Diablomandaca cuidarinapachami canchi
“Cangunata fiñaj diabloca, león huacashpa, pitapash micungapaj mascajunshnami muyuriajun. Shina cajpimi rijchariashpa, aligutapacha yarishpa causana canguichi.” (1 PED. 5:8)
1. Diablo Satanasca ¿imashinata tiai callarirca?
CALLARIPICA Jehová Diospa ali ángel cashpapash jipamanga gentecuna paita adorachunmi munarca. Chai nali munaita cunganapa randica, chai nali munaipi ashtahuan ashtahuan pensarishpami chai angelca juchata rurashpa Diablo Satanás tucurca (Sant. 1:14, 15). Taita Dios nishcata na cazushpami Diabloca ‘llullapa taita’ tucurca (Juan 8:44).
2, 3. “Satanás”, “Diablo”, “callarimandapacha pandachij culebra”, “dragón” nijta uyashpaca ¿imapita pensaripanchi?
2 Cai nali angelca Taita Diostapash gentecunatapash nimamanda na ricunayachinllu. Jatun millai, nalipacha cashcata yachachunmi, Bibliapica chai nali angeltaca Satanás nin. Satanás nishpaca Taita Diospa contra nijunmi. Taita Diosta cazunapa randica, Taita Diostaca nimamanda na cazungapaj munanllu. Taita Dios mandachunga na munanllu.
3 Apocalipsis 12:9pica chai nali angeltaca Diablo, callarimandapacha pandachij culebra, dragón nishpami shutichin. Diablo nishpaca llullashpa juchachij nijunmi. Diabloca Taita Diosca llullajunmi nishpami Taita Diospa shutita mapayachirca. Callarimandapacha pandachij culebra nijta uyashpaca Evata llullashpa umachishcatami yarinchi. Cutin dragón nijta uyashpaca, shuj manllanai jatun animalrucupimi pensarinchi. Diabloca shuj millai animalrucu cuendami Jehovapa munaita jarcangapaj, gentecunata tucuchingapaj muyuriajun.
4. ¿Imatata cai temapica yachajupashun?
4 Imashinami ricupanchi, Diabloca Jehová Diostapash gentecunatapash ninandami millanayachin, nimamanda na ricunayachinllu. Paica gentecunata Jehová Diosmanda caruyachingapaj munashcami ricuriajun, muyuriajun. Chaimandami ñucanchitaca cashna nishpa Bibliapica advirtijun: “Cangunata fiñaj diabloca, león huacashpa, pitapash micungapaj mascajunshnami muyuriajun. Shina cajpimi rijchariashpa, aligutapacha yarishpa causana canguichi” nishpa (1 Ped. 5:8). Shinaca, Diablomanda aliguta cuidaringapaca quimsa yuyaicunatami cai temapica ricupashun.
DIABLOCA ASHTACA PODERTAMI CHARIN
5, 6. a) ¿Ima ejemplocunata ricuchin, angelcunaca ashtaca poderta charijta? b) ¿Imamandata Bibliapica nin, Diablomi ‘huañuita mandana ushaita charin’ nishpa?
5 Angelcunaca ashtaca podertami charin (Sal. 103:20). Gentecunatapash yalimi imatapash yachan, shinllicunami can. Ali angelcunaca ashtaca poderta charishpapash ima ali cashcatallami ruran. Ishcai ejemplocunata ricupashun. Shuj punllaca Israel llactata contracuna ama llaquichichunmi Jehová Diospa shujlla ali angelca 185 mil contra soldadocunata huañuchirca. 185 mil soldadocunata huañuchitaca ashtaca soldadocuna shayarishpapash na ushanmanllu carca (2 Rey. 19:35, NM ). Cutin shuj punllaca, Jesuspa apostolcuna carcelpi cajpimi shuj angelca cárcel pungucunata pascashpa, apostolcunata libre llujchishpa pungucunatapash cutin vicharca. Guardiacuna chaipi cuidashpa shayanajushpapash na imatapash ricurcachu (Hech. 5:18-23).
