Ñucanchi agllashca diversiongunaca ¿alichu can?

“Taita Diospa ñaupapi ali cajta o nali cajtaca siempremi yaipi cana capanguichi” (EFE. 5:10, Traducción del Nuevo Mundo, [TNM]).

1, 2. a) ¿Maijan textocunata ricushpata nipanchiman, Jehová Diosca ñucanchicuna cushilla causachunmi munan nishpa? b) Imagutapash rurachun tiempoguta Jehová Dios carashcamandaca ¿imatata chai tiempopica rurana capanchi?

BIBLIAPA tauca textocunapi nishca shinaca, Taita Diosca ñucanchicuna causaimandalla causachunga na munanllu. Sino cushijushpa causachunmi munan. Por ejemplo, Salmo 104:​14, 15​pica ninmi, Taita Diosmi “cai alpapi micunataca llujchin. Gentecunapa shungupi cushichij vinotapash, ñavita punchayachij aceitetapash, runa micushpa causana micunatapashmi llujchin” ninmi. Taita Diosca ñucanchicuna micuchunmi granogucunata fucuchin, aceiteguta y vinotapash caran. Vinoca saludpa ali cashca jahuapash ‘gentecunapa shungutapashmi cushichin’ (Ecl. 9:7; 10:19). Shinaca Jehová Diosca gentecuna cushilla causachunmi munan. Chaimi ñucanchitaca ‘cushichin’ (Hech. 14:​16, 17).

² Shinaca, divertirishpa samangapaj huaquinbi asha tiempoguta separashpaca, Jehová Diosta sirvijcunaca na mal sintirinachu can. Por ejemplo, ‘alasyu animalgucunata ricungapaj’ shinallata ‘lirio sisagucunata pambapi viñashcata ricungapaj’ tiempota llujchinaca alimi can. Porque shinami gentecunaca fuerzata japin y paicunallatapash ali sintirin (Mat. 6:​26, 28; Sal. 8:​3, 4). Cushilla y sano causanaca ‘Taita Dios cushca’ regalomi can (Ecl. 3:​12, 13). Jehová Diosca ñucanchicuna imagutapash rurachunmi asha tiempogutapash ñucanchimanga carashca. Chaimandami libre cashca tiempopica Taita Dios gushtashca cosascunata rurana capanchi.a

Na tucuita rurangapachu libre capanchi

3. ¿Imamandata diversiongunapipash shuj shuj gustocunata charishcataca intindina capanchi?

³ Cristianocunaca cada unomi ñucanchi libre cashca tiempopi imata ruranataca decidita ushapanchi. Shina cashpapash, siempremi imatalla rurai ushanata, maicamanlla imatapash rurana cashcata o shuj límite tiashcata yachapanchi. Y na yapa exigente caj cristianocunaca chaicunataca alimi intindin. Diversiongunataca micunahuan comparapashun. Huaquin llactacunapica shuj micunataca gushtutami micun. Pero chai micunatallatami shuj llactacunapica na gushtashpa na micunayachin. Diversiongunapash shinallatami can. Huaquin llactacunapi cristianocunaca shuj diversionda gushtashpami chai diversionda agllan. Pero shuj llactacunapi cristianocunaca chai diversiondaca na gushtashpami shuj diversionda agllan. Huaquinbica chai llactapillata causashpapashmi chai diversiondallataca na gushtan. Huaquingunaca paicuna gushtashca sillonbi tiarishpa, shuj ali librota liinatami gushtan. Pero shujcunapaca librota liishpa tiajunaca aburridomi can. Cutin shujcunaca bicicletata manejashpa campoman rinatami gushtan. Pero shujcunaca chaica yapa shaijushcami can ninmi. Imashinami ricupanchi, gulpicunallatami intindina capanchi que tanto micunapipash como diversiongunapipash gentecunaca shuj shuj gustocunata charishcata (Rom. 14:​2-4).

4. ¿Imamandata diversiongunata agllajushpaca shuj límite tiashcataca yaipi charina capanchi? Shuj ejemplota churapai.

