“Paicunata Pablo ricushpaca Taita Diosta pagui nishpami, ninanda cushijurca”

Apóstol Pablo shamujujta yachashpami Roma congregacionmanda huaquin huauquipanicunaca, 64 kilometrocunatashna caruta purishpa tuparingapaj rirca. Paita ninanda juyashcata cuenta japishpami paicunata ricushpaca, ‘Taita Diosta pagui nishpa, ninanda cushijurca’ (Hch 28:15). Pablo tucui congregaciongunapi huauquipanicunata animan cashpapash, cunanga pai prezo cashcamandami paita animachun minishtijurca (2Co 13:10).

Cunan punllacunapica congregaciongunapi huauquipanicunata animangapami superintendente de circuito huauquicunaca visitashpa purin. Huaquinbica paicunapashmi ñucanchishnallata shaijushca, preocuparishca o desanimarishca sintirin. Superintendente de circuito huauqui, paipa huarmiguhuan visitanajujpica, paicunahuan “shujmanda shujmanda” animaringapaca ¿imatata rurai ushapanchi? (Ro 1:11, 12).

• 

  Villachingapaj llujshina tandanajuita apoyapashunchi. Superintendente de circuito huauquica pai visitajuj semanapi, tucui huauquipanicuna shuj shuj ruraicunata saquishpa apoyajujta ricushpaca ninandami cushijun (1Te 1:2, 3; 2:20). Chai quilla precursorado auxiliarta japingapaj esforzaripashunchi. Superintendente huauquita o paipa huarmigutapash villachingapaj o Bibliamanda yachachingapaj invitanallami capanchi. Chairallami villachi callarircani, ali villachitaca na ushanichu nishpaca ama pinaripanguichu. Paicunaca congregacionmanda tucui publicadorcunahuanmi villachinata gushtan.

• 

  Mingachipashunchi. Paicunata juyaimandami ñucanchi huasipi mingachina o micungapaj invitana capanchi. Paicunaca ashtaca ali micunataca na shuyanllu, ima charishcagutami carai ushapanchi (Lu 10:38-42).

• 

  Paicuna consejashcata uyashpa cazupashunchi. Superintendente de circuito huauquica Jehová Diosta ali sirvishpa catichunmi ayudan. Chaimandami huaquinbica ashata shinllilla consejanga (1Co 5:1-5). Shinaca, paicunapash paicunaman mingashcata ali pactachichunga tucui shunguhuan imata nishcata cazupashunchi (Heb 13:17).

• 

  Agradicipashunchi. Superintendente de circuito huauquita, paipa huarmigutapash quiquinda ninanda ayudashcamandaca, paicunahuanllata parlashpa o shuj tarjetaguta escribishpa agradicinallami capangui (Col 3:15).