Taita Diospica na crinllu carcani

ÑUCA PUNDA CAUSAI

Ñucaca Sajonia nishca llactapa shuj uchilla pueblogupimi nacirircani. Sajonia llactaca, República Democrática Alemana nishca jatun llactamandami carca. Ñuca huasipica tucuicunami ali, cushilla carcanchi. Ñuca taitamamaca aliguta causanatami yachachihuarca. República Democrática Alemanaca comunista llactami carca. Sajonia llactapi ashtaca gentecunaca, religionga na importanllu ninmi carca. Ñucapash Taita Diospica na crinllu carcani. 18 huatacunata charishpaca, comunistami carcani, Taita Dios tiajtapash na crinllu carcani.

Tucui gentecunami igual cana can yashpami, comunista canataca alicachin carcani. Ashtahuangarin charijcuna, pobrecuna ama tiachunga, tucuicunamanmi tucuita igual partina can nishpa yan carcani. Shinami, comunista jovengunapa grupoman yaicurcani. 14 huatacunata charishpaca, cai Alpata ama huaglichichun nishpami, papelcunata tandachishpa ayudai callarircani. Chaimandami, Aue nishca pueblopi autoridadcunaca shuj premiota cuhuarca. Joven cashpapash, ñuca llactapi importante autoridadcunatami rijsi callarircani. Alitami rurajuni yashpami causarcani. Shamuj punllacunapipash alimi causasha yarcanimi.

Shinapash na shinachu cashcarca. 1989 huatapica, Berlín llactapa jatun pircacunatami urmachirca. Chaimi Europa del Estepi comunistacunapash tucurirca. Shuj shuj cosascunata ricushpami ashtacata llaquirircani. Comunista gentecunaca, comunistata na apoyaj gentecunataca imapash yanga gentecunata shinami tratan carca. Chaimandami ninanda preocuparishpa pensarircani ¿imamandata shina can? ¿Nachu comunistacunaca tucuicunami igual canchi nishpa yachachin? ¿Politicocunapa yanga yuyaicunallachu carca? nishpa.

Shinami comunista canata saquishpa musicata, cuadrocunata pintanata yachajungapaj munarcani. Chaimandami universidadman nara rishpallata musicata, pintanata yachajuna cursocunaman yaicurcani. Ñuca taitamamapa yachachishcacunatapash ladoman saquishpami, ñuca munashcata rurashpa causai callarircani. Ña shuj cuitsahuan purijushpapash, shuj shujhuan purinatami alicachircani. Chashna causaipash, musicapash, pintanata yachajunapash cushilla causachunga na ayudahuarcachu. Ashtahuan llaquirishca, preocuparishcami carcani. Chaimandami ñuca cuadrocunapipash imashina sintirishcata pintan carcani. Chaimandami pensarin carcani ¿imashinata causagrini? ¿Imapata causani? nishpa.

Chai tapuicunata yachajushpaca, shungupash chiriyajtami manllarircani. Shuj chishica, cumbapuracunami shamuj punllacunamanda parlanajurcanchi. Cumbapuracunapica Mandya shuti testigo de Jehovapashmi carca. Paica shuj ali consejota cushpami nihuarca: “Andreas, quiquinba causaimandapash, shamuj punllacunamandapash yachangapaj munashpaca, Bibliatami yachajuna cangui” nishpa.

Ishcai shungumi carcani. Shinapash, ashtahuan yachangapaj munajpimi Mandyca, Daniel libropa capítulo 2​ta ricuchihuarca. Chai textocunata liishpaca manllarishcami carcani. Chaipica, ashtaca autoridadta charij jatun llactacuna ñucanchi punllacunapi imata ruranatami parlajun. Chai jipaca, gentecuna shamuj punllacunapi ima tucunatami Mandyca Bibliahuan ricuchihuarca. Shinami, ñuca siempre yachangapaj munashca tapuicunata yachajurcani. Shinapash pensarircanimi, shamuj punllacunapi ima pasanataca ¿pita Bibliapica escribirca? ¿Pita cabalta nita usharca? Tucui chaicunaca ¿Taita Dios tiajtachu ricuchijun? nishpa.

BIBLIAMI ÑUCA CAUSAITA CAMBIASHCA

Horsttapash, paipa huarmi Angelikatapashmi Mandyca risichihuarca. Paicunami Bibliata ashtahuan aliguta intindichun ayudahuarca. Ñapashmi cuenta japircani, testigo de Jehovacunalla Taita Diospa shutita utilizajta, chai shutita shujcunamanbash yachachijta (Salmo 83:18, NM; Mateo 6:9). Shinallata, cai Alpa shuj paraíso tucujpi gentecuna para siempre causanatami yachajurcani. Salmo 37:9​pica ninmi: “Mandaj Diosta shuyajcunami, llactataca japinga” nishpa. Taita Diospa munaita rurajcuna chashna causaita chari ushanata yachajushpami, ninanda cushijurcani.

Ñuca causaipi cambiangapaj, Bibliapi mandashca shina causangapaca shinllimi carca. Músico, pintor cashcamandaca jariyashcami carcani. Chaimandami humilde canata yachajuna tucurcani. Ashtahuangarin, shuj shuj huarmicunahuan purinata saquinapash shinllimi carca. Jehová Dios paipa mandashcacunata pactachingapaj esforzarijcunata na ñapash fiñarishpa, llaquishpa, juyashpa tratashcamandaca, tucui shunguhuanmi agradicini.

18 huatacunacaman comunista yuyaicunata charijpi, Taita Dios tiajta na crijpipash, Bibliami chai huatamanda vichaimanga ashtacata ayudahuashca. Bibliapi yachajushcacunami, ñuca causaipipash, shamuj punllacunamanda ama yapata preocuparichunbash ayudahuashca. Shinami, 1993 huatapi bautizarishpa testigo de Jehová tucurcani. 2000 huatapica, shuj cushilla paniguhuanmi cazararcani. Paica Tabitha shutimi capan. Ishcandimi Biblia imata nijta gentecunaman yachachingapaj tucui shunguhuan esforzarinchi. Huaquingunaca ñucashnallata comunistacuna, Taita Dios tiajta na crijcunami can. Paicunapash Jehová Diosta rijsichun ayudashpami cushijushcapacha cani.

IMASHINATA BENEFICIARISHCANI

Testigo de Jehovacunahuan yachajui callarijpica, ñuca taitamamacunaca na ashta alicachircachu. Shinapash tiempohuanga, Bibliata yachajuna ñucapallata ali cajtami cuenta japirca. Cunanbica, paicunapash Bibliata yachajushpa, testigo de Jehovacunapa tandanajuicunaman rijta ricushpami ninanda cushijuni.

Ñuca huarmigupash, ñucapash Bibliapi mandashcata pactachingapaj esforzarishpami, ñucanchi cusahuarmi causaipica cushilla causanajupanchi. Bibliapica mandanmi, canba huarmihuanlla, cusahuanllami causana canguichi nishpa. Chai consejota pactachimandami ali causanchi (Hebreos 13:4).

Cunanbica ñuca causaimanda, shamuj punllacunapi ima pasanamandaca ñana preocuparijunichu. Mundo enteropi ashtaca huauquicunata, panicunatami charini. Tucuicunahuanmi shujllashna tandanajushca, tranquilo canchi. Mundo enteropi huauquipanicunami igual canchi. Chai yuyaihuanmi viñarcani. Chai yuyaitaca siempremi pactachingapaj munashcani.