Tucuicunallatami Cushichichun Minishtinchi

¿Huahua cashpa urmashcata yaripanguichu? Urmashpaca maquita o cungurita chugririanguimi. Shinapash quiquinba mamaca ñapashmi japishpa fichachirianga. Chugrijpicarin jambichiriangami. Huacajujpipash ama huacaichu nishpami marcashpa upallayachishcanga. Huahua cajpica tucuicunami cushichingapaj munan.

Shinapash huatacuna yalijpica jatun problemacunami ricurin. Chaimandami pipash cushichichun minishtinchi. Huahua cajpi mama cushichishca, jambichishca cajpipash jatun problemacunapi cashpaca shuj cushijuitami minishtinchi. ¿Ima problemacunapi cashpata cushichichun minishtinchi?

• Huaquinbica trabajo illaj quedashpami ninanda pinarinchi. Julianga trabajomanda llujchijpimi ashtacata llaquirishpa pensarirca: “Cunanga imashinashi ñuca familiataca mantinisha. ¿Imamandata ashtaca huatacunata trabajashca jipaca na sirvijpishna llujchishpa cachahuan?” nishpa.

• Huaquinbica divorciarina tucujpimi ninanda llaquiyanchi. Raquelca ninmi: “Ñuca cusaca huata chaupi huashamanmi cungashcapi jichushpa rihuarca. Shungu faquirijpishnami llaquirircani. Ungushcashnami sintirircani. Manllarishcami carcani” nishpa.

• Huaquinbica ungushcapacha caimanda o na ucha ali tucuimandami llaquilla canchi. Quiquinbash Bibliapi Job shuti runagushna sintirishpachari ningui: “Ñuca causaitaca millanayanmi, napacha unaicaman causangapaj munanichu” nishpa (Job 7:16). Huaquinbica 80 huatacunata charij Luis cuendachari sintiringui. Luisca ninmi: “Huaquinbica huañuna punlla chayamunatalla shuyajuj cuendami sintirini” nishpa.

• Huaquinbica shuj familia huañujpimi llaquirinchi. Robertca ninmi: “Avión accidentepi ñuca churi huañushcata yachashpaca na cri usharcanichu. Jipamangarin Bibliapi nishca shinami, ‘shungupi espadahuan tujsijpishna’ ninanda llaquirircani” nishpa (Lucas 2:35).

Jatun llaquicunapi cashpapash Julianbash, Raquelpash, Luispash, Robertpash Tucui Ushaita Charij Taita Dios cushichijpimi alillata sintirirca. Shinaca ¿imashinata Taita Diosca cushichin? Taita Diosca ¿quiquindapash cushichishpa ayudangachu?