6 Cutin Diabloca ashtaca poderta charishpapash nalitallami ruran. Chaimandami Bibliapica paitaca nin: ‘Cai pachapajtalla rurachishpa mandajmi can’, ‘paimi cai pachapi mandajuj dios’ can nishpa (Juan 12:31; 2 Cor. 4:4, ). Ashtahuangarin Bibliapica ninmi, Diablomi ‘huañuita mandana ushaita charin’ nishpa (Heb. 2:14). Shinapash cai textoca tucuilla gentecunata Diablopacha huañuchijujtaca na nijunllu. Shinaca ¿imamandata Diablotaca ‘huañuita mandana ushaitami charin’ nin? Pundapica, Diablopa culpamanda Adán y Evata juchata rurajpimi tucuicuna juchayu tucushcanchi huañunchipash (Rom. 5:12). Shinallata, Diablopa munaita catimandami gentecunaca paicunapura ninanda millanayachirishpa shujcunatapash huañuchin. Jesús nishca shinaca Diabloca ‘huañuchijmi’ can (Juan 8:44). Imashinami ricupanchi, Diabloca ashtaca podertami charin.
7. Ashtaca ushaita charimandaca ¿imatata ayacunaca ruranlla?
7 Diablopa munaita na rurashpaca Diablota catijcunapa, ayacunapa contrami tucunajunchi (Apoc. 12:3, 4). Bibliapi yachachishca shinaca, ayacunaca gentecunata yali ushaitami charin. Chaimandami gentecunataca llaquichin, sufrichinbash (Mat. 8:28-32; Mar. 5:1-5). Diablopash paipa ayacunapash ashtaca poderta charijtaca na cunganachu capanchi (Mat. 9:34). Jehová Diospa ayudahuanllami Diablotapash paipa ayacunatapash mishai ushashun.
DIABLOCA NA PITAPASH LLAQUINLLU
8. a) Diabloca ¿picunatata ashtahuanbachaca tucuchingapaj munan? (Callari dibujota ricupangui.) b) Quiquinba ricuipica ¿imashinata gentecunaca Diablota catishpa pitapash na llaquishcata ricuchin?
8 Apóstol Pedroca nircami, Diabloca ‘león huacashpa, pitapash micungapaj mascajunshnami muyuriajun’ nishpa. Shinaca Diabloca na pitapash llaquinllu. Paica mundo enteropi gentecunata ña paipa maquipi charishpa, ashtahuanbachaca cai Alpapi ungidocunatapash, shuj llamagucuna nishcacunatapashmi tucuchingapaj munajun (1 Juan 5:19; Juan 10:16; Apoc. 12:17). Chaimandami apostolcunapa punllacunamanda callarishpa cunan punllacunacaman Diabloca Jehová Diosta sirvijcunata catiriashpa llaquichijushca.
9, 10. a) Diabloca ¿imashinata israelitacunataca llaquichirca? (Ejemplocunata nipai.) b) ¿Imamandata Diabloca israelitacunata tucuchingapaj munarca? c) Quiquinga ¿imatata nipanguiman, Jehovata sirvijcuna imapash jatun juchata rurajpica imashinashi Diabloca sintirin?
9 Imashinami ña niparcanchi, Diabloca yarjachijuj leonshnami can. Leonga imapash animalguta japingapaca yangata chai animalgupa jahuapi shitarishpami llaquinaita huañuchin. Huañuchishca jipaca na llaquirijunllu. Diablopash gentecunataca nimapa na llaquinllu. Bibliapi ishcai ejemplocunata ricupashun. Ñaupa punllacunapi israelitacunataca shuj huarmihuan, shuj jarihuan puñuna juchapimi urmachirca. Chaimandami Zimrí nishca israelitaca llaquinaita, pinganaita huañurca. Shina huañujta ricushpaca Diabloca cushijushcami carianga (Núm. 25:6-8, 14, 15). Shinallata, Guehazí (Giezi) nishca israelita ansiahuan munaimanda juchapi urmashpa jatun llaquipi urmajpica, Diabloca cushijushcapachami carianga (2 Rey. 5:20-27.)
Jehová Diosta sirvijcuna juchata rurajpica Diabloca ushashcatami cushijun (Párrafo 10ta ricupangui)
10 Shinapash ¿imamandata Diabloca israelitacunata tucuchingapaj munarca? Diabloca Jehová Dios agllashca Mesías Israel llactapi nacirinataca alimi yacharca. Shinallata Diabloca, Mesías paita tucuchishpa, Jehová Dioslla mandana cashcata ricuchinatapash alimi yacharca (Gén. 3:15). Chaimandami israelitacunataca juchapi urmachingapaj munarca. Bat-sebahuan David falta urmajpica Diabloca na llaquirircachu. Shinallata Jehová Dios carasha nishca alpacunamanga na yaicui ushashcamanda Moisés ninanda huacajujpipash Diabloca na llaquirijurcachu. Ashtahuangarin, Jehová Diosta sirvijcuna imapash jatun juchapi urmajpica ushashcata cushijushpami Diabloca Jehová Diosmanda burlarin (Prov. 27:11).
