Taita Diospa Gobiernoca ¿imacunatallata ruranga?

TAITA DIOSPA GOBIERNOCA ¿IMATATA ÑA RURAJUSHCA?

Página 8manda 10​camanga, Jesuspa tucui nishcacuna imashina pactarijushcatami yachajupashcanchi. Chaicunaca Taita Diospa Gobierno jahua cielopi ña mandajushcata, Jesuspash Rey shina ña mandajushcatami ricuchin.

Jesús jahua cielopi mandai callarishpaca Diablotapash, ayacunatapash jahua cielomanda llujchishpa cai alpaman shitashcatami Bibliapica ricuchin. Cunanbica Diablopash, ayacunapash cai alpapimi can. Chaimandami 1914 huatamanda cunangamanga ashtaca llaquicuna mirashca (Apocalipsis 12:7, 9).

Cai mundopi ashtaca llaquicuna tiajpipash Jesusca ashtaca ali cosascunatami gentecunamandaca rurajushca. Cunanbica mundo enteropi gentecuna Bibliamanda yachajuchunmi Jesusca villachinataca ñaupaman pushajushca. Chaimandami ashtaca millón gentecunataca Bibliapa consejocunata paicunapa causaipi pactachichun Jesusca ayudajushca (Isaías 2:2-4). Chai gentecunaca, ñana yapata trabajopilla yalinata, familia ucupipash cushilla causanata, minishtirishca cosascunahuanlla cushilla causanatami yachajushca. Bibliata yachajunami ali causachun, Taita Diospa ñaupapipash ali ricurichun ayudashca. Shina gentecunatami Taita Diosca paipa Gobiernopi causachun munan.

TAITA DIOSPA GOBIERNOCA ¿IMACUNATALLATA ÑALLAPACHA RURANGA?

Jesusca jahua cielopi ña mandajushpapash, cai alpapica gentecunami mandashpa catinajun. Shinapash Taita Diosca Jesustaca cashnami nirca: “Canda fiñajcunapaj chaupipi mandangui” nishpa (Salmo 110:2). Jesusca ñallami paipa tucui contracunata, tucui llaquicunatapash tucuchinga. Shinami Taita Diosta sirvijcunaca cushilla causanga.

Shamuj punllacunapica ¿imatata Taita Diospa Gobiernoca ruranga?:

• Tucui panda religiongunatami tucuchinga. Bibliapica tucui panda religiongunataca shuj huainayaj huarmihuanmi chimbapuran. Chai panda religiongunami Taita Diosmanda llullacunata yachachishca, gentecunatapash llaquichishca. Chaimandami chai panda religiongunaca tucuchi tucunga. Chaita ricushpami ashtaca gentecunaca ninanda manllarinajunga (Apocalipsis 17:15, 16).

• Tucui gobiernocunatami tucuchinga. Taita Diospa Gobiernoca cai alpapi tiashca tucui gobiernocunatami tucuchitapacha tucuchinga (Apocalipsis 19:15, 17, 18).

• Nali gentecunata tucuchinga. Nalicunatalla rurashpa causaj gentecunahuan, Taita Diosta na cazungapaj munaj gentecunahuanbash ¿imata pasanga? Bibliapica: “Diosta na manllajcunaca, llactamanda [o Alpamanda] anchuchi tucungami” ninmi (Proverbios 2:22).

• Diablotapash, ayacunatapash tucuchinga. Diablopash y ayacunapash gentecunataca ñana ‘ashtahuan umachinajungachu’ (Apocalipsis 20:3, 10).

Taita Diospa Gobierno mandajujpi causangapaj munaj gentecunahuanga ¿imata pasanga?

TAITA DIOSPA GOBIERNOCA ¿IMATATA GENTECUNAMANDACA RURANGA?

Jesusca jahua cielomandami cai alpapi tiashca gobiernocunata yali ashtaca cosascunata ruranga. Jesusca cai alpamanda agllai tucushca 144.000 reycunahuanmi mandanga (Apocalipsis 5:9, 10; 14:1, 3). Paicunami Taita Diospa munaita cai alpapi pactachinga. Shinapash Taita Diospa Gobiernoca ¿imatata gentecunamandaca ruranga?

• Ungüicunatapash, huañuitapash tucuchinga. Bibliapica: “Chaipi causajcunaca, pipash na: “Ñucaca huañujunimi” ninajungachu”. Shinallata “huañuipash [...] na ashtahuan tiangachu” ninmi (Isaías 33:24; Apocalipsis 21:4).

• Ciertopacha ali causaimi tianga. Bibliapica: “Cambaj churicunaca, ashtahuan ashtahuanmi casilla ali causaita japinajunga”. Shinallata “Tucuicunami quiquin uvas yura ucupi, quiquin jigos yura ucupi tiarishpa samanajunga. Chaipica, pipash na manllachingachu” ninmi (Isaías 54:13; Miqueas 4:4).

• Gentecuna gushtashca trabajomi tianga. Bibliapica: “Ñuca agllashcacunaca, paicunapaj maquihuan imatalla rurashcahuanmi cushijushpa causanajunga. Na yanga trabajanajungachu” ninmi (Isaías 65:22, 23).

• Gentecuna cai alpata tucuchichunga na saquingachu. Bibliapica: “Jichushca chulunlla sirij pambaca, cushillami tucunga. Chaquishca yuracunapash cushijushpami, juyailla rosas sisashna sisanga” ninmi (Isaías 35:1).

• Gentecunata unai unai causachunmi yachachinga. Bibliapica: “Na llullaj shujlla Taita Dios cashpami, cambaj Churi Jesucristotaca cachamuhuarcangui. Shina cajta rijsishpallami, pipash causaita causagringa” ninmi (Juan 17:3).

Taita Diosca quiquinbash chai bendiciongunata chasquichunmi munan (Isaías 48:18). Cati temapimi chai bendiciongunata chasquingapaj cunanmandallata imata rurana cashcata yachajupashun.