CALLARI TEMA | TESTIGO DE JEHOVACUNACA ¿PICUNATA CAN?
Testigocunaca ¿imashpata villachin?
Testigo de Jehovacunaca shujcunaman villachishpa purimandami rijsishcacuna can. Paicunaca huasin huasin, ashtaca gentecuna tiaj pushtucunapi, maipi cashpapash villachinajunmi. ¿Imamandata villachin?
Testigocunaca Taita Diosta jatunyachingapaj, paipa shutita gentecuna rijsichunmi villachin (Hebreos 13:15). Shina rurashpami Jesús mandashcata cazunajun. Jesusca nircami: ‘Ñucapa yachajujcuna tucuchun cai pachapa gentecunapaman rishpami villana canguichi. Ñuca yachachishcata pactachichunmi yachachina canguichi’ nishpa (Mateo 28:19, 20).
Ashtahuanbash gentecunata juyaimandami villachin (Mateo 22:39). Ashtaca gentecunami Taita Diospi crinchi nishpa Testigocuna villachijpica na uyangapaj munan. Shinapash, Bibliamanda yachachijpi gentecunata salvarinata ali intindishpami Testigocunaca villachishpa catin. Chaimandami, punda tiempopi Jesusta catijcuna shina ‘Jesusmanda yachachishpa villanataca na saquin’ (Hechos 5:41, 42).
Sociólogo Antonio Cova Maduroca nircami: “Testigo de Jehovacunaca mundo enteropi Bibliamanda villachinamandaca huañuitapash huañunmanmi” nishpa. (Periódico El Universal, Venezuela)
Cai revistata liijcunaca na tucuicuna Testigocuna canllu. Shinallata shuj religionda charij ashtaca ashtaca gentecunamanmi Bibliamanda yachachin. Gentecunaca yachachijpi, visitajpica cushilla sintirin.
Testigo de Jehovacunamanda ashtahuan yachangapaj munashpaca ¿imatata rurai ushapangui?
Testigo de Jehovacunahuan parlapai.
Internetpi www.pr418.com/qvi paginata ricupai.
Testigocunapa tandanajuicunaman ripai. Tucuicunami rita ushan, na culquita mañanllu.