11. ¿Imamandashi Diabloca Sarata tentacionbi urmachingapaj munajushcanga?
11 Israel llacta nara tiajpica Abrahán paipa huarmi Sarami causarca. Abrahanba familiamandami Mesiasca ricurina carca. Chaimandami Diabloca Abrahandapash paipa huarmi Saratapash ninanda na ricunayachin carca. Shuj punlla ima pasashcata ricupashun. Jehová Diosca Abrahandaca nircami, canmandami ‘shuj jatun llactata rurasha’ nishpa (Gén. 12:1-3). Chai jipallami Abrahanga paipa huarmi Sarandi Egipto llactapi causajurca. Chaipimi Egiptomanda reyca Sarahuan cazarangapaj munashpa Sarataca paipa huasiman apachun cacharca. Shinapash Jehová Diosca Egiptomanda rey, Sarahuan cazarachunga na saquircachu (Génesis 12:14-20, liingui). Isaac nara nacirishca punllacunapipash Guerar llactamanda rey Abimelecmi Sarahuan cazarangapaj munajurca. Shinapash cutinmi Jehová Diosca Sarata salvarca (Gén. 20:1-7). Chai reycunaca ¿Diablo yuyachijpichu Sarahuan cazarangapaj munanajurca? Bibliapica na imatapash ninllu. Shinapash yaripai, Saraca Ur nishca charij llactapi ali causaita saquishpami carpa huasicunapi causajurca. Diabloca tal vez munajushcangami reycunapa cosascunata, huasita ricushpa Sara shuj jarihuan falta urmashpa paipa cusa Abrahanda saquichun, Jehovata na cazuchunbash. Sara juchapi urmashpa Mesiaspa punda familia cana bendicionda chingachijpica Diabloca ninandami cushijunman carca. Diabloca cusamanda Sara separarishpa sufrijujta ricushpa, Jehová Diosmanda caruyachishpa, Sarapa shutita mapayachishpaca ninandami cushijunman carca.
12, 13. a) Jesús nacirijpica ¿imatata Diabloca rurarca? b) Quiquinba yuyaipica Jehovata sirvij huahuacunamanda, jovengunamandaca ¿imatashi Diabloca yuyan?
12 Jesusca Abrahán causashcamanda ashtaca huatacuna jipami nacirirca. Jesús nacirijta ricushpaca Diabloca na cushijurcachu. Diabloca alimi yacharca, Jesusca Abrahanba familia cashcata, paipa nali rurashcacunatapash Jesús tucuchinata (1 Juan 3:8). Chaimandami Diabloca Jesús uchilla huahua cajpillata huañuchingapaj munarca.
13 Israelitacunata mandana huahuagu nacirishcata yachashpaca rey Herodesca ushashcata culirashpami huañuchingapaj munarca (Mat. 2:1-3, 13). Chaimandami Belén llactapipash, ladolla llactacunapipash ishcai huatata nara charij jari huahuacunataca tucuillata huañuchichun cacharca (Mateo 2:13-18, liingui). Shinapash Jesusca salvarircami. Shinaca ¿imatata Diablomandaca cuenta japishcanchi? Diabloca ñucanchi contrami can. Ñucanchi causaica Diablopaca nimapa na sirvinllu, imapash basura cuendami canchi. Uchila huahuacunatapash na llaquinllu. Chaimandami tucui horas Diablomandaca cuidarina canchi. Diabloca shuj millai leonshnami urmachishapachami yashpa muyuriajun.
DIABLOCA ALIPACHAMI UMACHINATA YACHAN
14, 15. Diabloca ¿imashinata gentecunataca pandachishca?
14 Diabloca umachishpallami gentecunataca Jehová Diosmanda caruyachita ushan (1 Juan 4:8). Pandachishpami gentecunataca pensachin, Taita Diosmanda yachajunataca na minishtinichu nishpa (Mat. 5:3). Diabloca gentecuna ali villaicunata ama chasquichunmi gentecunapa ‘yuyaitaca yanayachishpa ñausatashna charijun’ (2 Cor. 4:4).
