Jehová Diosca ¿imatata ricun?
1. ¿Imamandata ninchi, Bibliaca espejoshnami can nishpa?
1 ¿Mashna viajeta espejopica ricuripangui? Huaquingunaca aliguta arreglaringapami cada punlla espejopi ricurinchi. Bibliaca shuj espejoshnami can. Bibliata liishpami ñucanchi shungu imashina cashcata cuenta japinchi. Jehová Diosca ñucanchi shungutami ricun (1 Sam. 16:7; Sant. 1:22-24). Ashtahuangarin Bibliata liinami ñucanchi yuyaicunata, shungu imata yarijujta’ ricuchun ayudan (Heb. 4:12). Shinapash ¿imashinata Bibliata cada punlla liina, imata liishcapi yarishpa pensarinaca ashtahuan ali villachichun ayudan? (Jos. 1:8.)
2. Bibliaca ¿imashinata shuj espejoshna ayudan?
2 Bibliaca espejoshnami can. Bibliapica Jehová Diosta ali sirvijcunapa ashtaca ejemplocunami tian. Paicunapa ejemplopi pensarishpaca Jehová Dios imata munashcatami rurashun. Huaquin ejemplocunata ricupashun. Rey Davidca Taita Diospa shutita ninanda alicachishpami paipa shutita pipash pingaichichunga na munarca (1 Sam. 17:45, 46). Profeta Isaiaspash gentecuna na uyangapaj munana cajpipash na manllashpami villachingapaj rirca (Is. 6:8, 9). Jesuspash Jehová Diosta ninanda juyaimandami villachishpa purirca. Villachishpami Jesusca animarirca, cushijurca. Villachinataca na quillanayachircahu (Juan 4:34). Jesusta punda catijcunapash Jehovapi confiashpami tucui shunguhuan villachishpa catirca (Hech. 5:41, 42; 2 Cor. 4:1; 2 Tim. 4:17). Paicunapa ejemplocunapi pensarishpami ñucachicuna imashina cashcata cuenta japishpa ashtahuan aliguta Diosta sirvishun.
3. ¿Imamandata uchalla cambiana canchi?
3 Uchami cambiana canchi. Espejopi ricurishpapash na arreglarishpaca yangami espejopica ricurinajunchiman. Bibliata liishpapash imapi cambianata na cuenta japi ushashpaca Jehová Diostami ayudahuai nishpa mañana canchi. Chai jipaca cambiangapami esforzarina canchi (Sal. 139:23, 24; Luc. 11:13). Cai nali mundo tucuringapaca ashalla tiempomi faltajun, na ayudajpica ashtaca gentecunami huañunga. Shinaca chai gentecunata ayudangapaca imapi cambiana cashpapash uchalla cambiapashunchi (1 Cor. 7:29; 1 Tim. 4:16).
4. Taita Diospa Shimipi liishcata pactachishpa cambiajcunaca ¿imashinata can?
4 Jehová Diosca shungutami ashtahuanbachaca ricujun (1 Ped. 3:3, 4). Taita Diospa Shimipi liishcata ‘uyashpa pactachijcunaca ninandami cushijun’ (Sant. 1:25). Shinaca Jehová Dios imashina cajta espejoshna ricuchishpaca cushijushpa, ashtahuan aligutami villachishun (2 Cor. 3:18, NM).