¿Imata carajpita ashtahuan cushijushcanchi?

Bibliapica ninmi: “Taita Diosca, jahua pachamandami juyailla aliguta imatapash na pandashpa rurachun caramujun” nishpa (Santiago 1:17). Cai textopi yachachishca shinaca, jahua pachapi tiajuj ñucanchi Taita Diosca, imatapash na mitsashpami caran. Paipa tucuilla carashcacunamandaca ¿imatata ashtahuan valishcata carashca? Juan 3:16​pica Jesusca nircami: ‘Taita Diosca, cai pachapi causajcunata ninanda juyashpami, paipaj shujlla Churita caramurca. Pipash paita crishpaca, na chingaita chingagringachu, causaitami causagringa’ nishpa.

Shinaca, paipa Churipa causaitami Taita Diosca carashca. Chaimi ñucanchipaca ashtahuan valishca regalo can. Jesús paipa causaita cushcamandami juchamandapash, rucuyashpa huañunamandapash salvarita ushanchi (Salmo 51:5; Juan 8:34). Ñucanchillata juchamanda, huañuimanda salvaritaca nunca na ushanchimanllu carca. Shinapash Jehová Diosca ñucanchita ninanda juyaimandami, paipa shujlla Churita ñucanchimanda huañuchun saquirca. Shinami, Jehová Diosta cazuj gentecunaca para siempre causana oportunidadta charin. Shinapash ¿imashinata Jehová Diosca Jesuspa causaita cushpa gentecunataca juchamandapash, huañuimandapash randinshna salvaita usharca? ¿Imamandata chaita ruranaca minishtirishca carca? ¿Ima bendiciongunatata chari ushapanchi?

Jehová Diosca Jesuspa causaita cushpami, huatashcashna causanajuj gentecunataca, imatapash pagashpa randinshna salvarca. Bibliapica ninmi, Taita Diosca Adán y Evataca jucha illajtami rurarca nishpa. Paicunapa huahuacunandimi shuj juyailla paraíso Alpagupi para siempre causaita ushana carca (Génesis 1:26-28). Shinapash, Adán y Evaca Taita Diosta na cazushpami juchayucuna tucurca. Chaimanda ¿ima llaquicunata tiarca? Bibliapica ninmi: ‘Juchata ruranaca, shujlla runamandami cai pachapica callarirca. Chai juchamandami, huañuipash callarirca. Juchata rurashcamandami huañuipash tucuicunapaman yalijun’ nishpa (Romanos 5:12). Paipa huahuacunaman jucha illaj causaita caranapa randica, juchata, huañuitami Adanga saquirca.

Jehová Diosca Jesuspa causaita cushpami, Adán imata chingachishcataca randinshna pagarca. Adanga Taita Diosta na cazushpami, jucha illaj causaitaca chingachirca. Chaimandami paipa huahuacunapash juchaman, huañuiman jatushcashna quedarca. Salvaringapaca, Jesús paipa jucha illaj causaita cuchunmi minishtinajurca (Romanos 5:19; Efesios 1:7). Taita Dios paipa Churipa causaita na cushca cajpica, pipash paraíso Alpagupi para siempre causana oportunidadtaca na charinchimanllu carca (Apocalipsis [Revelación] 21:3-5).

Imashinami ricupashcanchi, Jesuspa causaita cushpami Jehová Diosca “alipacha regalota” carashca. Chaimandami para siempre causaita ushashun. Shinapash ¿imamandata Jesuspa causaica ashtahuan alipacha regalo cashca? Chaipaca, ñaupa temapi yachajushca chuscu yuyaicunata yaripashun.

Ñucanchi munajushcatami curca. Gentecunaca tucuicunallatami ñucanchi shungupica, para siempre causana munaita charinchi (Eclesiastés 3:11). Ñucanchimandallata para siempre causaitaca na ushanchichu. Shinapash, Jesús paipa causaita cushcamandami, para siempre causaita ushanchi. Bibliapica ninmi: “Juchata rurashpa causajcunamanga, huañushpa chingagrinatami cujun”. Cutin “Jesusmandami, causaita causagrinata Taita Diosca yanga caramujun” nishpa (Romanos 6:23).

Ñucanchi minishtijushcatami cun. Juchamanda, huañuimanda salvaritaca pipash na usharcanchichu. Bibliapi nishca shinaca juchamanda, huañuimanda salvaritaca shujllapash na ushanllu (Salmo 49:7). Ñucanchicunaca juchamanda, huañuimanda Taita Dios salvachunmi minishtinajurcanchi. Chaimandami Taita Diosca, Jesuspa causaita cushpa ñucanchitaca ‘quishpichirca’ (Romanos 3:23, 24).

Ima hora ashtahuan ali cajta ricushpami curca. Bibliapica ninmi: “Ñucanchi juchayu cajpipash, Cristomi ñucanchimanda huañurca” nishpa (Romanos 5:8). Ñucanchicuna ‘juchayucuna cajpipashmi’, Taita Diosca paipa Churipa causaita curca. Shinaca, juchayucuna cajpipash, ñucanchita ninanda juyaimandami, paipa Churipa causaitaca curca. Juchayucuna caimanda llaquicunata charishpapash, Jesús paipa causaita cushcamandami, shamuj punllacunapica ali causai tiana esperanzata charinchi.

Na mitsashpa, carana munaihuanmi cararca. ¿Imamandata Taita Diosca paipa Churipa causaita curca? Bibliapica ninmi: “Causaita causagrinata ñucanchi japigrichunmi Taita Diosca, paipaj shujlla Churita cai pachaman cachamushpa, ñucanchita juyajushcata ricuchirca. Ñucanchica, Taita Diosta na juyashpami causarcanchi. Ashtahuangarin pairami ñucanchita juyarca” nishpa (1 Juan 4:9, 10).

Jesuspa causaita carashcamanda agradicishpaca ¿imatata rurana capanchi? Juan 3:16​pica ninmi, Jesuspi ‘crijcuna’ o Jesuspi feta charijcunaca salvaringami nishpa. Hebreos 11:1​pi nishca shinaca, feta charijcunaca, ‘imata japigrinata crishcatapash, chaitaca japigrishapacha yashpami shuyanajun’ nishpa. Bibliapi nishca shina, tucui shunguhuan cringapaj munashpaca, Bibliapi cabal yachachishcacunatami yachajuna capanchi. Chaimandami, asha tiempoguta llujchishpa, Jesuspa causaita carashca Taita Diosmanda yachajuchun, shinallata Jesús paipa causaita cushcamanda paraíso Alpagupi ima bendiciongunata charinata yachajuchun animapanchi.

Bibliapi cabal yachachishcacunata yachajungapaj munashpaca jw.org direccionman yaicushpami ricunalla capangui. Testigo de Jehovacunaca cushijushpami ayudapashun. Jesús paipa causaita cushcamanda ashtahuan yachajushpa, shinallata ima bendiciongunatalla charinata yachajushpaca quiquinbashmi cashna ningapaj ‘Taita Diostaca ñucanchi Jesucristomandami pagui nijuni’ nishpa (Romanos 7:25).