Taita Diosca ¿Ima Shutita Can?

Pitapash rijsingapaj munashpaca nachu, ima shutita capangui nishpara parlai callaripanchi. Taita Diosta shina tapujpica ¿imatashi paica ninman?

“Ñucaca, Jehová Dios shutimi cani” (Isaías 42:8, NM).

¿Chai shutita uyapashcanguichu? Bibliata traducij ashtaca gentecunaca Diospa shutita yachashpapash, huaquinbillami Bibliapica churashca. Casi siempremi Diospa shutita churanapa randica MANDAJ DIOS o SEÑOR nishpa churashca. Shinapash, Bibliata escribishca shimicunapica, Taita Diospa shutica 7 mil yali viajecunatami escribishca tiajurca. Chai shutica hebreo shimipi chuscu letracunahuanmi escribishca tiajun, chai letracunaca YHWH o JHVH letracunami can. Chaitaca “Jehová” nishpami español shimipica, ashtaca huatacunata traducishca.

Diospa shutica texto hebreo nishcapi, Bibliapa shuj traducciongunapipashmi ricurin.

TAITA DIOSPA SHUTITA YACHANACA ¿IMAMANDATA MINISHTIRISHCA CAN?

Taita Diosca yachachunmi munan. Taita Diosca paillatami paipa shutitaca churarirca. Chaimi Éxodo 3:15​pica nirca: ‘Chaimi, causaita causaicaman ñuca shuti canga. Ñucataca cai shutipimi, causaita causaicaman rijsinajunga’ nishpa. Taita Diostaca Tucui Ushaita Charij, Taita, Señor, Mandaj Dios nishpa rijsishpapash, Bibliapica Diospa shutitaca tauca viajecunatami escribishca. Abrahán, Moisés, David, Jesús nishca shuticunatapash yalimi escribishca tiajun. Taita Diosca paipa shutita yachachunmi munan. Bibliapica ninmi: “Cambaj shutica, Mandaj Dios [Jehová] shuti cajta, jahua pachapi causajuj can Dioslla, tucui cai pachata mandajujta yachanajuchun, chashna rurapangui” nishpa (Salmo 83:18).

Jesusca Taita Diospa shutita yachachunmi munan. Padrenuestro oracionbica, Jesusca paipa catijcunataca Taita Diosta cashna mañanatami yachachirca: “Cambaj jucha illaj shutiguca, alicachi tucushca cachun” nishpa (Mateo 6:9). Jesusllatami cashna mañarca: “Canba shuti punchapambagu cajtaca ricuchipayari ñuca Taitalla” nishpa (Juan 12:28, NM ). Jesuspaca, Diospa shutita alicachinaca minishtirishcapachami carca. Chaimandami “Paicunamanmi, cambaj shutitaca ña rijsichircani, ashtahuan rijsichisharami” nirca (Juan 17:26).

Taita Diosta sirvijcunapaca minishtirishcami can. Punda tiempopi Diosta sirvijcunaca, Diospa shutipi mañashpa salvari ushanataca alimi yacharca. Chaimi Diosta sirvij shuj runaguca Proverbios 18:10​pica nirca: “Mandaj Diospaj [Jehová] shutica, shinlli torreshnami. Imatapash cashcatapacha ruraj runa paipajman calpajpica, ayudangallami” nishpa. Shuj runagupashmi Diospa shutimandaca cashna nirca: “Mandaj Dios [Jehová] ñucata tucui mañajcunallami quishpiringa” nishpa (Joel 2:32). Bibliapica Diosta sirvijcunaca Diospa shutipimi rijsi tucushcacuna canga ninmi. ‘Tucui gentecuna, paicunapaj diospa shutipi mañashpa purinajujpipash, ñucanchica ñucanchita Mandaj [Jehová] Diostami, causaita causaicaman cazushpa purinajushun’ nin (Miqueas 4:5; Hechos 15:14, NM ).

DIOSPA SHUTICA ¿IMATATA NINGAPAJ MUNAN?

Shujlla Taita Dios cashcatami ricuchin. Ashtaca Bibliata estudiashcacunaca, Jehová shutica “ima tucuna cashpapash tucunalla cashcatami” ricuchin nin. Jehová Dios paipa shutimanda Moisesman parlashcata yachanami, Diospa shuti ima cashcata intindichun ayudan. Taita Diosca nircami: ‘Ñucami cani. Ñuca, ñucallatami cani’ nishpa (Éxodo 3:14). Shinaca paipa shutica pai Tucuita Ruraj Dios cashcata, tucui ima tiashcatapash pai rurashcatami ricuchin. Shinallata pai ima tucuna minishtirijpipash tucunalla cashcata, paipa munaita pactachingapaca, paipa rurashcacunatapash pai munashcashna utilizajtapashmi ricuchin. Pailla Tucuita Ushaj, Tucuita Mandaj, Tucuita Ruraj cashpapash pai imashinapacha cashcataca paipa shutillami ricuchin.

Gentecunata juyashcata ricuchingapami munan. Diospa shutica, paipa tucui rurashcacunata, gentecunatapash ninanda juyashcatami ricuchin. Ñucanchicuna na tapujpillatami, Taita Diosra paipa shutita ñucanchiman villarca. Chaica paimanda yachajushpa, paipaman quimirichun munashcatami ricuchin (Salmo 73:28).

Shutipi rimashpaca paita rijsingapaj munashcatami ricuchinchi. Yuyapai, pihuanbash ali amigo cangapaj munashcanguiman, ñuca shutipi rimahuai nijpita na shutipi rimangapaj munajpica ¿nachu paica na ñuca amigo cangapaj munanllu yarin nishpa llaquiringuiman? Jehová Diosca paipa shutitaca ñami villashca, paipa shutipi parlashpaca paita rijsingapaj munashcatami ricuchishun. Bibliapica Diospa shutipi yuyajcunataca Taita Dios ricujushcatami nin (Malaquías 3:16).

Taita Diosmanda yachajui callaringapaca paipa shutita yachanaca minishtirishcami can. Shinapash Taita Dios imashina cashcata, imamanda chai shutita charishcatapash ashtahuan yachajushpami catina capanchi.