Profetacunapa ejemplota catishunchi: Joel
1. Villachinajushpaca ¿imashinata profeta Joelpa ejemplota cati ushapanchi?
1 Profeta Joelca ¿pita carca? Joelca ‘Petuel shuti runapa churimi’ carca (Joel 1:1). Paica humilde caimandami paipa rurashcacunamanda parlanapa randica, Jehová imata villachun cachashcata pundapica parlan carca. Ñucanchipash profeta Joelpa ejemplota catishpami, gentecuna ñucanchita alicachichun munanapa randica Jehovata, Bibliata ashtahuan alicachichun munanchi (1 Cor. 9:16; 2 Cor. 3:5). Jehová Dios villachichun cachashca shimicunaca ñucanchipallatami ali can. Shinaca profeta Joelpa villachishcacuna ashtahuan villachichun, feta charichun ñucanchita imashina ayudajta ricupashun.
2. Jehovapa punlla ña pactamujushcamandaca ¿imatata rurana capanchi?
2 “Mandaj Dios shamuna punllapash ñami pactamujun.” (Joel 1:15.) Chai shimicunata casi 3 mil huatacuna huashaman escribishca cajpipash cunan punllacunapimi pactarijun. Cunanbica tucurimui punllacunapi causanajuimandami ashtaca llaquicuna tian. Burlarij gentecuna, na uyangapaj munaj gentecunapash ashtahuanmi miranajun (2 Tim. 3:1-5; 2 Ped. 3:3, 4). Chaimandami villachinataca pundapi churana canchi (2 Ped. 3:11, 12).
3. ¿Imamandata Jatun Manllanai Llaqui Punllacuna ña chayamujujta yachashpaca villachinata yaria cana capanchi?
3 “Pai agllashcacunaca, Mandaj Diostallami shuyanajunga.” (Joel 3:16.) Chai textopica ninbashmi: “Jahua pachapash, cai pachapash chujchungami” nishpa. Shina nishpaca, Jatun Manllanai Llaqui Punllacunapi nali gentecunata Jehová juzganatami nijun. Chai punllacunapi paita ali sirvinajujcunata Jehová salvanata yachashpaca cushijunchimi (Apoc. 7:9, 14). Villachinata yaria cashpa, Jehová Dios cuidajujta, ayudajujta cuenta japinami shinlli feta charichun, aguantachunbash ayudan. Feta charishpalla, aguantashpallami Jatun Manllanai Llaqui Punllacunamandaca salvari ushashun.
4. ¿Imamandata shamuj punllacunatapash na manllashpa cushijushca caita ushapanchi?
4 Huaquingunaca ninmi, profeta Joelca llaquicuna tianatallami villan nishpa. Shinapash Joelca, Jehovata sirvijcuna salvarinatami villan (Joel 2:32). Shinaca, shamuj punllacunata na manllashpa, Diospa Reinomandaca na shaijushpa villachishpa catishunchi. Joel 2:23pi nishca shinacarin, ‘Mandaj Taita Dioshuan cushijushunchi’.