⁴ Cada uno decidita ushashpapash nali ruraicunataca na agllanachu capanchi. Cutin micunapi pensaripashun. ¿Ñucanchica gushtashca micunata agllaita ushashcamandallachu huaglishca micunata agllanchiman? ¿Nachu shina rurashpaca na aliguta pensarishcata ricuchinajunchiman? ¿Nachu ashtahuangarin ñucanchi saludta peligropi churanajunchiman? Shinallata, aunque shuj shuj diversionguna o ashtaca diversionguna tiajpipash, yahuarsapa macanajujta ricuchij diversiongunamanda, jarihuan huarmihuan huainayanajujta ricuchij diversiongunamanda o shuj peligroso diversiongunamandaca jarcarinchimi. Porque chai diversiongunaca Jehová Dios ima pensashcataca na valichishpami ladoman saquin. Ñucanchi sano cachun o espiritualmente ali cachunbash na ayudanllu, sino peligropimi churan. Shinaca shuj límite tiajtaca yaipimi cana capanchi. Chaimi ñucanchi gushtashca diversionguna ali cajta o nali cajtaca pundatallata ña yachana capanchi (Efe. 5:10). Chaipaca ¿imatata rurana capanchi? Ricupashun.

5. Ñucanchi gushtashca diversionguna Jehová Diospa ricuipi ali cajta o nali cajta yachangapaca ¿imatata rurai ushapanchi?

⁵ Jehová Diospa ñaupapi ali ricurij diversiongunallami ñucanchitaca beneficianga. Pero ñucanchi gushtashca diversión Jehová Diospa ricuipi ali cashcata o nali cashcataca ¿imashinata yachai ushanchi? (Sal. 86:11). Chaipaca quimsa tapuicunatami rurana capanchi. 1) Chai diversionda agllashpaca ¿imatallata ruragrini? 2) ¿Ima horata ruragrini? 3) ¿Picunahuanda tandanajugrini? nishpa. Shinaca shugu shugu yachajupashunchi.

Cai diversionda agllashpaca ¿imatallata ruragrini?

6. ¿Maijan diversiongunatata rechazanchi y imamandata rechazanchi?

⁶ Shuj diversionda agllagrijushpaca primeroca pensarinami canchi “ñuca gushtashca diversionga ¿imashinata can? ¿Imacunatallata ruran? Chai tapuicunataca yaipimi charina capanchi. Porque Taita Diosta sirvijcunapaca ishcai clase diversiongunallami tian. ¿Maijanda can? Shujca nimamanda na rurana diversiongunami can. Cutin chaishujca concienciapi ali sintirinata ricushpa agllana diversiongunami can. Shinaca nimamanda na rurana diversiongunaca ¿maijanda can? Taita Dios imata mandajta o imata pensajta na valichishpa ladoman saquij diversiongunami can (1 Juan 5:19). Cai nali mundopica, millanaita jarihuan huarmihuan huainayanata, demoniocunata, jaripurallata huainayanata, pornografiata, yahuarsapa macanajunata y shuj shuj nali ruraicunatapashmi ashtaca ashtaca gentecuna ricunata yachan. Pero Bibliapica chai ruraicunaca nimamanda na alichu can ninmi. Chaimandami cristianocunaca chai ruraicunataca totalmente rechazanchi (1 Cor. 6:​9, 10; Apocalipsis 21:​8​ta liipangui). Maijan llactapi cashpa o maipi cashpapash chai ruraicunahuanga nimapi na chapurinachu capanchi. Shinami, ‘nalita ruranataca na ricunayachinachu’ canguichi nishpa Jehová Dios mandashcataca cazunajunchi (Rom. 12:9; 1 Juan 1:​5, 6).

7, 8. ¿Imashinata shuj diversión Jehová Diospa ñaupapi ali cashcata o nali cashcataca yachai ushapanchi? Shuj ejemplota churapai.

