Familiamanda pipash huañujpi

Australia llactamanda Vanessaca ninmi: “Ñuca rucu turigu cungashcapi huañujpica, imata ruraitapash na usharcanichu. Huaquin quillacuna jipapashmi paita yarishpa ninandapacha llaquirijurcanilla, huaquinbica culiraitapashmi culiran carcani. ¿Imashpashi ñuca turiguhuan na ashtahuan tiempota yalircani? nishpapashmi ninanda llaquirin carcani” nin.

QUIQUINBA familiamanda pipash huañujpica llaquilla, solollami sintiripangui. Imatapash na rurai ushashpami ratotaca culiraripangui, manllapangui. Shinallata “ñuca culpami carca ¿cai llaquihuan causashpa catita ushashacha?” nishpapashmi tapuripashcangui.

Pipash huañujpi llaquirishpa huacanaca, huañushcaguta ninanda juyashcatami ricuchin. Shinapash ¿imatapash rurashpa alillata sintiri usharinllu?

HUAQUINGUNACA CAITAMI RURASHCA

Imapash na ayudahuangachu nishpa yuyajujpipash, cai cati consejocunami quiquinda ayudai ushapanga.

HUACANAYAJPICA HUACAPANGUILLA

Na tucuicunachu familiapi pipash huañujpica shinallata sintirin. Huaquingunaca unaitami ninandapacha llaquirin, cutin shujcunaca ashalla tiempota. Shinapash pipash huañujpica ninanda huacanaca ali sintirichunmi ayudan. Callari parrafopi parlashca Vanessaca ninmi: “Alillata sintiringapami ninanda huacan carcani” nishpa. Shinallata Sofía shuti huarmigupa ñañagu na yashcapi huañujpica, Sofiaca ninandami llaquiyarca. Chaimandami paica nin: “Ñuca ñaña huañushcata yarinaca ninandami llaquilla sintichihuan, shina llaquilla sentimientocunata ladoman saquinaca shinllimi cashca. Shinapash ñuca ñañagu huañushcata intindinami alillata sintirichun ayudahuajun” nin.

IMASHINA SINTIRIJUSHCATA PARLAPAI

Quiquinlla cangapaj munashpapash, imashina sintirijushcataca pimanbash parlanami capangui. Jared shuti jovenba taitaca, pai 17 huatacunata charijpimi huañurca. Paica ninmi: “Ñucaca imacunatapashmi nijunlla carcani. Shinapash ñuca imashina sintirijushcata shujcunaman parlanami ashtacata ayudahuarca” nin. Callari temapi parlashca Janice shuti huarmigupash ninmi: “Shujcunahuan parlanaca ashtacatami cushichihuarca. Ñucata intindihuashcatami sintircani” nin.

SHUJCUNA AYUDACHUN SAQUIPAI

Shuj doctoraca ninmi: “Huañui tiashca jipalla familiacunapa, amigocunapa ayudata chasquijcunaca alillatami sintirin, huaquin quillacuna jipapashmi ali sintirishpa aguantashpa ñaupaman cati ushan” nin. Chaimandami quiquinba amigocunamanga imapi ayudachun minishtijushcata ninalla capangui. Paicunaca quiquinda ayudangapami munan (Proverbios 17:17).

TAITA DIOSMAN ASHTAHUAN QUIMIRIPAI

Rebeca huarmiguca ninmi: “Ñuca cusagu cungashcapi cancerhuan chingarijpica Taita Diosmanmi tucuita parlan carcani, rijcharishcandimi cai punllapi ñaupaman cati ushangapaj fuerzaguta carahuangui nishpa Taita Diosta mañan carcani, paimi ninanda ayudahuashca” nin. 22 huatacunata charijpimi Elenapa mamitaca huañurca. Paica ninmi: “Ñucataca cada punlla Bibliata liinami cushichihuarca, Bibliata liinami ali yuyaicunapi pensachun ayudahuarca” nin.

HUAÑUSHCACUNACA CAUSARINGAMI

Rebeca huarmiguca ninmi: “Callaripica ñuca cusagu causarinapi yuyanaca imapipash na ayudahuarcachu, ñucapash ñuca huahuacunapash chai ratomi paitaca ninanda minishtircanchi. Shinapash ñami chuscu huatacuna yalishca, cunanbica ñuca cusagu causarinapi yuyanami ñaupaman catichun ayudahuan. Paihuan cutin tuparinataca cushijushpami shuyajupani, chaimi tranquila sintiripani” nin.

Tal vez chai ratoca nalimi sintiripangui. Shinapash Vanessapa nishcacunami ashatallapash ayudapanga. Paica ninmi: “Na aguantai ushashachu yashpapash, tiempohuanga aguantai usharinmi” nishpa.

Huañushcaguta na cungai ushashpapash ñaupaman cati ushapanguimi. Taita Diospa ayudahuanga, quiquinba amigocunahuan ali llevarishpa, quiquinba causaihuanbash ñaupaman cati ushapanguimi. Ñallami Taita Diosca huañushcacunata causachinga. Taita Diosca paicunata cutin ricuchun, cunanbi llaquilla sintirijushcatapash para siempre cungachunmi munan.

Bibliapa cai textocunami ayudai ushapanga.

Llaquilla sintirijtaca Taita Diosca ricujunmi.

Bibliata escribij shuj runaguca nircami: ‘Ñuca viquitaca, cara muchilapimi tandachishpa charijupangui. Chaicunataca ¿nachu cambaj libropi escribishca?’ (Salmo 56:8).

Imashina sintirijushcata Taita Diosman villapai.

‘Ñuca llaquitaca, paipaj ñaupajpimi ricuchisha. Mandaj Dioslla,a candaca [ayudahuai] nishpami caparircani’ (Salmo 142:2, 5).

Huañushcacunaca causaringami.

“Huañushcatapash Taita Dios causachinatami cushijushpa shuyajuni” (Hechos 24:15).

Taita Diosca ashtaca millón huañushca gentecunatami causachinga, chaitaca pactachingamib (Job 14:14, 15).

a Bibliata escribishca shimicunapica, Diospa shuti Jehová cashcatami ricuchin. Quichua Bibliacunapica Taita Diospa shuti tiajushca pushtucunapica “Taita Dios”, “Tucui Ushaita Charij Dios”, “Mandaj Dios” nishpami churashca.

b Huañushcacuna causarinamanda ashtahuan yachangapaj munashpaca Para Siempre Cushilla Causapashunchi nishca libropa lección 30ta ricupangui. Chaitaca testigo de Jehovacunami llujchishca. jw.org/qvi direccionbipash ricupangui.