Quiquinga para siempremi cai Alpapi causaita ushapangui

CHASHNA CAUSANACA ALIPACHAMI CAN. Taita Diosca nishcami, gentecunaca para siempremi cai Alpapillata causanga nishpa. Shinapash ashtaca gentecunaca na crinllu. Paicunaca yanmi, cunan cashpa o caya cashpapash tucuicunallatami huañuringa nishpa. Cutin shujcunaca ninmi, huañushca jipa cieloman rishpallami para siempre causaitaca usharinga nishpa. Quiquinga ¿imatata yuyapangui?

Nara contestashpallata cai tapuicunapi pensaripai: “Gentecuna alipacha rurashca cashcamandaca ¿mashna tiempotata causana carcanchi? Taita Diosca ¿imapata gentecunatapash cai Alpatapash rurarca? ¿Imamandata huañunchi?”. Shinaca Biblia imata nijta ricupashun.

GENTECUNACA ALIPACHA RURASHCAMI CAPANCHI

Taita Diosmi plantacunata, animalcunata, gentecunata rurarca. Shinapash Bibliapi nishca shinaca, gentecunatallami Taita Diosca paiman rijchata rurarca (Génesis 1:26, 27). Chaimandami gentecunaca, Taita Dios imashina cajta ricuchishpa, juyaita, alita ruraita ushanchi.

Ashtahuangarin, aliguta pensarichun, ima ali cajta ima nali cajta agllai ushachun, paita rijsina, paipaman quimirina munaita charichunmi Taita Diosca gentecunata rurarca. Shina rurashcamandami, planetacuna, ashtaca estrellacuna tiajta yachajushpa, cai Alpapi juyailla rurashcacunata ricushpa, juyailla cuadrocunata ricushpa, musicacunata uyashpa ninanda cushijunchi. Ashtahuanbachaca ñucanchita Ruraj Taita Diostami adorai ushanchi. Shinaca, imapash plantagushna, animalgushnaca na capashcanchichu.

Pensaripai: Huaquin huatacunatalla causachun munashca cashpaca ¿imamandata imatapash ashtahuan ali rurana ushaihuan gentecunataca rurarca? Taita Diosca gentecuna cai Alpapi para siempre causachun munashpami shina rurarca.

CALLARIPICA ¿IMATATA TAITA DIOSCA MUNARCA?

Huaquingunaca ninmi, Taita Diosca gentecuna cai Alpapi para siempre causachunga nunca na munashcachu nishpa. Shina yuyashpami nin, picuna paihuan para siempre jahua cielopi causanata ricungapami cai Alpata rurarca nishpa. Chai yuyai cierto cashpaca, Taita Diosmi cai Alpapi tucui llaquicunamandaca culpata charinman. Shinapash chaica na ciertochu can. Bibliapica ninmi: ‘Paipa rurashcacunaca, ima pandapash illajmi. Paica na llullaj Taita Diosmi. Paipica ima nalipash na tianllu. Paica alitalla ruraj Diosmi’ can nishpa (Deuteronomio 32:4).

Bibliapica ninmi: ‘Jahua pachaca Mandaj Diospami. Cai pachata [o cai Alpataca] runacunamanmi cushca’ nishpa (Salmo 115:16). Shinaca, gentecuna para siempre cai Alpapi causachunmi Taita Diosca cai Alpata rurashca. Ashtahuangarin gentecuna imata ruranata yashpa, cushilla para siempre causachunmi, cai Alpapica tucui ima minishtirishcata churarca (Génesis 2:8, 9).

‘Jahua pachaca Mandaj Diospami. Cai pachata [o cai Alpataca] runacunamanmi cushca’ (Salmo 115:16).

Bibliapi nishca shinaca, Adán y Evataca Taita Diosca nircami: “Cai pachapi jundanguichi. Cai pachapi imalla tiajcunata cazuchinguichi. [...] Alpapi causaj tucuilla animalcunatapash mandanguichi” nishpa (Génesis 1:28). Adán y Evaca cai Alpata cuidashpa, shuj juyailla Paraisoguta rurana alipacha trabajotami charirca. Ashtahuangarin, huahuacunandimi cai Alpapi para siempre causaita ushana carca, na jahua cielopichu causana carca.

¿IMAMANDATA HUAÑUNCHI?

Bibliapica ninmi, Taita Dios rurashca shuj angelmi Taita Diosta na cazushpa, Taita Diospa munai ama pactarichun jarcangapaj munarca nishpa. Chai angeltami jipamanga Satanás nirca. Taita Diospa munai ama pactarichunga ¿imatata Diablo Satanasca rurarca?

Diabloca Adán y Evapash paita apoyachunmi nirca, Taita Diosca ima ali cashcataca na cangunaman cungapaj munanllu, cangunallatami ima ali cajta ima nali cajtaca ricuna canguichi nishpa. Chaita crishpami Adán y Evaca Taita Diosmanda caruyashpa Diablopa lado tucurca. Chaimi tiempohuanga, Taita Dios nishca shina, Adán y Evaca huañurca, paraíso Alpagupi causana oportunidadtapash chingachirca (Génesis 2:17; 3:1-6; 5:5).

Adán y Eva na cazushcamandami cunangaman llaqui apanchi. Bibliapica ninmi: ‘Juchata ruranaca, shujlla runamandami cai pachapica callarirca. Chai juchamandami huañuipash callarirca. Tucuicuna juchata rurashcamandami huañuipash tucuicunapaman yalijun’ nishpa (Romanos 5:12). Shinaca, na Taita Dios munashcamandachu huañunchi. Adán y Evapa culpamandami juchayucuna nacirinchi, huañunchipash.

QUIQUINGA PARA SIEMPREMI CAI ALPAPI CAUSAITA USHAPANGUI

Adán y Eva na cazujpipash, cunangamanmi Taita Diosca gentecuna shuj paraíso Alpagupi para siempre causachun munan. Juyaj, alitalla ruraj Taita Dios caimandami gentecunataca juchamanda huañuimanda salvangapaj munarca. Bibliapica ninmi: ‘Juchaca huañushpa chingagrinatami cun. Ashtahuangarin Jesusmandami, causaita causagrinata Taita Diosca caramujun’ nishpa (Romanos 6:23). Gentecunata ninanda juyaimandami Taita Diosca ‘paipa shujlla Churita caramurca. Pipash paita crishpaca, na chingaita chingagringachu, causaitami causagringa’ (Juan 3:16). Jesús paipa munai paipa causaita cushcamandami ñucanchicunaca Adán y Eva imata chingachishcata cutin charishun.a

Ñallami Taita Dios munashca shina, cai Alpaca shuj paraíso Alpagu canga. Shamuj punllacunapi chaipi causangapaj munashpaca ¿imatata rurana capangui? Jesusca nircami: “Quichiji pungutami, yaicuna canguichi. Chingaita chingachun pushajuj punguca anchomi, ñambash anchomi. Chaitaca, ashtaca gentecunami yaicushpa purinajun. Ashtahuangarin causaita causangapaj yaicuna punguca quichijimi, ñambash quichijimi. Chai ñandaca, huaquingunallami tarin” nishpa (Mateo 7:13, 14). Shinaca quiquinmi shamuj punllacunapi imashina causanataca agllaita ushapangui.