Videocunata ricuchishpapash, Bibliamanda yachachishunchi

Fotocunata, videocunata, dibujocunata ricushpaca imatapash ñapashmi yachajunchilla. Ñucanchita alipacha yachachij Jehová Diosca, imatapash yachachingapaca paipa rurashcacunata ricuchishpami yachachishca (Gé 15:5; Jer 18:1-6). Ali yachachij Jesuspashmi shinallata yachachirca (Mt 18:2-6; 22:19-21). Cai ultimo huatacunapica videocunata ricuchishpami yachachinajupashcanchi. Chai videocunahuan Bibliamanda yachajujcunata ayudangapaj ¿esforzarinajupashcanchichu?

Cunangamanga Taita Diosmanda Ali Villaigucuna nishca folletomanda huaquin temacunata intindichingapaca, 10 videocunatami charipanchi. Cai videocunapa huaquin titulocunaca, cai folletomanda huaquin lecciongunapa tapuicunatallatami charin. Internet paginapi tiajuj folletota ricujpica, maijan tapuicunapi shuj videota ricuchina cashcata yachachunmi shuj enlace nishca tiajun. Shinallata Bibliamanda yachachingapaj shuj publicaciongunata ali intindichingapapashmi shuj videocunapash tian.

¿Quiquinhuan Bibliamanda yachajujca imapash tematachu na ashta ali intindipan? O ¿imapash llaquitachu chimbapurajun? Paita ayudangapaca jw.org® paginapi o JW Broadcasting® nishcapi imapash videota mascashpa ayudapangui. Tal vez ishcandimi chai videota ricushpa imata yachajushcata parlai ushapanguichi.

Cada quillami mushuj videocuna llujshin. Chai videocunata ricushpaca, imashina cai videocunahuan shujcunata ayudai ushashcapi yuyapangui.