¿Imata cáncer ungüi cuenda can?

Ñaupa tiempomandapachami autoridadta charij gentecunaca paicunapa provecho imatapash rurashca. Chaimandami israelitacunataca mandarca, juiciopi cashpaca pi imata carajpipash na japinachu canguichi nishpa (Éxodo 23:8). Gobiernopa oficinapi trabajajcunapash familiacunata, rijsicunata ayudangapaj o paicunaman cungapami trabajo pushtupi cosascunata upalla japin. Huaquinbicarin ñavi ñavimi culquitapash shuhuanlla.

Culquita maqui ucuchij gentecunaca tucui ladocunapimi tian. Shinapash ashtahuanbachaca gobiernopa oficinacunapimi tian. Transparencia Internacional nishca organizacionga huata 2013​pica ashtaca gentecunata tapushca jipami nirca, gentecunapa yuyaipica ashtahuanbachaca politicocuna, policiacuna, gobiernopa oficinacunapi trabajajcuna, asambleistacuna, juzgadopi trabajajcunami maqui ucuchijpi culquita japin nishpa. Huaquin llactacunapi ima pasajushcata ricushun:

• ÁFRICA. Sudáfrica nishca llactapica, gobiernopa oficinacunapi trabajadorcunamandaca casi 22.000cunatami 2013 huatapica culquita maqui ucuchijpi japishca nishpa juchachirca.

• AMÉRICA DEL SUR. Brasil llactapi, 2012 huatapica politicocunata ayudangapami impuestocunapi pagashca culquita japishca nishpami 25 gentecunata condenarca. Chai 25purapica punda presidentepa trabajadorcunapa jefepashmi carca.

• ASIA. 1995​pica Corea del Sur-Seúl llactapi shuj jatun edificio urmajpimi 502 gentecuna huañurca. Investigaciongunata rurajpica, edificiota rurajcunami nali materialcunahuan rurangapaj, municipio mandashcashna ama rurangapaj municipiopi trabajajcunaman culquita maqui ucuchishcarca.

• EUROPA. Asuntos de Interior de la Comisión Europea nishcapa comisaria Cecilia Malmström shuti huarmiguca nircami: “Europapica ashtacacunami culquita maqui ucuchinata yachan. Chai llaquita tucuchingapaca politicocunami cambiana can. Shinapash cambiangapaj munaj politicoca na tianllu yarin” nishpa.

Culquita maqui ucuchinata nalicachij Susan Rose-Ackerman shuti profesoraca escribircami, culquita maqui ucuchinata tucuchingapaca gobiernocunami ninandapacha cambiana can nishpa. Ali gobierno na tianashnalla cajpipash Bibliapica shuj ali gobierno tianatami parlan.