⁷ Cunanga segunda clase diversiongunamanda parlapashunchi. Chai diversiongunaca ¿maijanda can? Bibliapica huaquin diversiongunamandaca na directamente imatapash ninllu. Chaimi Jehová Dios imata pensajta intindishpa chai diversionguna ñucanchipa ali cajta o nali cajtaca ricuna capanchi (Pro. 4:​10, 11). Shinami maijan diversionda agllashpapash ñucanchi concienciapi ali sintirinata ricushpa agllashun (Gál. 6:5; 1 Tim. 1:19). Pero aliguta agllachunga ¿imata ayudanga? Cutin micunapi pensaripashun. Na rijsishca micunata micugrijushpaca ¿nachu primeroca imata can, imacunatallata churaparcangui nishpa tapunata yachanchi? Shinallata nara shuj diversionda agllashpallatami chai diversión imashina cajta, imacunatalla rurajtaca ali yachana capanchi (Efe. 5:17).

⁸ Shuj ejemplota ricupashun. Huaquin deportecunataca alipachami can yashpami gushtanchi. Chaica normalmi can. Pero si ñucanchicuna peligropi canata gushtaimanda, macanajuipi gananata gushtaimanda, bulla bulla fiestacunata gushtaimanda o hasta ñucanchi llactata juyaimanda chai diversiongunata agllashpaca ¿alichu canman? Cada unomi, ñucanchi shungupi imata gushtashcataca aliguta pensarina capanchi. Talvezpashchari Jehová Dios na gushtashca cosascunata ñucanchica alimi can yanchi. O juyarinami canguichi, tranquilomi cana canguichi nishpa predicajushca jahuapash juyarinata, ali causanata na yachachij cosascunatachari ñucanchi shungupica gushtanchi. Shina cajpica chai diversiongunaca nalimi cashca yashpami alejarina canchi (Is. 61:1; Gál. 5:​19-21). Pero si chai diversión Jehová Dios imata mandashcata na ladoman saquijujpi, chai diversionda agllashpaca ali diversionda agllaimandami ali sintirishpa cutin fuerzata japishun (Gál. 5:​22, 23; Filipenses 4:​8​ta liipangui).

¿Ima horata ruragrini?

9. Cai diversiondaca ¿ima horata ruragrini? nishca tapuipi pensarishpaca ¿imatata ricuchipanchi?

⁹ Shinallata “¿ima horata ruragrini?” nishpami tapurina capanchi. Shuj diversionda agllagrijushpaca tanto ima hora chai diversionda ruragrijujtapash como mashna tiempota chai diversionbi yalinatapashmi ricuna capangui. Primeroca chai diversionda agllashpa imatalla ruragrijushcatami pensarina caparcanchi. Imatalla ruragrijushcata pensarishpami ima gustocunata charishcata, shinallata ñucanchi ricuipi ima ali cajta, ima nali cajta ricuchipanchi. Cutin cati tapuipica, ima hora ruragrijushcatami pensarina caparcanchi. Shina pensarishpaca, ñucanchipa ima ashtahuan importante cashcatami ricuchipanchi. Shinaca diversionguna ñucanchi causaipi ama yapa importante cachunga ¿imatata rurana capanchi?

10, 11. Mashna tiempota divertirinata yachachunga ¿imashinata Mateo 6:33​ca ayudan?

¹⁰ Jesusca nircami: ‘Canba Jatun Taita Diostaca, tucui shunguhuan, tucui almahuan, tucui yuyaihuan, canba tucui ushaihuanbash juyangui’ (Mar. 12:30). ¿Imashinata Jehová Diosta juyana ashtahuan importante cashcataca ricuchita ushapanchi? Chaipaca Jesús imata nishcatami cazuna capanchi. Jesusca nircami: ‘Taita Diospa [Gobiernotara, alita] rurashpa causanatarami, pundaca mascana canguichi. Shina causajpica, tucui chaicunata canguna munashcataca jahuan jahuanmi caramujunga’ (Mat. 6:33). Chai textopi shimicunami ñucanchitaca ñucanchi agllashca diversionbi mashna tiempota yalina cashcata yachachun y ima ashtahuan importante cashcata ricuchun ayudan.

