1 Pedro 2:23​pica ninmi: “Ima llaquipash japishpaca alimi canman nijpipash, paica chashnallataca na tigrachircachu. Llaquichi tucujushpapash, paica ñucapash llaquichishami nishpaca na tigrachircachu. Ashtahuangarin [alita] ruraj Diosmanmi, tucuita mingarca”. Bibliapica Jesuspa discipulocunataca tucuicunatami Jesuspa ejemplota catichun animan. Y shujcuna imata ruranajujpipash, chaicunamanda ama preocuparichunmi animan. Ashtahuangarin ‘caishujhuan chaishujhuan llaquirishpami, nalita rurajpipash na chashnallata tigrachishpa’ shinllita rimajpipash ‘na chashnallata tigrachina canguichi’ ninmi (1 Ped. 3:8, 9).

¿Huarmicunaca ni shuj palabratachu na nina can?

11. Jehová Diosca ¿ima responsabilidadtata Jesusta catij huarmigucunamanga cushca?

¹¹ Cusapa autoridadta respetashcamandaca ¿huarmicuna familia ucupi y shuj cosascunapipash ni shuj palabratallapash na ninatachu nijun? Na chaitaca nijunllu. Jehová Diosca tanto jaricunamanbash como huarmicunamanbashmi chai responsabilidadtallata cun. Por ejemplo. 144 milcunacunaca Cristopa autoridadta respetashpami reycunashna, sacerdotecunashna jahua cielomanda mandanga. Chai 144 milcunapurapica tanto jaricunapash como huarmicunapashmi can (Gál. 3:26-29). Imashinami ricupanchi, Jehová Diosca shuj importante responsabilidadtami huarmigucunamanga paipa organizacionbi cushca.

12, 13. ¿Imashinata yachapanchi punda tiempocunapica huarmigucunapash villachij cashcata?

¹² Punda tiempo huarmigucunatapash yaripashunchi. Paicunapash Taita Dios imata villachun nishcatami villan carca. Joel 2:28, 29​pica Jehová Diosca nircami: ‘Ñuca espiritutami talinshna tucui gentecunaman cachamusha. Shina cachamujpimi, cangunapa churicunapash, ushicunapash ñucamanda villanajunga. Sirvishpa causaj jaricunamanbash, huarmicunamanbashmi, ñuca espirituta talinshna cachamusha’.

¹³ Año 33​pica Jerusalén llactapi Pentecostés Fiestapimi Jesuspa más o menos 120 discipulocunaca, shuj huasi jahua cuartopi tandanajurca. Chaipica tanto jaricunapash como huarmicunapashmi carca. Chaipimi Jehová Diosca paipa espiritu santota tucuicunaman curca. Apóstol Pedroca chaipi caj jaricunapi y huarmicunapimi cumplirin nishpami profeta Joelpa shimicunata ripitishpa cashna nirca: ‘Cashna tucunataca, Dios ima nishcata villaj Joelmi cashna nishca: “Taita Diosca, cashnami nijun: Tucuri punllacunapica, tucuicunamanmi ñuca espiritutaca talinshna cachamusha. Shina cachamujpimi, cangunapa churicunapash, ushicunapash ñucamandaca villanajunga. Ñucata sirvij jaricunamanbash, huarmicunamanbashmi ñuca espirituta talinshna cachamusha. Shina cachamujpimi, ñucamanda villanajunga”’ nirca (Hech. 2:16-18).

14. Apostolcunapa punllacunapi ali villaicuna mirachunga ¿imatata huarmigucunaca rurarca?

¹⁴ Apostolcunapa punllacunapica, ali villaicuna tucui ladocunapi mirachunmi huarmigucunaca ninanda ayudarca. Paicunami Taita Diospa Gobiernomanda ali villaicunataca predicarca y chai obrata ayudangapapashmi shuj shuj cosascunata rurarca (Luc. 8:1-3). Por ejemplo carta a los Romanospica, apóstol Pabloca Febe panigumandami parlan. ‘Paica, Cencreas shuti pueblopi tandanajuj crijcunataca aligutami ayudarca’ nircami. Ashtahuangarin, paita alipacha ayudanajuj huauquicunaman saludocunata cachashpaca, ‘Trifena shuti y Trifosa shuti panigucunaca Jesuspa’ obrataca ‘aligutapachami ruranajun’ nircami. Y chai jipapash ñucanchi juyashca Pérsida shuti panigutapash saludapanguichi. ‘Paipashmi Jesuspajtaca ninanda aligutapacha rurajurca’ nircami (Rom. 16:1, 12).

