Profetacunapa ejemplota catishunchi: Sofonías
1. Sofoniasca ¿imashina punllacunapita villachirca? ¿Imamandata Sofoniasca shuj ali ejemplo can?
1 Punda punda tiempocunapica Baal nishca yanga diostami Judá llactamanda gentecunaca adoranajurca. Chai punllacunapica nali rey Amonda huañuchijpimi joven cashpapash rey Josías mandai callarirca (2 Crón. 33:21–34:1). Chashna llaqui punllacunapimi Jehová Diosca Sofoniastaca nirca, ñuca imata ruranata chai gentecunaman villapai nishpa. Sofoniasca reycunapa familiami cashcanga. Shinapash na manllashpami jatun mandajcunata Jehová Dios imata ruranataca villachirca (Sof. 1:1; 3:1-4). Ñucanchicunapash Jehová Diosta ali adorangapami munanchi. Chaimandami familiacuna trancangapaj munajpipash Jehovata ali adorangapaj esforzarinchi (Mat. 10:34-37). Sofoniasca ¿imatata villachirca? Villachijpica ¿imata pasarca?
2. Jehová Dios ‘fiñarishpa llaquichijui punllacunamanda’ salvaringapaca ¿imatata rurana capanchi?
2 ‘Mandaj Diosta mascaichi.’ Jehová Dios ninanda fiñarina punllacunapica Jehová Diosllami gentecunataca salvai ushan. Chaita ali yachashpami Sofoniasca, tiempo tiajpillata Jehová Diosta mascaichi, alita ruranata, na jariyashpa causanatapash mascaichi nishpa gentecunamanga villachirca (Sof. 2:2, 3). Cunan punllacunapipash Sofoniaspa ejemplota catishpami gentecunataca Jehová Diosta mascaichi nishpa villachinchi. Gentecunaman shina villachishpapash ñucanchicunapashmi Jehová Diosta na saquina munaihuan mascana canchi (Sof. 1:6). Shinapash ¿imashinata Jehová Diosta, alita ruranata, na jariyashpa causanata mascashun? Jehová Diosta mascashpaca Bibliatami aliguta yachajuna canchi, Jehová Diostami mañana canchi. Alita ruranata mascashpaca nali, mapa munaicunamandami caruyana canchi. Na jariyashpa causanata mascashpaca Jehová Diospa organización imata mandajpipash alicachishpami cazuna canchi.
3. ¿Imamandata villachishpa catina capanchi?
3 Villachijpica ¿imata pasarca? Sofonías villachijpica huaquin judiocunaca alimi uyarca. Ashtahuanbachaca rey Josiasmi alicachishpa uyarca. Chaimandami joven cashpapash Jehová Diosta mascai callarirca. Jipamangarin Judá llactapi tucuilla yanga dioscunata tucuchichunmi mandarca (2 Crón. 34:2-5). Cunan punllacunapipash ali villaicunaca tarpuna muyu cuendami rumilla alpacunapi, casha junda alpacunapi, ali alpacunapi urman. Ali alpacunapi urmashpaca gushtutami fucun (Mat. 13:18-23). Shinaca ali villaicunata shuj muyuguta cuenda tarpushpa catijpica, Jehová Diosca bendiciashpami catinga (Sal. 126:6).
4. ¿Imamandata Jehová Diospa punlla chayamunataca shuyanapacha canchi?
4 Huaquin judiocunaca Jehová Diospa punlla chayamunataca na crircachu. Shinapash Jehová Diosca nircami, ñuca punllaca chayamungapachami nishpa (Sof. 1:12, 14). Jehovapi pacajujcunallami salvarina carca (Sof. 3:12, 17). Ñucanchicunapash Jehová Diospa punlla chayamungacamanga shuj huauquipanicunahuan tandanajushpa Diosta sirvishpa catishunchi (Sof. 3:8, 9).