¹¹ Jesusca solo Taita Diospa Gobiernotami mascashpa causana canguichi nishpaca na nijunllu. Sino Taita Diospa Gobiernotarami pundapi churana canguichi nijunmi. Jesusca ñucanchicuna shuj huasiguta, micunaguta, ropaguta, educacionda, trabajota, divertirinata ñucanchicuna minishtijtaca alimi yachan. Pero ima cajpipash Taita Diospa Gobiernota pundapi churanami siempre ashtahuan importante cana can (1 Cor. 7:​29-31). Jesuspa shimicunata yaipi charishpaca, Jehová Diosta sirvinataca pundapimi churashun, na imapash yanga ruraicunamandaca Jehová Diosta sirvinataca huashaman saquishunllu. Diversiongunata agllagrijushpapash chai shimicunatallata yaipi charishpaca, na tucui tiempochu diversiongunatalla pundapi churashun. Sino shuj limiteta churashpami chai diversiongunata rurashpaca beneficiarishun.

12. Diversiongunapi mashna tiempota yalinata yachachunga ¿imashinata Lucas 14:28​pi shimicunaca ayudan?

¹² Shuj diversionbi mashna tiempota yalina cashcata yachangapaca ‘pactanata o na pactanatarami’ primeroca aliguta ricuna capanchi (Luc. 14:28). Mashna tiempota yaligrijushcata ricushpami, ciertopachacha ayudahuanga nishpa pensarina capanchi. Si estudio personalta, Familiahuan Adorana Tutata, reuniongunata y predicacionda ladoman saquichigrijujpica yangami ñucanchi tiempotaca chai diversiongunapi desperdicianajushun (Mar. 8:36). Pero si chai diversionda huaquinbi huaquinbilla rurajpica, cutin fuerzata japichun ayudashpami Taita Diospa Gobiernotara en primer lugar churachun ayudanga. Chaica ali negociota rurajuj cuendami canga.

¿Pihuanda cumba tucusha?

13. Diversiongunata agllagrinajushpaca ¿imamandata picunahuan tandanajunatara ricuna capanchi?

¹³ Shinallata pihuanda cumba tucushpa divertirisha nishpapashmi pensarina capanchi. Ñucanchi amigocunahuan tandanajushpa divertirishpallami chai diversiondaca disfrutashun. Imashinami ñucanchi amigocunahuan micushpaca, micunatapash ashtahuan mishquillata micunchi, shinallatami ñucanchi amigocunahuan divertirishpaca ashtahuan cushijushpa yalishun. Chaimandami tucuicuna pero ashtahuanbachaca jovenguna amigocunahuan grupo tucushpa divertirinata gushtan. Shinaca diversiongunata agllashpa cushijushca yalingapaj munashpaca, nali amigocunamanda alejarishpa ñucanchita ayudaj amigocunahuanmi tandanajuna capanchi (2 Cró. 19:2; Proverbios 13:20​ta liipangui; Sant. 4:​4).

14, 15. a) Ali amigocunata agllachunga ¿imashinata Jesuspa ejemploca ayudaita ushan? b) Amigocunata agllagrijushpaca ¿imatata tapurina capanchi?

¹⁴ Ñucanchi amigocunata agllagrijushpaca Jesuspa ejemplotami catina capanchi. Paica gentecunata rurashca punllamandapachami gentecunataca juyashca (Pro. 8:31). Y cai alpapi cashpaca gentecunataca llaquishpa, considerashpami tratarca (Mat. 15:​29-37). Shinapash respetohuan, aliguta parlana y ali amigocuna cana diferente cashcataca alimi yacharca. Gentecunahuan ali llevarinata yachashpapash pai ‘imata mandashcata rurajcunahuanllami’ ali amigocuna tucun carca (Juan 15:14; Juan 13:​27, 30​tapash ricupangui). Jesusca solo paipa discipulocunahuan y Jehová Diosta sirvijcunahuanllami ali amigo tucurca.

