¿Imamandata Diosca llaquicuna tiachun saquishca?

GENTECUNA SUFRINAJUJTA RICUSHPACA TAITA DIOSCA ¿IMASHINATA SINTIRIN?

Michelle: Tia Sofía ¿imanalla? Huasipi tuparishcamandaca cushijupanimi.

Sofía: Pagui, ñucapashmi cushijuni.

Michelle: Tiita Sofía, chaishuj viaje quiquinhuan parlajushpaca gentecuna sufrijujta ricushpa Taita Dios imashina sintirijtami parlaparcanchi.a Quiquinbash chaita yachangapaj munashcatami niparcangui. Shinallata quiquinba mamita shuj accidenteta charishcatapashmi niparcangui. Paica ¿imanallata capan?

Sofía: Ratopi ratopimi nali canata yachan. Pero cai ratoca alillami capan.

Michelle: Shinami capanga, quiquinba mamitata cuidanaca quiquinbaca shinllimi capanga.

Sofía: Ari. Chaimandami ima horacamanshi shina sufrina canchi nishpa pensarishcani.

Michelle: Tucuicunallatami shina pensapashcanchi. Shinapash chaishuj punllaca Taita Dios tucui ushaita charij Dios cashpapash ¿imamandashi gentecuna llaquicunahuan causachun saquishca? nishca tapuigutami ricungapa quidaparcanchi.

Sofía: Ah ari, yaripanimi.

Michelle: Cai tapuimanda Biblia imata nijujta nara ricushpallata chaishuj viaje parlashcata ashaguta yarichingapaj munaparcani.

Sofía: Ah yaya.

Michelle: Chaishuj viajeca Diosta sirvij shuj runagumandami parlarcanchi. Paica Taita Diostaca imamandata llaquicuna tiachun saquingui nishpami tapurca. Shina tapujpica, canga fetaca na charinguichu nishpaimanga Taita Diosca paihuanga na culirarcachu.

Sofía: Ciertomi, chaitaca na yachashcarcanichu.

Michelle: Shinallata Jehová Diosca ñucanchicuna sufrichunga na munashcatami ricurcanchi. Bibliapica punda tiempopi gentecunata ‘ninan llaqui japijpica paipash ninanda llaquirijurca’ ninmi.b Shinaca ñucanchicuna llaquicunapi cajpi Taita Diospash llaquilla sintirijta yachanaca ¿nachu quiquindaca animan?

Sofía: Ari.

Michelle: Shinallata Taita Dios tucui ushaita charimandaca llaquicunata tucuchina cashcatami parlaparcanchi.

Sofía: Ari, pero llaquicunata tucuchingapaj ushaita charishpapash, imamanda llaquicuna tiashpa catichun saquishcatami na intindini.

¿PITA LLULLAJURCA?

Michelle: Génesis librota liishpa callaripashun. Chaipica Adanmanda, Evamanda shinallata Taita Dios ama micuichu nishpa prohibishca frutamandami parlajun. ¿Tal vez uyapashcanguichu?

Sofía: Ari, chaitaca catesismopimi yachachihuarca. Paicunaca Taita Dios prohibishca frutataca na cazushpami micurca.

Michelle: Ari, chai frutata nara micujpillata ima pasashcata ricupashun. Chaita liishpami Taita Dios imamanda llaquicuna tiachun saquishcata intindipashun. Génesis capítulo 3 verso 1​manda 5​caman liishpa carahuai.

Sofía: Ya. Cashnami nin: “Ashtahuangarin Mandaj Taita Dios rurashca pambapi causanajuj animalcunamanda yalica culebrami umachinata alipacha yachaj carca. Chai culebrami, huarmitaca cashna nirca: Shina cashpaca ¿Taita Dioschu cangunataca: ‘Huertapi tucui yuracunamandaca na micunachu canguichi’ nirca? nishpami tapurca. Shina tapujpimi huarmica, culebraman cashna nishpa tigrachirca: Huertapi tiaj yuracunapi fucushcataca, micui ushanchimi. Ashtahuangarin Taita Diosca, huerta chaupipi shayajuj yurapi fucushcamandami cashna nirca: ‘Ama huañungapaca, chai yuramandaca napacha micunachu canguichi, tacaritapash na tacarinachu canguichi’ nircami, nirca. Shina nijpimi culebrapash, huarmitaca cashna nirca: Na huañunguichica. Ashtahuangarin chai yuramanda ima punlla micushpapash, cangunapaj ñavi pascarijpimi, Taita Dios yachanshnallata alita, nalitapash yachanguichi. Chaitaca, Taita Diospash yachanmi nircami”.

Michelle: Pagui liishcamanda. Cai textocunapi ima nijujta asha asha ricupashun. Callaripica culebraca Eva huarmihuan parlashca nijunmi. Cutin Bibliapa shuj textopica Evata pandachishca culebrataca Diablo parlachishcatami ricuchin. Culebraca Evataca ¿ciertopachachu Taita Diosca chai yuramandaca na micunachu canguichi nirca? nishpami tapurca. Pero Taita Diosca chai yuramanda micushpaca ¿ima pasana cashcatata nirca?

Sofía: Huañunguichimi nircami.

Michelle: Ari. Shinapash Diabloca Taita Dios llulla cashcata nishpami chaita micushpaca na huañunguichica nirca.

Sofía: Chaitaca na yachashcanichu.

