Revistacunata chasquijcunaman Bibliata yachachishunchi
1. Jehová Diospa organizacionga ¿imamandata liinata gushtaj gentecunamanga revistata saquishpa catichilla nishpa animajushca?
1 Jehová Diospa organizacionga cutin cutinmi nijushca, gentecuna Bibliata na estudiangapaj munashpapash revistacunata liinata gushtajpica revistacunata saquishpa catichilla nishpa. Shinapash ¿imamandata shina nishpa animajushca? Revistapi temacunami gentecunataca Bibliata yachajungapaj munachun animan (1 Ped. 2:2). Chaimandami huaquingunaca revistapi shuj tema paicunapa shunguman chayajpi Bibliata yachajui callarishca.
2. Revistata chasquijcunataca ¿imashinata ayudashun?
2 Diospa Shimita yachachishpa catishunchi. Revistacunata saquishpa rinapa randica ashaguta parlashpa gentecunata ashtahuan rijsishpami ali canman. Shinami gentecuna imashina causajta, imata yachangapaj munajta, ima crishcata yachashpa paicunahuan parlashpa catita ushashun (Prov. 16:23). Revistata chasquijcunahuan parlangapaca, revistamanda shuj temata, shuj textotapash agllashpami aliguta prepararishpa ashalla shimicunapi parlana canchi. Shinami Bibliapa yachachishcacunahuan gentecunataca ayudashun (1 Cor. 3:6). Ima punlla visitashcata, ima publicaciongunata saquishcata, ima temata parlashcata, ima textocunata liishcataca anotanami capanchi.
3. Revistacunata chasquij gentecunataca ¿mashna tiempopita cutin visitana capanchi?
3 ¿Mashna tiempopita cutin visitana canchi? Revistacunataca quillapi shuj viajemi saquinchi. Shinapash gentecuna yachangapaj munajta ricushpaca shuj o ishcai semanacuna jipa tigrashpami ninalla canchi: “Quiquinman saquishca revistapi cai ali temata liishpami quiquinhuan ashaguta parlangapaj shamujuparcani” nishpa. Shina nijpica gentecunaca tal vez shuj temamanda yachangapaj munangami. Cutin ñami liircani nijpica, chai temamandaca imatata pensapashcangui nishpa parlachinallami canchi. Ñucanchi publicaciongunata gushtajpica chai quillapi saquina tratadota, folletota o librota saquinallami canchi.
4. Revistata chasquijcunamanga ¿imashinata Bibliata yachachi callarishun?
4 Bibliata yachachihuai ningacamanga na shuyanachu canchi. Callaripi na yachajungapaj munanichu nijpipash, huaquinbi huaquinbica Villajun revistapa “Bibliamanda tapuicuna” nishcata ricuchishpa yachachinallami canchi. Shina rurashpaca tal vez shuj estudiota chari ushashunmi. Bibliata na estudiai callarijpipash, revistacunataca apashpa catishunchilla, shinallata yachana munaita charichunbash ayudashpa catipashunchi.