¿Maijan profeciacunata pactarishca?

Ñaupa temapi nishca shinaca, Delfos nishca templopi curata crimandami rey Cresoca Persiamanda reyhuan macanajungapaj rishpa tucuchi tucurca. Shinapash Bibliapica, Persia llactamanda rey ima tucunatami ña villajurca. Chaica tucuipimi pactarirca.

Persia llactamanda rey naciringapaj 200 huatacuna faltajujpillatami, profeta Isaiasca villarca, Persia llactamanda rey Ciromi Babilonia jatun llactata tucuchinga nishpa.

Isaías 44:24, 27, 28. ‘Mandaj Diosca cashnami nin: “Ucu ucupi tiaj yacucunatapash: Chaquirichi ninimi. Cambi tiaj jatun yacucunatapash: Chaquichishami ninimi. Ciro shuti mandajmandapash, cashnami nini: Paimi ñuca llamacunata michij canga. Tucui ñuca munashcatami ruranga. Jerusalendaca cutin alichi tucunguimi nijpi, ñuca huasitapash shayachi tucunguimi” nijpimi, chashna canga’ ninmi.

Grecia llactamanda Heródoto historiador nishca shinaca, rey Ciropa soldadocunami, Babilonia llactata yalijuj Éufrates nishca yacucunataca, shuj ladota cacharca. Chaimi rey Ciropa soldadocunaca chai yacucunata purishpa, Babilonia llactaman yaicurca. Chai jipami rey Ciroca, Babiloniaman apai tucushca judiocunata libre saquishpa, Jerusalenman tigrachun saquirca. 70 huatacunata tucuchi tucushca cajpipash, Jerusalenda cutin shayachichunmi saquirca.

Isaías 45:1. ‘Mandaj Diosca Ciro shuti paipa mandajtaca, cashnami nin: “Paitaca, paipa ali lado maquimanda aisashpami, shuj llactacunapi causajcunata, paipa ñaupajpi cazuchijuchun, jatun mandajcunatapash anchuchijuchun apamurcani. Paipa ñaupajpimi, pueblo pungucunatapash pascanajunga. Chai pungucunaca, na ashtahuan vicharingachu”’.

Babiloniaman yaicuna pungucunata cungashpa pascaria saquijpimi, Persia soldadocunaca jahualla yaicurca. Rey Ciro atacagrijushcata yachashpaca, Eúfrates yacucunata rishpa yaicunalla pungucunataca na pascaria saquinmanllu carca.

Isaías 45:1​pi shimicunapash, shuj shimicunapash tucuipimi pactarishca.a Gentecunaca dioscuna ayudajpimi ima pasanata ricushpa villanchi nin. Shinapash, Bibliapi villashcacunata o profeciacunataca Taita Diosmi curca. Paica ninmi: “Jipa punllacuna ima tucunatapash, ñucami callarimandapacha villani. Nara imapash tiajpillatami, pundamandapacha villarcani” nishpa (Isaías 46: 10).

Jehová Dioslla ciertopacha Taita Dios caimandami, chai shimicunataca nita ushan. Paipa shutica “ima tucuna cashpapash tucunalla cashcatami” ricuchin. Shinaca Jehová Diosllami jipacunaman ima pasanata villaita ushan, paipa munaita pactachitapash ushan. Pai ima nishcataca maimandami pactachinga.

CUNANBI PACTARINAJUJ PROFECIACUNA

Cunan punllacunapi maijan profeciacuna pactarinata yachangapaj ¿munapanguichu? 2.000 huatacuna huashamanmi Bibliapica villajurca “tucurimui punllacunapica” jatun llaquicunami tianga nishpa. ‘Tucurimui punllacuna’ nishpaca ¿cai Alpa tucurinata o gentecuna tucurinatachu nijun? Na. Ashtaca huatacunata gentecuna charishca llaquicuna tucurinatami nijun. Shinaca cai tucurimui punllacunapi maijan profeciacuna pactarijujta ricupashun.

2 Timoteo 3:1-5. ‘Tucurimui punllacunapica paicunalla ali cangapaj munajcuna, charijyangapaj munajcuna, jariyashpa jatun tucujcuna, Diostapash rimajcuna, taitata, mamatapash na cazujcuna, na pagui nijcuna, Diostapash na manllajcunami tianga. Na juyajcuna, ali tucungapaj na munajcuna, juchachijcuna, ima munashcata rurajcuna, na llaquijcuna, ima alitapash na ricunayachijcunami tianga. Umachijcuna, imamandapash ninanda jariyajcuna, Taita Diostapash na juyashpa, yanga cushijushpa causanatalla juyajcunami tianga. Ñavi ricuipica, Diosta juyanshnalla ricurishpapash Diospa ushaitaca na charingachu’.

¿Chashna gentecuna miranajujta ricupashcanguichu? ¿Nachu paicunapilla o culquipilla pensarij jariyashca gentecunata ricupashcangui? ¿Nachu shujcunata na uyangapaj munashpa paicunapa nishcahuan yalingapaj munaj gentecunata ricupashcangui? Ashtahuan ashtahuanmi ricupashcanchi, gentecunaca Taita Diosta juyanapa randi paicunalla cushijushpa causanajujta, huahuacunapash taitamamata na cazujta.

Mateo 24:6, 7. ‘Jatun macanajuicunapash shamugrinmi ninajujtapashmi uyanguichi. Shuj llactapi mandajcunahuan, chaishuj llactapi mandajcunahuanmi macanajunga’.

Huaquin estudiocuna nishca shinaca, guerracunamanda, llactacunapi problemacuna tiaimandami 1914 huatamandaca 100 millón yali gentecuna huañushca. Chaimandami ashtaca gentecuna ninanda sufrishca. Shinapash ¿guerracunaca tucurishcachu?

Mateo 24:7. ‘Ninan yarcaipashmi tianga’.

Programa Mundial de Alimentos nishca organizacionga nircami: “Cai mundopica tucui gentecuna micuchunmi, micunaca mashnapash tian. Shinapash 815 millón gentecunami imagutapash na micushpa pacarin. Ashtahuangarin cada quimsa gentemanda shujmi nali micuimanda ashata ungushca can” nishpa. Más o menos cada huatami quimsa millón yali huahuacuna yarjaimanda huañun.

Lucas 21:11. ‘Alpaca ninandami chujchunga’.

Cunangunapica 50.000 viajetami Alpa mamaca chujchushca. Gentecunaca sintishcami. Huaquinbicarin Alpa chujchujpimi, edificiocunapash huaglishca, urmashca. Ashtahuangarin, casi cada huatami shuj jatun terremoto tian. Cuentata rurajpica, 1975manda 2.000 huatacamanga 471.000 gentecunami terremotocunapi huañushca.

Mateo 24:14. “Taita Dios mandajujmanda cai ali villaitaca, cai pachapi tiaj tucui llactacunapi causajcuna yachachunmi villanajunga. Chai jipami, tucurimuica chayamunga”.

Cunangunapica, 8 millón yali testigo de Jehovacunami Taita Diospa Reinomanda ali villaicunataca, 240 yali llactacunapi villachinajun. Jatun llactacunapi, pueblocunapi, sachacunapi, urcucunapi, mundo enteropi gentecunamanmi villachinajun. Mateo 24:14​pi nishca shinaca, Taita Dios caicamanlla villaichi nijpimi “tucurimuica” chayamunga. Shinaca, gobiernocuna mandana punllacuna tucurijpimi, Diospa Reinoca mandai callaringa. Diospa Reino mandajpica ¿ima profeciacunata pactaringa? Chaita yachangapaca cati tematapash liishpa catipai.