BIBLIAPA VALISHCA YUYAICUNA | TITO 1-FILEMÓN
Shuj huauqui anciano shina sirvichunga ¿pita aproban?
Apóstol Pabloca cashna nishpami Tito runamanga mandarca: ‘Paicunata cuidashpa ricuchun mandaj rucucunata o ancianocunata agllashpa churapangui’ nishpa. Cunan punllacunapipashmi superintendente huauquicunaca Bibliapi imata nishcata catishpa congregacionbi anciano huauquicunata agllan.
CUERPO GOBERNANTEPI SIRVIJ HUAUQUICUNA
Cuerpo Gobernantepi sirvij huauquicunaca punda tiempopi Jesusta ali catijcunashnami congregacionbi ancianocunata, siervo ministerial huauquicunata aprobachun superintendente huauquicunaman mingashca.
SUPERINTENDENTE DE CIRCUITO HUAUQUICUNA
Shuj huauqui Bibliapi nishcata tucuita ali pactachijujpipash, superintendente huauquicunaca chai huauquita anciano shina sirvichun nara aprobashpallatami, shuj ancianocuna chai huauquimanda imata nijta ali ali uyana can. Shinallata Jehová Diosta mañana can.
ANCIANO HUAUQUICUNA
Ña anciano shina sirvi callarishpaca Bibliapi nishcacunata ali pactachishpami catina can.