Michelle: Satanasca Taita Dios llullajushcatami nirca. Shinapash chaita nishpa Satanás llullajushcata tucuicuna cuenta japichunga tiempo yalinami minishtirirca. ¿Imamandashi shina nipanchi?

Sofía: Mmm... na yachapanichu.

Michelle: Caita intindingapaca caipi pensaripashun. Quiquindaca ñucami ashtahuan yali fuerzayu cani nishcaiman. Shinapash chai cierto o na cierto cashcata ricuchingapaca ¿imatata ruranchiman?

Sofía: Tal vez imatapash alzashpami maijan ashtahuan fuerzata charishcata ricui ushanchiman.

Michelle: Ari, ishcandillata imapash llashalla cosasta alzashpami maijan ashtahuan fuerzata charishcata ricui ushanchiman nachu.

Sofía: Ari.

Michelle: Pero quiquinda na honrada can nishpa juchachijpica, chai na cierto cashcataca ¿chai ratochu ricuchi ushapanguiman?

Sofía: Na.

Michelle: Pi ashtahuan fuerzayu cashcataca facilllami ricuchi usharin. Shinapash na honrado can nishpa juchachijpica, tiempohuanmi chai cierto o na cierto cashcataca yachai usharin.

Sofía: Chaica ciertomi.

Michelle: Tiempohuanmi quiquin imashina causajujta ricushpa gentecunaca quiquin ciertopacha honrada cashcata cuenta japinga.

Sofía: Ciertomi.

Michelle: Cai versocunapi liishcata cutin ricupashun. Diabloca ¿Taita Diosta yali ushaita charini nishpachu llullajurca?

Sofía: Na.

Michelle: Taita Diospaca pai yali ushaita charishcata ricuchinaca facilmi canman carca. Shinapash Satanasca Taita Diostaca llullajunmi, na honrado canllu nishpami juchachirca. Eva huarmitaca “Taita Diosca llullajunmi, ñucami ciertota nijuni” nij cuendami carca.

Sofía: Ah ya. Shinachu carca.

Michelle: Taita Diosca ali yachaita charimandami Diablo llullajushcata tucuicuna cuenta japichunga tiempo yalichun saquina cashcata ali yacharca.

¿IMATA NISHPATA SATANASCA TAITA DIOSTACA JUCHACHIRCA?

Sofía: Pero ¿nachu Eva huañujpica Taita Diosca pai ciertota nijushcata ricuchirca?

Michelle: Ari, pero versículo 5​pi Taita Diosmanda Diablo imata ashtahuan nishcata ricupai.

Sofía: Chaipica Satanasca chai yuramanda ima punlla micushpapash cangunapa ñavica pascaringami nishcami.

Michelle: Ari, y chaita micushpaca “Taita Dios yachanshnallata alita, nalitapash yachanguichi” nircami. Shina nishpaca Satanasca Taita Dios gentecuna cushilla causachun na munaimanda chai yuramanda ama micunguichichu nishpa jarcashcatami nijurca.

Sofía: Ah... ya.

Michelle: Y shina nishpaca Taita Dios nali Dios cashcatapashmi juchachijurca.

Sofía: ¿Cierto? Pero ¿imasha?

Michelle: Diabloca chaita micushpaca Taita Dioshnallata alita y nalitapash yachanguichi nishpaca, tanto Evata y tucui gentecunallata Taita Diosta na cazushparapash cushilla causanguichi nijurcami. Chaimi Jehová Diosca Diablo llullajushcata ricuchingapaj asha tiempota cai mundota Diablo mandachun saquirca. Diablo cai alpata mandajushcamandami cunanbica ashtaca llaquicunahuan causanajunchi.c Pero llaquicunahuan cajpipash Taita Dios ñucanchita ayudajtami Bibliapica yachachin.

Sofía: ¿Cierto? ¿Imasha?

Michelle: Bibliapica ñucanchicuna llaquicunahuan cajpi Jehová Dios ñucanchicunahuan cajtami yachachin. Por ejemplo rey Davidca paipa causaipica ninandami sufrirca. Shinapash Taita Diosmanda imata nishpa escribishcataca Salmo 31:7​pi liishpa carahuai.

Sofía: Ya. ‘Ñuca llaquilla cajta can ricushcamandami, can llaquijpi ninanda cushijujusha. Ñuca ninan llaquihuan cai horascunami, ñuca almataca rijsihuarcangui’ ninmi.

Michelle: Davidca ninanda sufrishpapash Taita Dios paita llaquishpa ricujushcata yachashpami paica tranquilo sintirirca. Quiquin sufrijujta ricushpa shujcuna na intindijpipash, Jehová Diosca llaquishpa ricujujta yachanaca ¿nachu quiquindaca tranquilo, ali sintirichun ayudan?

Sofía: Ayudandashnaca.

Michelle: Shinallata Bibliapica Taita Diosca llaquicunata ñalla tucuchinga ninmi. Ashtahuanbash Satanastapash, Satanaspa culpamanda tiashca llaquicunatapash tucuchinga ninmi. Chaipica quiquinbash, quiquinba mamitapash ñana llaquicunahuan sufringuichichu. Chaishuj semana tigramushpaca cunanbi tiashca llaquicunata Taita Dios ñallapacha tucuchinatami ricuchingapaj munapaiman ¿alicha capanman?d

Sofía: Ya, alimi capanga.