¹⁵ Ñucanchipash amigocunata agllana horasca Jesuspa ejemplotami catina capanchi. Shinaca amigocunata agllagrijushpaca tapuripashunchi: “¿Paipa parlocunahuan y paipa rurashcacunahuanga Jehová Diospa y Jesuspa mandashcacunata cazujushcatachu ricuchijun? ¿Ñuca imata crishcatallatachu crin? ¿Bibliapa consejocunata pactachishpachu causan? ¿Jehová Diosta tucui shunguhuan cazushpa catichun y paipa Gobiernota en primer lugar churachunllu ayudahuan?” nishpa. Chai tapuicunata ari nishpaca chai persona ali amigo cashcata y paihuan imagutapash rurashpa divertirita ushashcataca seguromi caita ushapangui (Salmo 119:63, liipangui; 2 Cor. 6:14; 2 Tim. 2:22).

Diversionguna ali cashcataca ¿imashinata yachaita usharin?

16. Cai temapica ¿imatata yachajupashcanchi?

¹⁶ Cai temapica libre cashca tiempopi ima diversiongunata agllanata, ima hora ruranata y picunahuan tandanajunatami yachajupashcanchi. Shinallata ali diversiongunata agllashpa beneficiaringapaca Bibliapa consejocunata catina cashcatapashmi yachajupashcanchi. Shuj diversionda nara agllashpallatami cashna tapurina capanchi: Chai diversionga ¿imashinata can? ¿Chai diversionda agllashpaca ali cosascunatachu ruragrini o mapa nali cosascunatachu ruragrini? (Pro. 4:​20-27). ¿Ima horata ruragrini? ¿Diversiongunapillachu yapa tiempota yaligrini? (1 Tim. 4:​8). ¿Picunahuanda tandanajugrini? ¿Ali gentecunahuanllu tandanajugrini o nali gentecunahuanllu tandanajugrini? nishpami tapurina capanchi (Ecl. 9:18; 1 Cor. 15:33).

17, 18. a) Shuj diversión ali cashcata o nali cashcata yachangapaca ¿imatata rurana capanchi? b) ¿Imatata cada uno rurana capanchi?

¹⁷ Shinaca shuj diversionda agllashpaca imashina cajta, ima hora ruranata y picunahuan tandanajunatami ali ricuna capanchi. Si chai diversionda ruraimanda Bibliapi consejocunata huashaman saquina cajpica nali diversionmi can. Pero si Bibliapa consejocunata tucuipi pactachijushpaca chai diversión ali cashcata y Jehová Diosta alipi saquijushcataca seguromi caita ushapashun (Sal. 119:​33-35).

¹⁸ Ñucanchi tiempo librepica ima ali cashcata rurangapaj, tiempota ali utilizangapaj y ali amigocunahuan tandanajungapami esforzarina capanchi. Shinallata ‘micujushpa, ufiajushpa, imata rurajushpapash, Taita Diosca punchapambagumi cangui ni tucuchunmi’, tucui shunguhuan esforzarina capanchi (1 Cor. 10:31).

[Nota]

¿Imatata nipanguiman?

Cai textocunaca ¿imashinata ali diversiongunata agllachun ayudan?

• Filipenses 4:8

• Mateo 6:​33

• Proverbios 13:​20

[Diagrama]

(Para ver el texto en su formato original, consulte la publicación)

✔¿Imatallata ruragrin?

[Diagrama]

(Para ver el texto en su formato original, consulte la publicación)

✔¿Ima horata ruragrini?

[Diagrama]

(Para ver el texto en su formato original, consulte la publicación)

✔¿Picunahuanda tandanajugrini?

[Foto]

Ali diversiongunata y ali amigocunata agllachunga ¿imashinata Jesuspa ejemploca ayudaita ushan?