15 Gentecunata pandachingapaca Diabloca panda religiongunatami churashca. Gentecuna Jehovata adoranapa randi huañushcacunatara, Inditara, Lunatara, urcucunatara adorajujta ricushpaca Diabloca cushijushcapachami can (Éx. 20:5). Diablo alipacha umachijpimi paicunaca yan, Taita Diostaca alimi adorajuni, cai costumbrecunaca alimi canga nishpa. Chashna gentecunaca israelitacuna cuendami causanajun. Paicunata ayudangapaj munashpami Jehová Diosca panda religiongunata nali micunahuan chimbapurashpa nirca, cangunaca ¿imamandata napash micunatara randishpa culquita tucuchinguichi? nishpa. Chai jipaca nircami: ‘Ñuca rimashcata aliguta uyahuaichi, ali micunaguta micuichi’ nishpa (Is. 55:2).
16, 17. a) Jesusca ¿imamandata Pedrotaca ‘Satanás’ nirca? b) Cai tucuri punllacunapi ñucanchicuna ama rijcharia causachunga ¿imatata Diabloca rurajun?
16 Diabloca Jehová Diosta ali catinajujtapashmi pandachita ushan. Shuj punlla ima pasashcata ricupashun. Jesusca paipa catijcunamanga ñami huañuna cani nishpami parlajurca. Chaipimi Pedroca ashaguta ladoman apashpa Jesustaca cashna nirca: “Jesús, can chashna tucuchunga, Taita Diospash ama munachun. Chai llaquica amapacha japichun” nishpa. Shina nijpimi Jesusca nirca: ‘Ñuca ñaupamanda anchuri Satanás’ nishpa (Mat. 16: 22, 23). ¿Imamandata Jesusca shina nirca? Jesusca paipa causaita cushpa tucuilla gentecunata salvana punlla chayamujushcata, Diablo llulla cashcata ricuchina punlla chayamujushcata ali yachashpami Pedrotaca shina nirca. Jesuspi preocuparina tiempoca na carcachu. Paipilla preocuparishpa Jesús na imatapash rurajpica Diabloca cushijushcami ricujunman carca.
17 Ñucanchicunaca tucuri punllacunapimi causanajunchi, ñallami Diablopa nali mundo tucurijta ricushun. Diabloca, ñucanchicuna tucuri punllacunapi causajushcata cungashpa, ñucanchipilla pensarishpa, imapipash na preocuparishpa cai mundopi tranquilo causachunmi munan. Shinapash ñucanchicunaca Diablo pandachichunga na saquinachu canchi. Ashtahuangarin Jesús mandashca shinami, cai punllacunapica rijcharia causangapaj munanchi (Mat. 24:42). Tucuri punllacunapi causajushcataca na cunganachu capanchi.
18, 19. a) Diabloca ¿imata crichingapata munan? b) Ñucanchita Diablo ama pandachichunga ¿imatata Jehová Diosca rurashca?
18 Diabloca ñucanchita umachishpami crichingapaj munan, Taita Diosca na juyanllu, juchacunataca na perdonanllu nishpa. Shinapash chaica llullami can. Bibliapica ninmi: ‘Taita Diosca [alita] ruraj cashpami canguna imatalla ruranajushcataca na cungan. Paipa shutita juyajcunatapash na cunganllu’ nishpa (Heb. 6:10). Imashinami ricupanchi, ñucanchicuna Jehovamanda imagutapash rurajpica paica cushijushcami ricujun (1 Corintios 15:58, liingui). Cutin, aliguta pensarijpica, Diablotami Jehová Diosca na juyan, na perdonan. Shinaca Diablo umachichunga ama saquishunchichu.
19 Imashinami ricupashcanchi, Diabloca ashtaca podertami charin, na pitapash llaquinllu, alipachami umachinata yachan. Paipa trampacunapi ama urmangapaca Jehovapa ayudatami minishtinchi. Bibliapimi Jehová Diosca Diablo imashina umachijtaca villajun. Chaimandami Diablo imashina ‘umachijtaca ali yachanchi’ (2 Cor. 2:11). Shinapash na chaipillachu saquirina canchi. Ashtahuanga Diablopa trampapi ama urmangapami shinllita esforzarina canchi. Chaimandami Bibliapica nin: ‘Taita Diostalla cazushpa causashpa, Diablohuanga shinllita macanajuichi. Chashna causajpimi cangunamandaca Diabloca anchuringa’ nishpa (Sant. 4:7). Diablota mishai ushangapaca shamuj temapimi quimsa yuyaicunata ricupashun.