15. Cunan punllacunapi ali villaigucuna mirachunga ¿imashinata huarmigucunaca ayudanajun?

¹⁵ Cunanbica más de 7 millón Testigocunami ali villaicunataca predicanajun. Chaicunapurapica, shuj shuj edadta charij ashtaca huarmigucunapashmi predicanajun (Mat. 24:14). Ashtaca panigucunaca precursoracunami can. Shujcunaca misioneracuna o betelitacunami can. Rey Davidca nircami: ‘Imata cashpapash, Jatun Diosllatami villachijurca. Ali villaitaca, ashtaca huarmicunami villanajurca’ (Sal. 68:11). Chai shimicunaca ciertomi can. Jehová Diosca huarmigucuna ali villaicunata predicashpa, paipa voluntadta pactachinajujpimi paicunataca ninanda valichishpa ricun. Shinaca, Jehová Dios churashca autoridadta respetanami can nishpaca, huarmicuna ni shuj palabrata na nina cashcataca na nijunllu.

Ishcai huarmigucunaca imata pensashcatami nirca

16, 17. Huarmigucunaca ¿imatata Sarapa ejemplomandaca yachajuita ushan?

¹⁶ Shinaca, huarmigucunamanbash jatun responsabilidadcunata Jehová Dios cujpica ¿ñachu cusacunapash nara importante decisiongunata agllashpallata huarmigucunahuanra parlarina ali canman? Bibliapica tauca huarmigucuna imata pensashcata paicunapa cusaman nishcatami nin. Shinallata cusacuna na imatapash nijpillata, paicunallata aliguta pensarishpa imatapash rurashca huarmigucunamandapashmi Bibliapica parlan. Huaquin ejemplocunata ricupashunchi.

¹⁷ Saraca cutin cutinmi paipa cusa Abrahandaca, paipa chaishuj huarmitaca churindi huasimanda llujchishpa cachai, paicunaca nimata na respetanllu nirca. Shina nijpica Abrahanga Sara imata nijta na gushtashpami ‘llaquillapacha’ carca. Pero Jehová Diosca na Abrahanshna pensarcachu. Chaimi Abrahandaca nirca: ‘Chai huahuamandapash, canda sirvij huarmimandapash, ama ninanda llaquirichu. Sara huarmi tucui imata nishcata rurailla’ (Gén. 21:8-12). Abrahanga Jehová Diosta cazushpami, Sara imata nishcata uyarca.

18. Abigailca ¿imatata rurarca?

¹⁸ Cunanga Abigailmanda parlapashunchi. Abigailpa cusaca charij charijmi carca. Nabal shutimi carca. Davidca rey Saúl envidiashpa catiriajuj tiempopimi paipa soldadocunandi Nabal causajuj ladollapi causangapaj rirca. Ni shuj llamagutallapash na carahuai nishpami Davidca Nabalpa llamagucunata ama imapash pasachun cuidarian carca. Pero Nabalca “shinlli shungu, nalitalla ruraj runami carca”. Chaimi asha micunaguta carahuai nishpa David paipa soldadocunata cachajpica, soldadocunataca ‘rimashpa’ tigrachirca. Nabalca ‘jatun nalimi’ carca. ‘Nabal runahuanga pipash na parlaita ushanllu’ carca. Shinaca Davidpa soldadocunahuan ima pasashcata yachashpaca ¿imatata Abigailca rurarca? Paica cusamanbash na villashpami ‘uchalla [200] tandata, ishcai cara muchila vinota, cusashca [5] llamata, chaupi quintal camllashca granota, uvasta rurashca [100] tortillata, chaquishca jigosta rurashca [200] tandata japishpa’ Davidman y paipa soldadocunaman cungapaj rirca. ¿Abigailca alitachu rurarca? Jipaman ima pasashcata ricushpami, Abigail alita rurashcataca yachapanchi. Porque Bibliapica ninmi, ‘Mandaj Diosllata nanaita cujpimi, Nabalca huañurca’. Y chai jipallami Davidca Abigailhuan cazararca (1 Sam. 25:3, 14-19, 23-25, 38-42).

“Mandaj Diosta manllaj huarmimari, alicachi tucunga”

19, 20. Shujcunapa ñaupapi ali ricurij huarmigucuna cangapaca ¿imatata rurana can?

