Bibliaca ¿imatata Taita Diosmanda, Jesusmandapash yachachin?

Diosca ¿pita can?

Taita Diospa shuti. Taita Diosllatami cashna nin: “Ñucaca, Mandaj Dios [“Jehová”, NM ] shutimi cani” nishpa (Isaías 42:8). Shinapash punda tiempopi Diospa Shimita escribinajushpaca casi 7 mil viajemi Jehová shutitaca churarca. Tauca Bibliacunapica Diospa shutita churanapa randica, Mandaj Dios, Taita Dios o Señor nishpami churashca. Taita Diosca quiquin paipa ali amigo cachun munashpami, paipa shutipi parlachun munan (Salmo 105:1).

Diostaca cashna nishpapashmi rijsin. Bibliapica Jehová Diosmanda parlangapaca Taita Dios,Tucui Ushaita Charij, Tucuita Ruraj, Señor nishpami escribishca can. Bibliapica Jehovata mañajushpa cai shimicunata utilizashpa mañashcata o Jehová Dios nishpa mañashcatami ricuchin (Daniel 9:4).

Taita Diosca ¿imashinata can? Taita Diosca shuj espiritumi can (Juan 4:24). Bibliapica “Taita Diostaca, pipash ima horallapash na ricushcachu” ninmi (Juan 1:18). Shinallata Taita Diosca sentimientocunata charishcatami yachachin. Ñucanchi imata rurashpapash Taita Diosta cushichijta o llaquichijta ushashcatami Bibliapica ricuchin (Salmo 78:40, 41; Proverbios 27:11).

Taita Diosca ¿imashina Diosta can? Gentecuna shuj shuj llactacunamanda cajpipash, shuj shuj costumbrecunata charijpipash Taita Diosca tucuicunatallatami igual tratan (Hechos 10:34, 35). Shinallata Taita Diosca llaquij, pacienciata charij, juyaj, na llullaj Taita Diosmi can (Éxodo 34:6, 7). Shina cashpapash Jehová Diosca ashtahuanbacha ushaita charij, ali yachaita charij, alita ruraj, juyaj Diosmi can.

Taita Diosca tucui ushaitami charin. Paica ‘Tucui Ushaita Charij Taita Diosmi’ can. Chaica Taita Dios paipa tucui nishcacunata pactachingapaj ushaita charishcatami ricuchin (Génesis 17:1).

Taita Diosca ali yachaitami charin. Bibliapi nishcashnaca Taita Diosllami “Tucuita yachaj” cashcatami ricuchin (Romanos 16:27).

Taita Diosca alita ruraj Diosmi can. “Pai rurashcacunaca, ima pandapash illajmi” can. Shinallata ‘aligutalla ruraj Diosmi’ can (Deuteronomio 32:4).

Taita Diosca juyajmi can. Bibliaca “Taita Diosca, ninandapacha juyajmi” can ninmi (1 Juan 4:8). Taita Diosca juyaj Diosmi can. Paica imagutapash rurashpapash juyaimandami ruran. Chai juyaimandami ñucanchica bendiciai tucunchi.

Taita Diosca gentecunata juyanmi. Taita Diosca jahua cielopi tiajuj ñucanchi Taita Diosmi can (Mateo 6:9). Paipi tucui shunguhuan crishpaca, paipa ali amigocunami caita ushapashun (Salmo 25:14). Ashtahuanbash Taita Diosca paita mañashpa, tucui ñucanchi problemacunamanda paiman parlachunmi munan (Santiago 4:8; 1 Pedro 5:7).

¿Jesusca Taita Dioschu can?

Jesusca na Taita Dioschu can. Jesustallami Taita Diosca paipacha rurarca. Chaimandami Bibliapica Jesustaca Taita Diospaj Churimi can nishpa yachachin (Juan 20:31). Jesusca Jehová Diospa punda churimi can. Chaimi Jesusca Jehová Diostaca jahua pachatapash, cai pachatapash, gentecunatapash rurashpa ayudarca (Proverbios 8:30, 31; Colosenses 1:15, 16).

Jesusca nunca na Taita Diosmi cani nircachu. Jesusca cashnami nirca: Taita Diosmanda “ñuca shamushca cashpami, paitaca rijsini. Paimi, ñucataca cachamuhuarca” nircami (Juan 7:29). Shinallata Jesusca, paipa catij shuj huarmiguhuan parlashpami Jehová Diosmandaca cashna nirca, “Ñuca Taitaca, cangunapajpash Taitami. Ñuca Taita Diosca, cangunapajpash Taita Diosmi” can nishpa (Juan 20:17). Jesús huañujpimi Jehová Diosca jahua cielopi causachun paitaca cutin causachirca. Shinallata “Taita Diospaj ali ladopi” cachun, autoridadtapash charichun Jesusmanga curca (Mateo 28:18; Hechos 2:32, 33).

Jesusca Taita Diospa amigo cachunmi quiquindaca ayudaita ushan

Jesusca paipa Taita imashina cajta yachachingapami cai alpamanga shamurca. Jehová Diosca cashnami Jesusmandaca nirca: “Caimi, ñuca juyashca Churigu. Paitami uyana canguichi” nishpa (Marcos 9:7). Jesusllami Taita Diostaca alipacha rijsin. Chaimi Jesusca, “Ñuca Taitatapash, pipash na rijsinllu. Ñucallami, paipaj Churi cashpa rijsini. Shinallata paipaj Churi paipaj Taitata maijanmambash rijsichijpillami, Taitataca rijsinajun” nirca (Lucas 10:22).

Jesusca Taita Dios imashna cajtami ricuchin. Jesusca Taita Dios imashinapacha cajta ricuchimandami cashna nirca: “Maijambash ñucata ricushpaca, ñuca Taitatami ricujun” nishpa (Juan 14:9). Jesusca paipa parlocunahuan, ruraicunahuanmi Taita Dios gentecunata juyashcata ricuchirca. Shinami gentecuna Taita Diospaman quimirichun ayudarca. Jesusca nircami: “Ñucallami ñan cani. Na llullashpa villajmi cani. Causaita causagrinata carajpashmi cani. Ñuca Taitapajman ñuca na pushajpica, pipash na paillata chayai ushanllu” nishpa (Juan 14:6). Shinallata cashnami nirca: ‘Tucui shunguhuanbacha adorajcunaca, espíritu santohuan, cabal yachachishcahuanmi Taita Diostaca adoranga. Taita Diosca shina adorajcunatami mascan’ nishpa (Juan 4:23, NM ). Imashinami ricupanchi Jehová Diosca quiquinshna paimanda cabalguta yachajungapaj munaj gentecunatami mascajun.