CALLARI TEMA | ¿IMASHINATA NA YAPATA PINARISHUN?
Ashtacacunami yapata pinarin
Zimbabue llactamanda Paulca ninmi: “Micunata randingapaj rijpica galletacunallami tiarca. Valishca valishcami carca. Cayandi rijpica ñana imapash tiarcachu” nin.
Estados Unidos llactamanda Janetca ninmi: “Ñuca cusa jichugrinimi nijpica ninanda manllarishpami yarcani, ñuca huahuacunaca ¿imashina tucunga?” nishpa.
Israel llactamanda Alonaca ninmi: “Sirenacuna huacajujta uyashpaca pacajuna pushtuman ucha rishpami bombacuna ñana tugyangacaman alpapi shitarini. Bombacuna upalla quedajpipash manllaimandaca chujchujunillami” nin.
Cunanbica jatun llaqui punllacunapi causanajuimandami ashtaca llaquicunata charinchi (2 Timoteo 3:1). Ashtacacunaca culquimanda, guerracunamanda, ungüicunamanda o imapash llaquicunamandami ninanda pinarishpa causan. Cutin shujcunaca problemacunata charishpa, cáncer ungüi japinata manllashpa o huahuacuna, nietocuna imashina causanata manllashpami ninanda preocuparin.
Huaquinbica tucuicunallatami examenda cuna cashpa, gentecunapa ñaupajpi parlana cashpa o trabajota mañangapaj rina cashpaca ashata pinarishcanchi. Shinapash yapata pinarinaca nalichu can. 68 mil gentecunahuan pruebata rurashpami huaquingunaca nin, ashagutalla pinarishpa causajushca cashpapash huañuita ushanmi nishpa. Chaimandami Jesusca nishcanga: ‘Unaicaman causashapacha yashpa chaitalla yarijushpapash, na ushanguichichu’ nishpa (Mateo 6:27, Mushuj Testamento Quichua Imbabura). Jesusca nircapashmi: “Na chaitalla yarishpa musparinachu canguichi” (Mateo 6:25). Shinapash ¿imashinata na yapata preocuparishpa causaita ushanchiman?
Ama yapata preocuparingapaca imata ruranatami ali ricuna canchi. Shinallata Taita Diostami mañana canchi, paipa nishcacuna pactarinatapash crinami canchi. Cunan horas na llaquipi cashpapash tal vez jipa punllacunamanga llaquicuna ricurimungami. Shinaca Paul, Janet, Alona ama yapata pinaringapaj imata rurashcata ricupashun.