¹⁹ Bibliapica, Jehová Dios imata mandashcata ruraj huarmicunamandaca alicunatami parlan. Proverbios libropica ‘ali huarmiguca punchapamba juyailla rumicunatapash yalipachami’ can ninmi. Ashtahuangarin ninmi: ‘Paipa cusapash, tucui shungumi paita yariashpa causan. Paihuanga, imagupash na illa causanllu. Chai huarmiguca, llaquichinapa randica, alitallami paipa tucui causaipi rurashpa causan. Paica, alipacha yachajushca cashpami, imagutapash riman. Llaquishpa causanatami yachachishpa mandan. Huasipica, imagupash ali cachunmi ricuriajun. Paica, na yanga micushpalla causanllu. Paipa huahuacuna jatarishpapash, cushijushcami cangui ninajunmi. Cusapash alicachinmi’ ninmi (Prov. 31:10-12, 26-28).

²⁰ Shujcunapa ñaupapi ali ricurij huarmigucuna cangapaca ¿imatata rurana can? Proverbios 31:30​pica ninmi: “Juyailla ñavi cashpapash umachinllami. Juyaillagu cashpapash yangallami. Ashtahuangarin Mandaj Diosta manllaj huarmimari, alicachi tucunga”. Jehová Diosta manllashpa causaj huarmiguca paipa cusagu paita umashna mandajushcamandami ali modos tucui shunguhuan cazun. Bibliapica ‘Cristomi tucui jaricunata umashna mandajun. Cusapash, paipaj huarmitaca, umashnami mandajun. Taita Diospash, Cristotaca umashnami mandajun’ nin (1 Cor. 11:3).

Taita Dios carashcataca agradicinami can

21, 22. a) Cusahuarmicunaca ¿imacunamandallata Jehová Diostaca agradicin? b) Jehová Dios imata mandashcata pactachingapaca ¿imatata cusahuarmicunaca rurana can? (Recuadrota ricupangui).

²¹ Jehovata sirvij cusahuarmicunaca Jehová Dios matrimoniota churashcamandami paitaca ninanda agradicin. Paicunaca ishcandi igual causai ushashcamanda y ashtahuanbachaca ishcandi Jehová Diosta sirvita ushashcamandami ninanda agradicin (Rut 1:9; Miq. 6:8). Jehová Diosca pai matrimoniota callarichishcamandami cusahuarmicuna aliguta causangapaj imata rurana cashcataca ali yachan. Chaimi cusahuarmicunaca Jehová Dios imata nishcata tucuipi cazushpa causana can. Shina rurashpami cusahuarmicunaca cai mundopi ashtaca problemacuna tiajpipash ‘Mandaj Dios cushijuita cushcamandaca ushaita charinga’ (Neh. 8:10).

²² Ali cusaca paipa huarmiguta umashna mandashpapash, pai juyarinshna juyashcamandami paipa huarmigutaca juyaihuan y consideracionhuan tratan. Cutin Jehovata sirvij huarmiguca paipa cusata apoyanata yachan y respetashcatapashmi ricuchin. Shina rurajpimi cusapash paitaca ashtahuan juyan. Cusahuarmicunaca ishcandillata ali cusa ali huarmi cangapaj esforzarishpami Jehová Diostaca alipi saquinga.

¿Imatata nipanguiman?

• Familia ucupi Jehová Dios churashca autoridadta respetashpaca ¿imatata rurana can?

• ¿Imamandata cusahuarmicunaca paicunapura respetarina can?

• Testigo huarmica ¿imashinata paipa na Testigo cusataca tratana can?

• Cusaca ¿imamandata nara importante decisiongunata agllashpallata huarmiguhuanra parlarina can?

[Recuadrota ricupangui]

¿Imamandata Jehová Dios churashca autoridadtaca respetana capanchi?

Angelcunatapash y gentecunatapash beneficiangapami Jehová Diosca autoridadta churashca. Chai autoridadta Jehová Dios churashcamandami gentecunaca paicunallata decidishpa Jehová Diostaca unido y cushilla sirvita ushanga (Sal. 133:1).

Ungidocunaca Jesucristo paicunapa umashna cashcataca yaipimi charin (Efes. 1:22, 23). Jesusca paipa Taitapa autoridadta tucui shunguhuan respetaimandami jipa punllacunapica ‘tucuita cazuchijuchun churaj Diosta cazujunga’. Shinami ‘Taita Dioslla tucui imatapash tucuipi cazuchijunga’ (1 Cor. 15:27, 28). Chaimi Jehová Diosta sirvijcunaca congregacionbi y familiapi Jehová Dios churashca autoridadta cazungapaj esforzarin (1 Cor. 11:3; Heb. 13:17). Shina rurashpami Jehová Diospa ñaupapipash ali ricurin y paipa bendiciongunatapash chasquin (Is. 48:17).

[Fotota ricupangui]

Jehová Diosta mañashpami huarmigucunaca ali cualidadcunata ricuchita ushan

[Fotota ricupangui]

Taita Diosca paipa Gobiernopa obrata apoyaj huarmigucunataca ninandami valichin