Jesusta punda catijcunaca ¿politicacunapi chapurircachu?

▪ Nara cieloman tigrashpaca Jesusca mandarcami, cashnami villachina canguichi nishpa. Shinapash politicapi chapurinamandaca na imatapash nircachu (Mateo 28:​18-20). Chaimandami Jesuspa catijcunaca ‘Cesarpa cajpica Cesarmanllatami cuna canguichi. Taita Diospa cajtaca Taita Diosmanmi cuna canguichi’ nishca shimicunata cazushpa causarca (Marcos 12:17).

Chai shimicunata cazuimandaca ¿imashinata Jesusta catijcunaca causarca? ¿Imashinata cai mundopi causashpapash na cai mundopi chapurirca? ¿Imashinata Cesarman cuna cashcata curca, Taita Diosman cuna cashcatapash curca?

Apóstol Pabloca yarcami, politicapi chapurishpaca Taita Diosman cuna cashcataca na cujunichu nishpa. Shuj libroca ninmi, “Apóstol Pabloca shuj juiciopi cashpaca romanomi cani nishpami paipa derechocunata reclamarca. Shinapash politicapica na chapurircachu” nishpa (Beyond Good Intentions –A Biblical Viez of Politics [Más que buenas intenciones. La visión bíblica de la política]).

Apóstol Pabloca ¿imashinata paipa huauquicunataca ayudarca? Chai librollata ninmi: “Corintomanda, Efesomanda, Roma llactamanda huauquicunaman cartacunata escribishpaca na politicacunamanda escribircachu” nishpa (Job 1:​9, 10; 2:4). Gobiernocunata respetaichi nishpapash, gobiernocunapa oficinacunapi imacunahuanbash chapurinataca na escribircachu (Romanos 12:18; 13:​1, 5-7).

Apóstol Pablo huañushca jipapash Jesusta catijcunaca gobiernocunata respetashpapash politicacunapica na imapipash chapurinllu carca. Ñaupa parrafocunapi libroca ninmi, “Jesusta catijcunaca gobiernocunata respetashpapash politicacunapica nimamanda na chapuringapaj munarcachu” nishpa.

Shinapash Jesús huañushcamanda 300 huatacuna jipaca Jesusta catijcunaca cambiarcami. Charles Villa-Vicencio teologoca shuj libropica ninmi: “Constantino mandai callarishpaca huaquin cambiocunatami rurarca. Chaimandami Jesusta catijcunaca gobiernocunapa oficinacunapi trabajai callarirca, soldadocuna tucurca” nishpa (Between Christ and Caesar [Entre Cristo y César]). Shinami ña huata 400 tucujujtaca religionga politicahuan chapurishpa Roma llactapica shuj religión tiai callarirca.

Cunanbica ashtaca religiongunami Jesusta catinchi nishpapash politicacunapi chapurin. Shinapash paicunaca Jesusta punda catijcunapa ejemplotaca na catinajunllu.