¿Bibliaca imatapash yachachinllu?

Huaquinbica ¿nachu quiquinbash shina nishpa pensaripashcangui? Mundo enteropica ashtaca gentecunami chai tapuicunata yachangapaj munashca. Shinapash ¿chai tapuicunata yachai ushanchichu?

Ashtaca gentecunaca Bibliata yachajuimandami chai tapuicunataca yachai usharinmi nin. ¿Nachu quiquinbash Bibliata yachajungapaj munapanguiman? Yachangapaj munajpica testigo de Jehovacunaca gratismi Bibliataca yachachinga.a

Shinapash Bibliata yachachinamanda parlajpica ashtacacunaca ninmi: “Ocupadomi cani”, “shinllimi canga” o “religionda cambianami canga” nishpa. Ashtaca gentecuna shina nijpipash huaquingunaca Bibliata yachajushcami. Paicuna ima nijta ricupashun.

• Inglaterra llactamanda Gill shutica ninmi: “Católico iglesiacunamanbash, na católico iglesiacunamanbash, sijismo nishca religionba templocunamanbash, budista nishca religionba monasterio huasicunamanbashmi rircani. Universidadpipash Teología nishcata estudircanimi. Shinapash ñuca yachangapaj munashca tapuicunataca na yachachihuarcachu. Shuj punllaca shuj testigo de Jehová punguta huactachishpami tucui ñuca tapushcata Bibliapi ricuchihuarca. Chaimandami Bibliata yachajui callarircani” nishpa.

• Benín llactamanda Koffi shutica ninmi: “Ashtaca cosascunatami yachangapaj munarcani. Ñuca iglesiapi pastorta tapujpipash na crinalla cosascunatami nihuarca. Shinapash, shuj testigo de Jehovaca tucui ñuca tapushcatami Bibliapi ricuchihuarca. Chaimandami Bibliata yachajungapaj munanguimanllu nijpica ari nircani” nishpa.

• Brasil llactamanda José shutica ninmi. “Huañushca jipa ima pasajtami yachangapaj munarcani. Huañushcacuna ñucata imapash nalita ruranata manllashpami Biblia ima nijta yachangapaj munarcani. Shinami testigo de Jehová amigota charishpa paihuan Bibliata yachajui callarircani” nishpa.

• México llactamanda Dennize shutica ninmi: “Bibliata lii callarishpapash na intindircanichu. Shinapash shuj punllaca testigo de Jehovacuna huasiman shamushpami Bibliapi tauca textocunata intindichihuarca. Chaimi Bibliata yachajui callarircani” nishpa.

• Nepal llactamanda Anju shutica ninmi: “Taita Diosca ñucata llaquihuanlla nishpami pensarin carcani. Chaimandami Bibliapi Taita Diosta mañarcani. Cayandi punllaca testigo de Jehovacuna huasiman shamujpimi paicunahuan Bibliata yachajui callarircani” nishpa.

Paicunaca Jesús nishca shinami, ‘Diosmanda yachajungapaj munaimanda ninanda cushijushca’ (Mateo 5:3). Tucuicunallatami cushilla cangapaj munanchi. Shinapash Taita Diosllami ñucanchitaca cushilla causachun ayudaita ushan. Bibliapimi imashina cushilla causanataca villajun.

Shinaca ¿imashinata Bibliata yachajui ushapangui? Bibliata yachajunaca ¿imamandata ali can? Chaitami shamuj paginacunapi yachachijun.