Pandarishpaca ¿imatata rurai ushanchi?

Donbash paipa huarmi Margaretpasha paicunapa ushi, cusandi, huahuacunandi visitangapaj rijpimi, ninanda cushijushca carca. Margaretca, alipachami yanunataca yachan carca. Huahuacuna ña tigragrinajujpica, Margaretca nietocuna gushtashca micunata yanushpami fideocunata queso salsahuan shinajurca.

Tucuicuna tianajuj mesapi mangata churashpa tapata alzajpica, queso salsallami tiajushcarca, fideocunata churanataca cungashcarcami.

Mashna huatacunata charishpa o mashnata yachashpapash tucuicunami huaquinbica nali pensarishpa imagutapash ninchi, na rurana ratocunapi imagutapash ruranchi o imatapash cunganchi. Shinapash ¿imamandata pandarinchi? Pandarishpaca ¿imatata rurashun? Ama yapata pandaringapaca ¿imatata rurai ushapanchi? Ricupashun.

ÑUCANCHICA ¿IMATA YUYANCHI? CUTIN ¿IMATATA TAITA DIOSCA YUYAN?

Imatapash alimi rurarcani yashpaca, pipash ali shimicunata nishpa felicitajpica cushijushpami uyanchi. Cutin imapipash pandarishpaca, shujcuna ricujpi o na ricujpi, culpata charishpa o na charishpapash, pandarishcanimi ninaca shinllimi can. Pandarishcanimi ningapaca, humilde canami minishtirin.

Jariyashcacuna cashpaca, ñucanchicuna pandarishcataca na intindingapaj munashunllu, huaquinbicarin shujcunatarami culpashun. Jariyashcacuna caimandami problemacunata arreglaitaca na ushashun, shuj gentecunatara yangamanda juchachishun. Chai ratopi llaquicunata na charijpipash Bibliapica ninmi: ‘Tucuicunami imata rurashcata Taita Diosman ricuchigrinata charinguichi’ nishpa (Romanos 14:12).

Taita Diosca ñucanchicuna imashina cajtaca alimi yachan. Bibliapica ninmi: ‘Mandaj Diosca ninanda llaquij, ali shungumi’ can nishpa. Shinallata ninmi, Taita Diosca “na unaicaman fiñangachu. Fiñarishcataca, na causaita causaicaman charijungallachu” nishpa. Paica, ñucanchicuna ‘ñutu alpa cajta yarishpami’ ñucanchicuna imapi pandarijlla cashcataca ali yachan (Salmo 103:8, 9, 14).

Taita Diosca llaquij Dios cashcamandami, ñucanchicunapash paipa ejemplota catichun munan (Salmo 130:3). Ñucanchillata pandarishpa ama yapata llaquirinajuchun, shujcuna pandarijpipash aguantachunmi Bibliapica ashtaca ali consejocunata cushca.

PANDARISHPACA ¿IMATATA RURAI USHANCHI?

Pandarishpa, shujcunatara culpashpa, o pretextocunata churajcunaca yangami shaijun, tiempotapash chingachin. Chaipa randica, imatapash nishpa pitapash llaquichishca cashpaca, disculpahuai nishpa, chai problemata arreglangapaj esforzarishpa, ali llevarishpa catinami ashtahuan ali can. Cutin, quiquinmandallata llaqui apashpa, o quiquin pitapash llaquichishca cashpaca, quiquinllata nali sintirijunapa randi o pitapash culpajunapa randica uchallami chai problemata arreglana capangui. Na culpata charircanichu nijushpaca, yangami ashtahuan preocuparishpa, problematapash mirachingui. Ashtahuangarin, cutin ama chashna pandaringapaj esforzarishpami mejor ucha cungana can.

Shujcuna pandarijpica ratomi ashata culiranchilla. Shinapash Jesusca nircami: ‘Shuj gentecuna imatapash aliguta cangunaman rurachun munashpaca, chashnallatami cangunapash shujcunaman aliguta rurana canguichi’ nishpa (Mateo 7:12). Imagupipash ñucanchicuna pandarijpica, shujcuna llaquishpa tratachun o cungachunmi munanchi. Shinaca, ñucanchicunapash chaita rurashpami ali canchiman (Efesios 4:32).

AMA YAPATA PANDARICHUNGA ¿BIBLIAPI IMA TEXTOCUNATA AYUDAN?

Shuj diccionariopica ninmi, na aliguta pensarimanda, na tucuita ali yachaimanda, o na yaipi caimandami pandarin nishpa. Chaimandami tucuicunallata imagupipash pandarishcanchi. Shinapash, ama yapata pandaringapaca Bibliapi textocuna imata nijtami yarina capanchi.

Proverbios 18:13​pica ninmi: “Narapash uyashpata imatapash tigrachijlla runaca, muspa runashnami nalicachishpa rimai tucun” nishpa. Shinaca, ama imatapash yangata ningapaj o rurangapaca aliguta uyashpami, imatata ruragrini o nigrini nishpa pensarina capashcanchi. Ama pandacunata intindingapaca aligutami uyana capanchi.

Romanos 12:18​pipash ninmi: “Canguna rurai ushanalla cajpica, tucuicunahuan casilla aligutami causana canguichi” nishpa. Shinaca tucuicunahuan shujllashna tandanajushca, tranquilo cangapami esforzarina capangui. Shujcunahuan trabajajushpaca, paicunata llaquishpa, respetashpami tratana capangui. Paicunata felicitanata, animanataca yaipi charipangui. Shinami, imatapash nishpa o rurashpa llaquichirishca cashpapash randimanda jahualla perdonaringuichi. Ninanda pandarishpapash, alimanmi chai problemataca arreglai ushanguichi.

Imagutapash nishpa o rurashpa pandarishpaca na pretextocunata churajunachu capangui. Chaipa randica imapi ashtahuan mejorana cashcatami ricuna capangui. Huaquinbica pacienciata charinata, llaquishpa tratanata, jarcarinata, shujcunahuan tranquilo ali causanata, juyaihuan tratanatami ashtahuan yachajuna canchi (Gálatas 5:22, 23). Cutinba imata na rurana cashcatapashmi yachajungui. Pandarishcamandaca na yapata llaquirijunachu capangui. Shinapash, imapash tucuchunga na saquinachu capangui. Imapipash pandarishpaca mejor asishpa, na culirashparapashmi ali can.

¿IMASHINATA ÑUCANCHITA AYUDAN?

Pandarishpaca na yapata preocuparijunachu cashcanchi, yangatapash na saquinachu cashcanchi. Shinami pandarishpaca, shujcunahuan ali llevarishun, ñucanchipash ali sintirishun. Imamanda pandarishcata cuenta japishpa, cutin ama pandaringapaj esforzarishpaca, ali yachajushcacunami cashun, ashtahuan cushillami sintirishun. Ashtahuangarin, pandarircanimi nishpaca na yapata llaquirinajushunllu. Shujcunapash pandarijlla cashcata intindishpami paicunahuanbash ali llevarishun. Ashtahuangarin, Jehová Diospa ejemplota catishpami shujcunata perdonana munaita charishun (Colosenses 3:13).

Callari parrafocunapi parlashca, Margaret pandarishcamandaca ¿imata pasarca? Nima na pasarcachu. Fideocuna illaj yanujpipash, tucuicunami asishpa, cushijushpa micunajurca. Margaretpash na llaquirijurcachu. Huaquin huatacuna yalijpipash, cushijushpami nietocunaca paicunapa huahuacunaman ima pasashcata parlanajurca. Margaretca pandaritallami pandarirca.